Maariko 12 - Iimuuma Iinyaaya

Ekirengekanyo kya abharimi abhakosi bha amabhiibhi

¹ Yeesu ˆnaamba okuroma nabho mu-bhirengekanyo, ˆnaaika ati, “꞉Aariga ariwo omuunu wumwi unu ꞉aariga ari na riisambu. Mw-isambu ryaye muyo, ꞉aariga ayambire-mo emijabhiibhu, arisitiiye orubhago, ˆnaasimba na riitoko erya okumigira-mo amanji ga giijabhiibhu mw-isambu agati, kweki ˆnoombaka-mo ekiisonge kireera ku-nsonga ya abhariisi. Mmbe, riisambu riyo ˆnaariyaana abharimi bharirimega, ˆnaakora orugendo.

² Akabhaga ka okugesa giijabhiibhu nkayika, omwene esambu ˆnaatuma owumwi wa abhagaya bhaaye ku-bharimi bhayo, ati bhamuyaane omugabho gwaye gwa giijabhiibhu okusooka mw-isambu ryaye.

³ Nawe, abharimi bhayo mbagwata omugaya uyo, mbamubhuma, mbamusubhya mabhoko ageene.

⁴ Omwene esambu ˆnaatuma kweki omugaya waaye owundi ku-bharimi bhayo. Uyo woone mbamubhuma mbamuwutaasha kubhiibhi ku-mutwe, mbamukorera amangʼana amabhiibhi muno.

⁵ ˆNaatuma omugaya waaye owundi, abharimi bhayo mbamwita. ˆNaatuma abhagaya bhaaye abhandi, abhaafu okukira bhanu ꞉aatumire okwamba. Abharimi bhayo mbabhuma abhandi, abhandi mbabheeta.

⁶ Omwene esambu ˆnaasigara na muunu wumwi era owa okutuma, omwana waaye omwende. Ku-bhuteero ˆnaamutuma ku-bharimi bhayo, ˆneeganiirisha ati, ‘Unu ni mumura waani abhaaja okumwiswara.’

⁷ “Nawe bhunu ꞉aayikire, abharimi bharya mbaaikana ati, ‘Unu niwe omugabhi wa ebhiinu bhya esemwene. Kimwite, omugabho gwaye gubhe gweswe.’

⁸ Niwe mbamugwata, mbamwita, mbamusoosha mw-isambu.”

⁹ Yeesu ˆnaabhabhuusha ati, “Angu, bhunu omwene esambu ariija aribhakora kutiki? Ariita kubhiibhi abharimi bhayo, na riisambu riyo, aririyaana abhaanu abhandi.

¹⁰ Angu, mukyari okusoma Amakaamo Amataakatiifu ganu? ‘Abhoombaki ꞉bhaaremere riigina rinu. Nawe, riigina rinu niryo ribheeye riigina riinene erya mu-rufuka.

¹¹ Riingʼana rinu risookere ku-Raatabhugenyi, na ni engʼana rinu erikiruguusha.’”

¹² Abhashengesi abhakuru, abheeyigisha bha ebhiraagiro bhya Musa na abhakaruka bha Abhayawudi, mbamenya ati ekirengekanyo kiyo ꞉kyariga nkyaikira abheene. Niwe mbeenda okumugwata, nawe mboobhaya riisangi rya abhaanu, mbamusiga, mbeemuka.

Riibhuusho rya okuteganya Yeesu

¹³ Niwe abhatangasha bha Abhayawudi mbatuma Abhafarisaayo abharebhe na abhasakisi bha omukama Yerode Antipa, bhateganye Yeesu okuriingʼaana na amangʼana gaaye omwene.

¹⁴ Mbamuuja-ko, mbamubhwira ati, “Ee Mwiyigisha, kimenyere ati awe uri muunu wa ekimari. Kimenyere kweki ati awe utakuubhaya muunu woonewoone, raabhé akabha na kibharo kinene. Owiiyigisha amangʼana ga Nyamuwanga ku-kimari kyago. Woori, okuriingʼaana na ebhiraagiro bhya Musa, ekyendwa kiriye riigooti ku-Kayijaari? Kiriye amwi ati wuri?”

¹⁵ Nawe, Yeesu ꞉aamenyere obhubheeyi bhwebhwe, ˆnaabhabhwira ati, “Ndora omwenda okunteganya? Mundeetere iidinaari iyo niyirore.”

¹⁶ Niwe mbamureetera, ˆnaabhabhuusha ati, “Orususo runu na riisiina rinu rikaamirwe ku-dinaari inu, ni bhyaga?” Mbamusubhya ati, “Ni bhya Kayijaari.”

¹⁷ Yeesu ˆnaabhabhwira ati, “Ebhya Kayijaari muyaane Kayijaari, ebhya Nyamuwanga muyaane Nyamuwanga.” Mbamuruguura muno.

Yeesu kaaikira obhusuuki bhwa abhafuuye

¹⁸ Kimwi Abhasadukaayo, bhanu ꞉bhaariga mbeeyigisha ati abhafuuye bhatakutura okusuuka kajaanende, mbagenda ku-Yeesu, mbamubhuusha ati,

¹⁹ “Mwiyigisha, Musa ꞉aakibhwiriiye mu-bhiraagiro bhyaye ati, raabhe omuunu akafwa ˆnaasiga mukaaye ateebhuuye nawe omwana na wumwi, omumura waabho agabhe omugasi uyo, insonga ayambaasishe omufu waabho omusi.

²⁰ Mmbe kyaike ati, ꞉bhaariga bhariwo bhamura mungati bhasookere nda yimwi. Owa okwamba ˆnaagabhura omugasi, ˆnaafwa akyari kwibhura nawe.

²¹ Owa akabhiri ˆnaagabha omugasi uyo, woone ˆnaafwa, atasigire-ko omwana. Owa akasatu woone niibha kutyo.

²² Niibha kutyokutyo ku-bhamura mungati bhoone kutyo, ꞉bhaafuuye bhateebhuuye nawe. Ku-bhuteero, omugasi uyo woone ˆnaafwa.

²³ Woori nuukibhwire, raabhe abhafuuye abhasuuka, bhunu bharisuuka, omugasi uyo aribha mugasi waaga? Bhoone kutyo mungati ꞉bhaamugabhuuye.”

²⁴ Yeesu ˆnaabhabhwira ati, “Angu emwe mutakubhura, kwa okubha mutakumenya ganu gakaamirwe mu-Makaamo Amataakatiifu, na mutakumenya obhuturo bhwa Nyamuwanga kutyo bhuri?

²⁵ Bhunu abhaanu bharisuuka, bhatarigabhura amwi ati kugabhurwa. Abhaanu bharibha rwa bhaamaraayika bha Nyamuwanga kutyo bhari mu-rwire, abheene bhatakugabhura amwi ati kugabhurwa.

²⁶ Nawe, iiguru ya abhafuuye ati bharisuuka, mukyariga okusoma mu-kitabho kya Musa, kutyo Nyamuwanga aaikire mu-kasaka kanu ꞉kaariga nkooka omuriro? Nyamuwanga ꞉aabhwiriiye Musa ati, ‘Anye niri Nyamuwanga wa Bhurayimu, Isaaka, na Yakobho.’

²⁷ Mu-mangʼana gayo Nyamuwanga kaaika ati, omwene atari Nyamuwanga wa abhafuuye, tari weeki ni wa bhanu abheesha omwoyo. Okubha kutyo emwe mubhurire muno.”

Ekiraagiro ekinene okukira bhyone kutyo

²⁸ Bhunu Yeesu ꞉aariga ˆnaabhambashaanya na Abhasadukaayo, omwiyigisha owumwi wa ebhiraagiro bhya Musa ˆnaayika, ˆnoongwa kinu ꞉bhaariga mbabhambaashaanira. Bhunu ꞉oonguuywe ati Yeesu aabhasubhya kujomu, ˆnaamubhuusha ati, “Mu-bhiraagiro bhyone kutyo, ekya okwamba ni kiiya?”

²⁹ Yeesu ˆnaamusubhya ati, “Ekya okwamba ni kinu ati, ‘Abhaijirayeeri mwitegeereshe! Raatabhugenyi Nyamuwanga weeswe, niwe Raatabhugenyi omwene era.

³⁰ Yeenda Raatabhugenyi Nyamuwanga waawo ku-mutima gwawo gwone kutyo, ku-mwoyo gwawo gwone kutyo, ku-bhwiganiirisha bhwawo bhwone kutyo, na amanaga gaawo goone kutyo.’

³¹ Na ekya akabhiri ni kinu, ‘Wende omwikashaanya waawo, rwa kutyo owiiyenda omwene.’ Kitariwo kiraagiro ekindi ekinene okukira ebhibhiri bhiyo.”

³² Omwiyigisha wa ebhiraagiro uyo ˆnaabhwira Yeesu ati, “Nikwo kutyo Mwiyigisha, waaika ekimari ati Raatabhugenyi Nyamuwanga ni wumwi era, atariwo wundi, tari omwene era.

³³ Na waaika ekimari ati, umwende mu-mutima gwawo gwone kutyo, obhwenge bhwawo bhwone kutyo, amanaga gaawo goone kutyo, na wende omwikashaanya waawo, rwa kutyo owiiyenda omwene. Gayo nigo amaragiriro amanene okukira okusoosha omugabho na ebhimweso bhyone kutyo.”

³⁴ Bhunu Yeesu ꞉aarorere ati omuunu uyo aasubhya kujomu, ˆnaamubhwira ati, “Awe utari areera na obhukama bhwa Nyamuwanga.” Okwambira ayo, ꞉ataabheeye-wo muunu unu ꞉aasakire okubhuusha Yeesu engʼana ryoneryone.

Yeesu ni muyiiri Dawudi na niwe Raatabhugenyi

³⁵ Bhunu Yeesu ꞉aariga ˆneeyigisha abhaanu mw-ibhanja rya riiyekaru rya Nyamuwanga, ˆnaabhabhuusha ati, “Kubhaki abheeyigisha bha ebhiraagiro bhya Musa abhaaika ati Kiriisitu ni muyiiri omukama Dawudi?

³⁶ Dawudi omwene bhunu ꞉aatangasibhwaga na Mwoyo Omutaakatiifu, aaikire ati, ‘Raatabhugenyi Nyamuwanga ꞉aabhwiriiye Raatabhugenyi waani, iikara orubhaara rwani orwa ebhuryo, okuyikira anu nikatuure abhasoko bhaawo emwaro, awe ubhatunge.’

³⁷ “Dawudi omwene kaaika ati, Kiriisitu ni esebhugenyi. Mmbe, Kiriisitu kaatura kutiki okubha muyiiri waaye?” Abhaanu bhaafu ꞉bhaariga mbamwitegeeresha bhajomeeywe.

Okwikenga na abheeyigisha bha ebhiraagiro bhya Musa

³⁸ Mu-meeyigisho gaaye agandi, Yeesu ˆnaaika ati, “Mwikenge na abheeyigisha bha ebhiraagiro bhya Musa. Abheeyigisha bhayo bheendere okufwara giikanju gyebhwe ndeera, mbakeesibhwa na okuyaanwa ekibharo mu-maguriro.

³⁹ Bheendere okwikara ku-bhitebhe bhya ekibharo mu-masunagoogi, na mu-bhugenyi.

⁴⁰ Abhateesha abhakimari bha ekigasi ebhiinu bhyebhwe, abhasabha nsaara ndeera insonga abhaanu bhabharore ati ni bharengeresi. Abhaanu bhanu, Nyamuwanga aribharamurira makomeeye muno.”

Omugabho gwa omugasi omukimari

⁴¹ Yeesu ˆneekara ayeeyi na riisandiko rya okusoosisha-mo emigabho mw-iyekaru rya Nyamuwanga. ꞉Aariga ˆnaaringira kutyo abhaanu ꞉bhaariga mbatuura emigabho mw-isandiko. Abhaniibhi abhaafu ꞉bhaariga mbasoosha yera nyafu.

⁴² ˆNaaja omugasi wumwi omukimari na ni mutobhu, woone ˆnaasoosha nchapa ebhiri era.

⁴³ Bhunu Yeesu ꞉aarorere gayo, ˆnaabhirikira abheeyigira bhaaye, ˆnaabhabhwira ati, “Kimari enibhabhwira ati, omukimari omutobhu unu, aasoosha yera nyafu okukira bhoone kutyo bhanu bhaasoosha.

⁴⁴ Enaaika kutyo kwa okubha abhandi bhoone kutyo bhaasoosha bhitooto era ku-bhiinu bhyebhwe ebhyafu. Nawe omugasi omukimari unu ku-bhutobhu bhwaye, aasoosha bhyone kutyo bhinu ari nabhyo.”