Maariko 13 - Iimuuma Iinyaaya

Yeesu kaaikira riiyekaru rya Nyamuwanga okukamburwa

¹ Bhunu Yeesu ꞉aariga ˆnaasooka mw-ibhanja rya riiyekaru rya Nyamuwanga na abheeyigira bhaaye, owumwi wa abheeyigira bhaaye ˆnaamubhwira ati, “Mwiyigisha, ringira kutyo amagina na giinyumba kutyo giri!”

² Yeesu ˆnaamusubhya ati, “Owurora giinyumba giinene ginu? Ritarisigara egina ryoneryone ku-rindi, goone kutyo garikamburwa!”

Iinyanko iinene inu iriija

³ Bhunu Yeesu ꞉aariga eekaaye ku-kiima kya Emijeyituuni, ku-bhwerekera bhwa riiyekaru rya Nyamuwanga, Peetero, Yakobho, Yowana na Ndereya, mbamubhuusha bhari abheene era ati,

⁴ “Nuukibhwire, amangʼana gayo garibha-wo rusukuki? Ni kimenyegeshoki, ekiija okweresha ati amangʼana gayo gari ayeeyi okubha-wo?”

⁵ Niwe Yeesu ˆnaamba okubhabhwira ati, “Mwiyangarire, omuunu woonewoone aasiga okubhajimya!

⁶ Abhaanu bhaafu bhariija kw-isiina ryani, wumwiwumwi ˆnaaikaga ati, ‘Ni anye Kiriisitu!’ Abhaanu bhayo bharijimya bhaanu bhaafu.

⁷ Bhunu muryungwa amangʼana ga amaremo na amaremo agandi ganu ageenda okwamba, mwasiga okuubhaya. Gayo okubha-wo garibha-wo, nawe obhuteero bhwa amangʼana goone kutyo obhubha bhukyari.

⁸ Ekyaro ekimwi, ekiija okurwana na ekindi, na obhukama obhumwi, obhuuja okurwana na obhundi. Injara, na gaanyamutikima garibha-wo mbaara nyafu egya ekyaro. Gayo goone kutyo agabha gari muna bhinyonyi era, ku-bhusungu bhwa omugasi unu keenda okwibhura.

⁹ “Mwiyangarire abheene, kwa okubha bharibhasira mu-mabharaja, na bharibhabhuma kubhiibhi mu-masunagoogi geebhwe. Bharibhasira ku-bhatungi na ku-bhakama, kwa okubha ati emwe muri bheeyigira bhaani. Mu-kabhaga kayo niwe murinyoora omwanya gwa okubhabhwira amangʼana gaani.

¹⁰ Na eyeendwa Amangʼana Amajomu garaasibhwe okwamba mu-bhyaro bhyone kutyo.

¹¹ Bhunu bharibhagwata okubhasira mu-mabharaja okubharamurira, mwasiga okwinyansha ati omuuja okwaika kiinuki. Ganu muriyaanwa mu-kabhaga kayokayo, nigo mwaike. Kimari mutaribha emwe bhanu muryaikaga, tari ni Mwoyo Omutaakatiifu unu ari mw-imwe.

¹² “Omuunu arirya waamuwaabho injeejemo ˆnaamugura bhamwite. Omwibhusi wa ekirume arirya omwana waaye injeejemo ˆnaamugura insonga eetwe, nikwo kutyo na abhaana bhoone bharikora ku-bheebhusi bheebhwe, insonga bheetwe.

¹³ Abhaanu bhoone kutyo bharibhasoka, ku-nsonga yaani. Nawe, unu arisimbiira okuyikira ku-bhuteero, uyo niwe aryerusibhwa.”

Ebhinyansho ebhinene bhinu bhiriija

¹⁴ “Nawe bhunu murirora amangʼana amabhiibhi aga obhunyamusi  gayambaaye anu gatakwenderwa okubha, woonewoone unu kaasoma amangʼana ganu, agasombookerwe kujomu, ayo niwe bhanu bhari Ebhuyawudi, bhabhirimire mu-bhiima!

¹⁵ Omuunu unu ari kw-idaari eeke abhirime, aasiga okwingira mu-nyumba okugega ekiinu kyonekyone!

¹⁶ Omuunu unu ari mw-isambu abhirime era, aasiga okufutata okugega ingibho yaaye.

¹⁷ Garibhanyoora abhagasi bha ginda na bhanu bharineenʼyaga mu-nsiku giyo!

¹⁸ Musabhe ati, amangʼana gayo gaasiga okubha-wo mu-kabhaga ka imbewo iinyafu.

¹⁹ Ginsiku giyo iribha-wo nyanko nene muno inu ikyariga okubha-wo, okwambira anu Nyamuwanga ꞉aabhumbire ekyaro, okuyikira akabhaga kanu. Na itaribha-wo kweki.

²⁰ Raabhe Raatabhugenyi atakafuyayiishe ginsiku giyo, ataakabheeye-wo wa kwerusibhwa. Nawe Nyamuwanga arifuyiyasha ginsiku giyo, ku-nsonga ya abhasorwa bhaaye.

²¹ “Mu-kabhaga kayo, raabhe omuunu aribhabhwira ati, ‘Mwitegeereshe, Kiriisitu ari anu!’ amwi ati ‘Ari erya!’ mwasiga okumwikirisha.

²² Bhariija abharagi abhabheeyi na abhaanu bhanu bhariiyaaikaga ati nibho Kiriisitu. Bharikora bhimenyegesho na ebhiruguusho, insonga bhabhajimye, bhaakatura bhajimye na abhasorwa bha Nyamuwanga.

²³ Mmbe, mwiyangarire! Naabhabhwira amangʼana ganu goone kutyo, gakyari okubha.”

Okusubha kwa Omwana wa Adaamu

²⁴ “Mmbe, mu-nsiku giyo, bhunu iinyanko iyo iriwa, riisuubha ririsibhiirishwa nkibha kisuute, okwesi kutaribhara.

²⁵ Ginjota gyone girigwa ansi okusooka ku-rwire. Nyamuwanga arisingisha amanaga ga ku-rwire.

²⁶ “Ayo niwe abhaanu bharirora Omwana wa Adaamu ˆnaajaga ari ku-meere, ari na amanaga maafu na obhugungyo.

²⁷ Arituma bhaamaraayika bhakumanye abhasorwa bhaaye okusooka mbaara gyone kutyo ena egya ekyaro, okusooka ku-bhuteero bhwa ekyaro, okuyikira ku-bhuteero bhwa orwire.

²⁸ “Mwiyigire okusooka kw-iti rya riitiini. Amasagi gaaryo gakaamba okufuuka, amasha nganyirira, omumenya ati akabhaga ka okugesa kari ayeeyi.

²⁹ Nikwo kutyo emwe mwone mukarora amangʼana gayo ngamba, mumenye ati, aayikire ku-rwigi.

³⁰ Enibhabhwira ekimari ati, orwibhuro runu rutakuyitiingʼana amangʼana gayo goone kutyo gakyari kukuumira.

³¹ Orwire na ekyaro bhiriyitiingʼana, nawe amangʼana gaani garirama kajaanende.”

Nyamuwanga omwene era niwe amenyere orusuku rwa okusubha kwa Yeesu

³² “Nawe, atariwo omuunu unu amenyere orusuku amwi insa inu Omwana wa Nyamuwanga arisubha, bhatari bhaamaraayika bha mu-rwire amwi ati Omwana wa Nyamuwanga, bhoone kutyo bhatakumenya. Raata omwene era niwe amenyere.

³³ Mmbe, mwikare mwiyangariiye! Mwituuye-wo, [musaasaamaga] kwa okubha mutakumenya akabhaga kayo, ati karibha-wo rusukuki.

³⁴ “Okuuja kwaye okurengekanyibhwa na omuunu unu kaagenda orugendo, ˆnaasiga abhagaya bhaaye bhamwangaririre iinyumba yaaye. ˆNaagabhira wumwiwumwi emirimu gyaye egya okukora. ˆNaaragirira omuriisi wa omusi ati, akyeeshega obhwire.”

³⁵ Yeesu ˆnaagenderera okwaika ati, “Emwe mwone, mukyeshega obhwire, kwa okubha mutakumenya orusuku runu omwene nyumba arisubha. Mutakumenya ati arisubha iri keegoro, mu-bhwire agati, mu-ruguru, amwi ati bhukyeye.

³⁶ Mukyeshe obhwire, insonga mukataka era eejire, aasiga okubhanyoora muwongeeye.

³⁷ Rinu enibhabhwira emwe, niryo enibhwira na abhaanu abhandi bhoone kutyo ati, bhakyeshe obhwire.”