Maariko 11 - Iimuuma Iinyaaya

Yeesu keengira Yerusareemu

¹ Bhunu Yeesu na abheeyigira ꞉bhaarebhereeye Yerusareemu, ayeeyi na amagunguri ga Bheetifage na Bhetaaniya, ku-kiima kya Emijeyituuni, Yeesu ˆnaatuma bhaanu bhabhiri mu-bheeyigira bhaaye.

² ˆNaabhabhwira ati, “Mugende mw-igunguri rinu riri imbere weemwe. Mukayika ayo era, omuuja okunyoora ekimoori kya insikiri kisibhikirwe. Ni kimoori kinu kikyariga kuriinywa-ko na muunu. Mukisibhure, mukindeetere.

³ Omuunu woonewoone akabhabhuusha ati, ‘Kubhaki omukora kutyo?’ Mumubhwire ati, ‘Raatabhugenyi niwe kaakikena, kaaja okukisubhya.’”

⁴ Mmbe mbagenda, mbanyoora ekimoori kya insikiri kibhoyerwe anja wa riirango, kw-iparapara riinene, mbakisibhura.

⁵ Abhaanu abharebhe mu-bhanu ꞉bhaariga bhaayambaaye ayo, mbabhabhuusha ati, “Emwe! Omukoraki ayo? Kubhaki omusibhura ekimoori kiyo?”

⁶ Abheeyigira mbabhasubhya rwa kutyo Yeesu ꞉aariga abharagiriiye. Mmbe abhaanu bhayo bhoone, mbabheekirisisha.

⁷ Mbasira ekimoori kya insikiri ku-Yeesu, mbaanja gingibho gyebhwe ku-nsikiri iyo. Yeesu ˆnaariinya-ko ˆneekara, mbeemuka.

⁸ Bhaanu bhaafu mbaanja gingibho gyebhwe ku-njira, abhandi mbatema amatabhi mu-masambu mbaanja ku-njira okukorera Yeesu ekibharo.

⁹ Abhaanu bhanu ꞉bhaariga bhatangatire, na bhanu ꞉bhaamuseetaga iinyuma, bhoone kutyo mbaamura obhuraka mbaaikaga ati, “Wosaana! Ayaaywe giinonkwe unu kaaja kw-isiina rya Raatabhugenyi Nyamuwanga!

¹⁰ Bhuri na giinonkwe obhukama bhwa jaaji Dawudi bhunu bhuriija! Wosaana Nyamuwanga wa mu-rwire!”

¹¹ Yeesu ˆneengira Yerusareemu, ˆnaagenda aroobhere, ˆneengira mw-iyekaru rya Nyamuwanga. ˆNaaringira kujomu ebhiinu bhyone kutyo bhinu ꞉bhyariga bhiri muyo. Nawe kwa okubha ꞉yaariga iri keegoro, ˆneemuka, ˆnaagenda Bhetaaniya na abheeyigira bhaaye ekumi na bhabhiri.

Yeesu keeyiima riiti rinu ritari na matwasho

¹² Mwejo weende-ko, bhunu Yeesu na abheeyigira bhaaye ꞉bhaariga mbasooka Bhetaaniya okusubha Yerusareemu, Yeesu ˆnoongwa omweko.

¹³ ˆNaarora riiti rya giitiini riri areera-wo, ꞉ryariga riri na masha maafu. ˆNaarifugerera arore raabhe ritwasiishe giitiini. Bhunu ꞉aayikire-wo, ˆnaanyoora ritariko matwasho, riwundiishe amasha ageene era, kwa okubha ameesi ga amatwasho ꞉gaariga gakyari okuyika-wo.

¹⁴ Mmbe ˆnaabhwira riitiini riyo ati, “Okwambira reero inu na akajaanende koone kutyo, omuunu aasiga okukurya-ko amatwasho!” Abheeyigira bhaaye mboongwa amangʼana gayo.

Yeesu kaabhirimya abhasuruja mw-iyekaru rya Nyamuwanga

¹⁵ Bhunu ꞉bhaayikire Yerusareemu, Yeesu ˆneengira mw-ibhanja rya riiyekaru rya Nyamuwanga. ꞉Eejire eengira, ˆnaanyoora bhaanu bhaafu mbagusha na okugura ebhiinu mw-ibhanja muyo, ˆnaabhabhirimya bhoone kutyo. ˆNaagaramura giimeeja gya bhanu ꞉bhaariga mbaswenʼya giiyera, na ebhitebhe bhya bhanu ꞉bhaariga mbagusha ginguuti gya okusoosisha ebhimweso.

¹⁶ ꞉Ataasigire muunu woonewoone agege kiinu kyonekyone ekya kugusha mw-ibhanja rya riiyekaru.

¹⁷ ˆNaamara ˆnaabheeyigisha, ˆnaaika ati, “Angu, itakaamirwe mu-Makaamo Amataakatiifu ati, ‘Iinyumba yaani iribha nyumba ya okusaasaamira-mo, ku-bhaanu bha mu-bhyaro bhyone kutyo?’ Nawe emwe muyikorere okubha nsenga ya abheefi!”

¹⁸ Bhunu abhashengesi abhakuru, na abheeyigisha bha ebhiraagiro bhya Musa ꞉bhoonguuywe amangʼana gayo, mbaamba okwagara injira ya okumwita, kwa okubha ꞉bhaariga mbamuubhaya. ꞉Bhaariga mbamuubhaya kwa okubha abhaanu bhoone kutyo ꞉bhaariga mbaruguushwa na ameeyigisho gaaye.

¹⁹ Bhunu riisuubha ꞉ryaguuye, Yeesu na abheeyigira bhaaye mbasooka mu-musi agati.

Okusabha Nyamuwanga uri na obhwikirisha

²⁰ Mwejo weende-ko bhunu ꞉bhaariga mbasubha Yerusareemu, ꞉bhaanyoorere riitiini rirya ryumire okwambira kw-isina.

²¹ Peetero ˆnaayiita amangʼana ga Yeesu, ˆnaamubhwira ati, “Mwiyigisha, ringira! Riitiini rinu wiiyiimire, ryumire!”

²² Yeesu ˆnaabhabhwira ati, “Mwikirishe Nyamuwanga.

²³ Kimari enibhabhwira ati, omuunu woonewoone unu aribhwira ekiima kinu ati, ‘Iiyika wiiyese mu-nyanja,’ asige okwitimaata mu-mutima gwaye, tari abhe na obhwikirisha ati gayo aaika gaamarire okubha-wo, na agabha gaaye.

²⁴ Mmbe, enibhabhwira ati, goonegoone ganu omusabha ku-Nyamuwanga mu-nsaara, mubhe na obhwikirisha era ati omugaramira, na garibha geemwe.

²⁵ Nawe mukayambaara okusabha ku-Nyamuwanga, mwabhire omuunu woonewoone unu abhakayiiye, insonga Esomwana wa mu-rwire woone abhaabhire ebhikayo bhyemwe. [

²⁶ Nawe raabhe emwe mutakwabhira abhandi ebhikayo bhyebhwe, Esomwana wa mu-rwire atakuuja okubhaabhira emwe ebhyemwe.]”

Riibhuusho iiguru ya bhuturo bhwa Yeesu

²⁷ Yeesu na abheeyigira bhaaye mbayika kweki Yerusareemu. Bhunu ꞉aariga ˆnaaribhata mw-ibhanja rya riiyekaru rya Nyamuwanga, abhashengesi abhakuru, abheeyigisha bha ebhiraagiro bhya Musa na abhakaruka bha Abhayawudi mbamuuja-ko.

²⁸ Mbamubhuusha ati, “Owukora amangʼana ganu ku-bhuturoki? Niga unu akuyaaye obhuturo bhwa okugakora?”

²⁹ Yeesu ˆnaaika ati, “Siga anye noone nibhabhuushe engʼana rimwi. Mukansubhya riyo, noone enibhabhwira enikora ganu ku-bhuturoki.

³⁰ Angu, obhuturo bhwa Yowana obhwa okubhatiisha abhaanu, ꞉bhwasookere aaki? ꞉Bhwasookere ku-Nyamuwangaa, ꞉bhwasookere ku-bhaanu? Munsubhye kirore!”

³¹ Mbaamba okwaikana abheene na abheene ati, “Kikaaika ati, ꞉bhwasookere ku-Nyamuwanga, kaaja okukibhuusha ati, ‘Ndora mutaamwikirisiishe?’

³² Nawe, kikamusubhya ati, ‘꞉Bhwasookere ku-bhaanu,’ abhaanu abhaaja okukibhiiyirirwa.” ꞉Bhaariga mboobhaya abhaanu, kwa okubha bhoone kutyo ꞉bhaariga bhamenyere ati kimari Yowana ꞉aariga ari muragi.

³³ Okubha kutyo mbamusubhya ati, “Kitakumenya.” Mmbe, Yeesu woone ˆnaabhabhwira ati, “Anye noone nitakubhabhwira ati enikora ganu ku-bhuturoki.”