Maariko 10 - Iimuuma Iinyaaya

Okugabhura na okutaana

¹ Niwe Yeesu na abheeyigira bhaaye mbeemuka, mbagenda Ebhuyawudi. Mbaambuka okugenda ngʼambu ya oruuji rwa Yorodaani. Abhaanu bhaafu mbamwiyinda kweki, ˆnaamba okubheeyigisha rwa kutyo ꞉aariga anarire okukora.

² Rusuku rumwi, Abhafarisaayo mbaaja okumusakya. Mbamubhuusha ati, “Angu, okuriingʼaana na ebhiraagiro, eyiikirisibhwa omurume okutaana na mukaaye?”

³ Yeesu ˆnaabhasubhya ati, “Musa ꞉aabharagiriiye kutiki?”

⁴ Mbamusubhya mbaaika ati, “Musa ꞉eekirisiishe ati omurume akataana na mukaaye, amukaamire intaraaka.”

⁵ Yeesu ˆnaabhabhwira ati, “Musa ꞉aabhakaamiiye kutyo ku-nsonga ya obhukomeeye bhwa emitima gyemwe.

⁶ Nawe, ku-bhwambiro, Nyamuwanga ꞉aabhumbire omuunu omurume na omugasi.

⁷ ‘Ku-nsonga iyo, omuunu arisiga esemwene na nyiramwene, ˆnaayimbana na mukaaye,

⁸ abhabhiri bhayo bharibha mubhiri gumwi.’ Woori, bhatakyari bhabhiri kweki, tari abhabha mubhiri gumwi.

⁹ Mmbe, kinu Nyamuwanga agwatanyiishe, omuunu aasiga okukitaanya.”

¹⁰ Bhunu ꞉bheengiiye mu-nyumba kweki, abheeyigira bhaaye mbamubhuusha iiguru ya amangʼana gayo.

¹¹ Yeesu ˆnaabhabhwira ati, “Omuunu unu kaataana na omugasi waaye ˆnaagabhura omugasi owundi, kaataara ameega.

¹² Na omugasi unu kaataana na omurume waaye ˆnaagabhurwa na omurume owundi, kaataara ameega.”

Yeesu kaaramira abhaana abhatooto

¹³ Abhaanu ꞉bhaariga mbareetera Yeesu abhaana abhatooto abhakuunʼye-ko okubhayaana giinonkwe. Nawe abheeyigira bhaaye mbabhagonya.

¹⁴ Bhunu Yeesu ꞉aarorere abheeyigira bhaaye mbakora kutyo, ˆnaabhiiyirwa, ˆnaabhabhwira ati, “Musige abhaana abhatooto bhaaje ku-anye, musige okubhagaanya! Abhaanu bhanu bhari rwa abhaana bhanu, obhukama bhwa Nyamuwanga ni bhwebhwe.

¹⁵ Enibhabhwira ekimari ati, omuunu woonewoone unu atakwikirisha obhukama bhwa Nyamuwanga rwa omwana omutooto, atakutura okubhwingira-mo kajaanende.”

¹⁶ Niwe ˆnaafumbeera abhaana bhayo, ˆnaabhatuurira-ko amabhoko gaaye, okubhayaana giinonkwe.

Omuniibhi na obhukama bhwa Nyamuwanga

¹⁷ Bhunu Yeesu na abheeyigira bhaaye ꞉bheemukire, ku-njira, omuunu wumwi ˆnaamubhirimira, ˆnaamwifukamira. ˆNaamubhuusha ati, “Mwiyigisha owa omutima omujomu, nikoreki insonga niije ninyoore obhurame bhunu bhutakuweera?”

¹⁸ Yeesu ˆnaamusubhya ati, “Kubhaki owumbirikira ati owa omutima omujomu? Atariwo omuunu wa omutima omujomu, tari ni Nyamuwanga omwene era.”

¹⁹ Umenyere kujomu ebhiraagiro bhya Nyamuwanga, ebhyaika ati, “Waasiga okwita omuunu, waasiga okutaara ameega, waasiga okwibha, waasiga okubheeyeresha omuunu, waasiga okujimya, yaana abheebhusi bhaawo ekibharo. ”

²⁰ Omuunu uyo ˆnaaika ati, “Mwiyigisha, ebhiraagiro bhiyo bhyone kutyo nibhigwatirega okwambira mu-bhwana bhwani.”

²¹ Yeesu ˆnaamuringira, ˆnaamwenda, ˆnaamubhwira ati, “Usuyiiwe engʼana rimwi era. Genda ugushe ebhiinu bhyone kutyo bhinu uri nabhyo. Ukanyoora giiyera, uyaane abhatobhu. Ukabhayaana, owubha wiibhiikiiye mu-rwire ku-Nyamuwanga. Ukamara okukora kutyo uuje unseete.”

²² Nawe, omuunu uyo ꞉eejire oongwa kutyo, ˆnaafwa omutima, ˆnaasooka-wo asurumbaaye, kwa okubha ꞉aariga ari muniibhi muno.

²³ Yeesu ˆnaaringira abhaanu enu na enu, ˆnaabhwira abheeyigira bhaaye ati, “Eyiija okukomeera muno ku-bhaniibhi okwingira mu-bhukama bhwa Nyamuwanga.”

²⁴ Abheeyigira bhaaye mbaruguurira amangʼana gaaye. Yeesu ˆnaabhabhwira kweki ati, “Abhaana bhaani, muringire kutyo kukomeeye ku-bhaanu bhanu abheesiga obhuniibhi bhwebhwe okwingira mu-bhukama bhwa Nyamuwanga.

²⁵ Iwuuyire muno ku-ngamiya okutura mw-iwundu rya insindani okukira omuniibhi okwingira mu-bhukama bhwa Nyamuwanga!”

²⁶ Abheeyigira bhaaye mbagenderera okuruguurira muno riingʼana riyo. Mbabhuushaanya abheene na abheene ati, “Woori, raabhe ni kutyo, ni niga unu aritura okwerusibhwa?”

²⁷ Yeesu ˆnaabharingira, ˆnaabhabhwira ati, “Riyo abhaanu bhatakuritura, nawe ku-Nyamuwanga gatari kutyo, kwa okubha ku-Nyamuwanga goone kutyo agaturikana.”

²⁸ Peetero ˆnaamubhwira ati, “Iitegeeresha, eswe kisigire ebhiinu bhyone kutyo, nkikuseeta.”

²⁹ Niwe Yeesu ˆnaaika ati, “Kimari enibhabhwira ati, atariwo omuunu unu asigire iinyumba, abhamura bhaabho amwi ati abhasubhaati bhaaye, abheebhusi bhaaye, asigire abhaana, amwi ati amasambu gaaye, ku-nsonga yaani na ku-nsonga ya Amangʼana Amajomu,

³⁰ ariramira kaafu muno okukira bhiyo, akyari mu-kyaro anu. Arinyoora giinyumba, abhamura bhaabho, abhasubhaati, abheebhusi, abhaana, amasambu, na ebhinyansho bhyone arinyoora. Na mu-kyaro kinu kiriija, arinyoora obhurame bhunu bhutakuweera.

³¹ Nawe, abhaanu bha okwamba woori anu, bharibha bha ku-bhuteero. Na abhandi bhanu bhari ku-bhuteero woori anu, bharibha abha okwamba.”

Yeesu kaaikira orwa akasatu okufwa na okusuuka kwaye

³² Bhunu Yeesu na abheeyigira bhaaye ꞉bhaariga bhari mu-njira mbariinyagisha okuja Yerusareemu, Yeesu ꞉aariga abhatangatiiye. Abheeyigira bha Yeesu mbaruguura, na abhaanu abhandi bhanu ꞉bhaariga mbamuseeta, ꞉bhaariga bhayayire muno. Yeesu ˆnaabhirikira kweki abheeyigira bhaaye ekumi na bhabhiri ku-mbarika, ˆnaamba okubhabhwira ganu garimunyoora.

³³ ˆNaaika ati, “Mwitegeereshe, ekigenda Yerusareemu. Eyo niyo Omwana wa Adaamu, kaagenda okutuurwa mu-mabhoko ga abhakuru bha abhashengesi na aga abheeyigisha bha ebhiraagiro bhya Musa. Bhayo nibho abhaaja okumuramurira eetwe, na abhaaja okumusira ku-bhaanu bhanu bhatari Bhayawudi.

³⁴ Abhaanu bhayo abhaaja okumusangʼaya, okumufubhurira, okumubhuma ebhibhooko, bhakamara mbamwita. Nawe, orusuku rwa akasatu, arisuuka.”

Omukuru eetuure emwaro

³⁵ Yakobho na Yowana, abhamura bha Jebhedaayo, mbafugerera Yeesu mbamubhwira ati, “Mwiyigisha, ekikusabha ukikorere ryoneryone rinu kiraakusabhe.”

³⁶ Yeesu ˆnaabhabhuusha ati, “Omwenda nibhakorereki?”

³⁷ Mbamubhwira ati, “Bhunu uryamba okutunga mu-bhugungyo bhwawo, ekikusabha kiikare amwi na awe, owumwi ebhuryo, na owundi ebhumosi bhwawo.”

³⁸ Yeesu ˆnaabhabhwira ati, “Mutakumenya rinu omusabha. Angu, omutura okunywera ekikombe kya ebhinyansho kinu eninywera, amwi ati omutura okubhatiisibhwa obhubhatiisha bhunu enibhatiisibhwa?”

³⁹ Mbamusubhya ati, “Yee ekitura.” Yeesu ˆnaabhabhwira ati, “Mmbe, ekikombe kinu eninywera omuuja okukinywera, na obhubhatiisha bhunu enibhatiisibhwa omuuja okubhatiisibhwa.

⁴⁰ Nawe, okutuura omuunu eekare ebhuryo bhwani amwi ati ebhumosi, guyo gutari murimu gwani. Tari Nyamuwanga kaaja okutuura-wo, bhanu aramarire okutuurira-wo.”

⁴¹ Abheeyigira abhandi ekumi ꞉bheejire bhoongwa amangʼana gayo, mbaamba okubhiiyirirwa Yakobho na Yowana.

⁴² Niwe Yeesu ˆnaabhirikira abheeyigira bhoone kutyo, bhamufugere-ko. ˆNaabhabhwira ati, “Mumenyere kujomu ati abhatungi bha ebhyaro abhatunga abhaanu bheebhwe managa, na abhakuru bhayo, abhabhakosha emirimu.

⁴³ Nawe gaasiga okubha kutyo kw-imwe. Omuunu woonewoone unu keenda okubha omukuru agati weemwe, niwe abhe omujuuma weemwe.

⁴⁴ Na unu keenda okubha omutangasha agati weemwe, abhe mugaya wa bhoone kutyo.

⁴⁵ Enaaika kutyo kwa okubha, Omwana wa Adaamu woone, ꞉ateejire okukorerwa emirimu, tari ꞉eejire okukorera abhaanu na okusoosha obhurame bhwaye, insonga agombore abhaanu bhaafu.”

Yeesu kaawosha omuwofu

⁴⁶ Mmbe, mbayika Yeriko. Bhunu Yeesu na abheeyigira bhaaye ꞉bheemukire okusooka mu-musi gwa Yeriko bhari amwi na esangi enene erya abhaanu, mbanyookana na muunu wumwi riisiina ryaye ˆnaatogwa Bhatimayo, omumura wa Timayo. Omuunu uyo ꞉aariga ari omuwofu, ꞉eekaayega ku-mbarika ayeeyi na injira, ˆnaasabhiirishaga ebhiinu.

⁴⁷ Bhunu ꞉oonguuywe ati Yeesu wa Naajareeti niwe kaatura, ˆnaamura obhuraka ˆnaaika ati, “Yeesu, Omuyiiri Dawudi, nuunfwire ekigongo!”

⁴⁸ Abhaanu bhaafu bhanu ꞉bhaariga bhari ayo, mbamugaanya, mbamubhwira ati ajibhire. Nawe omwene ˆnaagenderera okwamura obhuraka, ˆnaabhirikiraga ati, “Omuyiiri Dawudi, nuunfwire ekigongo!”

⁴⁹ Niwe Yeesu ˆnaayambaara ˆnaaika ati, “Mumubhirikire aaje anu.” Mbamubhirikira, mbamubhwira ati, “Iikomeesha, yambaara! Kaakubhirikira.”

⁵⁰ ˆNeesa riikabhuuti ryaye eyo, ˆnaayambaara bhwangubhwangu, ˆnaagenda ku-Yeesu.

⁵¹ Yeesu ˆnaamubhuusha ati, “Oweenda nikukorereki?” Omuwofu uyo ˆnaamusubhya ati, “Mwiyigisha waani, eneenda noone nirore.”

⁵² Yeesu ˆnaaika ati, “Genda iika, obhwikirisha bhwawo bhwakuwosha.” Ayoayo, omuunu uyo ˆnaamba okurora, ˆnaaseeta Yeesu.