Maariko 1 - Iimuuma Iinyaaya

Yowana kaaroosisha Yeesu injira

¹ Bhunu nibhwo obhwambiro bhwa Amangʼana Amajomu aga Yeesu Kiriisitu, Omwana wa Nyamuwanga.

² Rwa kutyo ꞉gaakaamirwe mu-kitabho kya omuragi Isaaya ati, “Iitegeeresha, enituma omureeti wa iingʼana yaani imbere waawo, akutangatire akuroosishe injira.

³ Omwene kaamura obhuraka mw-ibhara ˆnaaika ati, ‘Muroosishe Raatabhugenyi injira, mwimye anu kaaja okutura!’”

⁴ Omureeti wa iingʼana uyo, ꞉aariga ˆnaatogwa Yowana Omubhatiisha. ꞉Aariga ari mw-ibhara ˆnaaraasisha abhaanu ati, “Munuge ebhikayo bhyemwe muyindukire ku-Nyamuwanga, mubhatiisibhwe, Nyamuwanga abhaabhire ebhikayo bhyemwe!”

⁵ Bhaanu bhaafu okusooka mu-musi gwa Yerusareemu na Ebhuyawudi ꞉bhaariga mbamuuja-ko, mbeegambaga ebhikayo bhyebhwe, ˆnaabhabhatiisha mu-ruuji rwa Yorodaani.

⁶ Yowana ꞉aariga ˆnaafwara gingibho ginu giroosiibhwe na obhusinga bhwa gingamiya na ꞉aariga ˆneebhoya omuchipi mu-bhukende. Na ebhyokurya bhyaye ꞉bhyariga bhiri ginsige na obhuuki.

⁷ Yowana ꞉aariga ˆnaaraasha ˆnaaika ati, “Gitari nsiku nyafu omuunu unu ari na amanaga okunkira anye kaaja okuuja iinyuma waani. Anye niteesire na kwinama okumusurumurira gingoye gya ebhikwirya bhyaye.

⁸ Anye enibhabhatiisha mu-manji, nawe omwene aribhabhatiisha na Mwoyo Omutaakatiifu.”

Yowana kaabhatiisha Yeesu

⁹ Mu-nsiku giyo, Yeesu ˆnaaja okusooka mu-musi gwa Naajareeti ya Gariraaya, ˆnaabhatiisibhwa na Yowana mu-ruuji rwa Yorodaani.

¹⁰ Bhunu Yeesu ꞉aariga neebhuka okusooka mu-manji, ˆnaarora orwire ndwatika, Mwoyo Omutaakatiifu ˆnaamwikira ˆnaasusaga rwa inguuti.

¹¹ Obhuraka mbusooka mu-rwire mbwaika ati, “Ni awe Omwana waani omwende, ni awe owunjomisha.”

¹² Ayoayo Mwoyo Omutaakatiifu ˆnaatangasha Yeesu okugenda mw-ibhara.

¹³ ˆNaabha eyo nsiku makumi gana, Sitaani ˆnaamusakyaga. ꞉Aariga ari amwi na gintyanyi gya iibhara, na bhaamaraayika okusooka ku-Nyamuwanga ꞉bhaariga mbamusakira.

Yeesu kaasora abheeyigira

¹⁴ Nsiku nyafu ngitura, Yowana ˆnaabhoywa mu-jeera. Bhunu Yowana ꞉aariga ari mu-jeera, Yeesu ˆnaagenda Gariraaya, ˆnaaraashaga Amangʼana Amajomu ga Nyamuwanga.

¹⁵ ꞉Aaraashaga ˆnaaika ati, “Akabhaga kanu ꞉kaaragirwe, kaayikire. Na obhukama bhwa Nyamuwanga bhuri ayeeyi. Mmbe munuge ebhikayo bhyemwe, mwikirishe Amangʼana Amajomu gayo.”

¹⁶ Rusuku rumwi, Yeesu ꞉aaturaga ku-ngego ya omwaro gwa Gariraaya, ˆnaarora Simooni, na Ndereya omumura waabho. ꞉Bhaariga mbatega riikokooro, kwa okubha abhabhiri bhayo ꞉bhaariga bhari bhategi.

¹⁷ Yeesu ˆnaabhabhwira ati, “Muuje, mubhe bheeyigira bhaani! Anye nibhakore mubhe bhategi bha abhaanu.”

¹⁸ Ayoayo, mbasiga riikokooro ryebhwe, mbamuseeta.

¹⁹ ˆNaagenda-wo imbere kutooto, ˆnaarora Yakobho na Yowana abhamura bha Jebhedaayo, bhari mu-bhwato, mbasobhooraga riikokooro ryebhwe.

²⁰ ˆNaabhabhirikira ayoayo, mbasiga esemwene na abhakosi bhaaye abha emirimu mu-bhwato, mbamuseeta.

Yeesu keeresha obhuturo bhwaye

²¹ Niwe Yeesu na abheeyigira bhaaye abhana bhayo, mbagenda mu-musi gwa Kaperinawumu. Bhunu orusuku rwa Insabhaato rwayikire, mbeengira mw-isunagoogi, Yeesu ˆnaamba okwiyigisha.

²² Abhaanu bhoone kutyo bhanu ꞉bhaariga mbamwitegeeresha, mbaruguurira muno ameeyigisho gaaye. ꞉Bhaaruguurire kwa okubha, amangʼana gaaye ꞉gaariga muna ga muunu unu ari na obhuturo, gatari rwa aga abheeyigisha bheebhwe abha ebhiraagiro bhya Musa.

²³ Mw-isunagoogi muyo, ꞉aariga arimo muunu wumwi awungirwe ekiwi, ˆnaamura obhuraka,

²⁴ ˆnaaika ati, “Awe Yeesu wa Naajareeti, owukyenda-koki? Waaja okukimara-wo?

²⁵ Anye nikumenyere, ni awe era Omutaakatiifu, unu usorerwe na Nyamuwanga.” Yeesu ˆnaasiiga ekiwi kiyo ˆnaaika ati, “Jibhira! Usooke ku-muunu unu!”

²⁶ Ekiwi kiyo nkigwisha omuunu uyo ansi rwa omuunu unu aguuye ekitwe, nkimwaya nkimusooka-ko.

²⁷ Abhaanu bhoone kutyo mbaruguura muno, mbabhuushaanya ati, “Niki kinu? Ni meeyigisho mayaaya ganu gari na obhuturo! Kaasiiga ebhiwi mbimuungwa!”

²⁸ Amangʼana gayo, ngaswerana mu-bhyaro bhyone kutyo ebhya ku-ngego ya omwaro gwa Gariraaya.

Yeesu kaawosha abharwaye bhaafu

²⁹ Bhunu ꞉bhaasookere mw-isunagoogi, mbagenda ewa Simooni na Ndereya.

³⁰ Bhunu ꞉bhaayikire, Yeesu ˆnaabhwirwa ati nyaabhuko Simooni arwaye, ari na omuswija amaamire ku-bhuriri.

³¹ Niwe Yeesu ˆnaafugera anu nyaabhuko Simooni ꞉aariga amaamire, ˆnaamugwata okubhoko, ˆnaamwimusha. Ayoayo nyaabhuko Simooni ˆnaawora omuswija, ˆnaamba okubhayaana ebhyokurya.

³² Orusuku ruyo keegoro, bhunu Insabhaato ꞉yaawooye, abhaanu bha mu-musi guyo mbareetera Yeesu bharwaye bhaafu, na abhaanu abhandi bhanu ꞉bhaariga bhawungirwe ebhiwi.

³³ Mmbe, bhaanu bhaafu okusooka mu-musi guyo mbasangira ewa Simooni na Ndereya ayo.

³⁴ Yeesu ˆnaawosha abhaanu bhanu ꞉bhaariga bhari na amarwara ga mbaga nyafu, ˆnaabhirimya na ebhiwi bhyafu mu-bhaanu. Ebhiwi ꞉bhyariga bhimumenyere ati ni mwana wa Nyamuwanga, ku-nsonga iyo ꞉ataabhisigiraga omwanya gwa okwaika kutyo mu-bhaanu.

Yeesu kaagenda okusaasaama bhwiyibhise

³⁵ Mwejo mu-ruguru, Yeesu ˆneemuka, ˆnaagenda enu bhaanu bhatari, ˆnaamba okusaasaama.

³⁶ Bhunu Simooni na abheejaabho ꞉bhaanyoorere atarimo mu-nyumba, mbagenda okumwagara.

³⁷ Bhunu ꞉bhaamunyoorere, mbamubhwira ati, “Bhaanu bhaafu muno, abhakwagara eyo!”

³⁸ Yeesu ˆnaabhasubhya ati, “Kigende mu-magunguri agandi ganu gari ayeeyi na enu, insonga niraashe eyo woone, kwa okubha emirimu giyo nigyo gindeetere.”

³⁹ Mmbe, ˆnaaribhata mu-kyaro kya Gariraaya kyone kutyo, ˆnaaraashaga mu-masunagoogi geebhwe, enu ˆnaabhirimya ebhiwi mu-bhaanu.

Yeesu kaawosha omuunu wa ebhigenge

⁴⁰ Rusuku rumwi, muunu wumwi unu ꞉aariga arwaye ebhigenge ˆnaaja ku-Yeesu. ˆNaamwifukamira, ˆnaamwisaasaama ati, “Uri na obhuturo obhwa okuuwosha. Ukeenda enikusabha uuwoshe nisige okubha munaabhi!”

⁴¹ Yeesu ˆnaamufwira ekigongo, ˆneemusha okubhoko kwaye ˆnaamukuunʼya-ko, ˆnaamubhwira ati, “Eneenda, nuuwore!”

⁴² Ayoayo ebhigenge mbimuwa-ko, ˆnaawora.

⁴³ Yeesu ˆnaamusoosha ayo bhwangu,

⁴⁴ ˆnaamukomeeresha ati, “Waasiga okubhwira muunu engʼana ryoneryone. Tari, nuugende ku-mushengesi akurore. Usooshe omugabho ogwa obhwiyesha bhwawo rwa kutyo Musa ꞉aaragiriiye, insonga abhaanu bhamenye ati waawora.”

⁴⁵ Nawe, omuunu wurya ˆnaasooka ayo, ˆnaamba okuraasha abhweru mu-kyaro kyone kutyo, kutyo aawosibhwa. Okukora kutyo, nkukora Yeesu ˆnaataamibhwa okwingira mu-misi egindi abhaanu mbamurora. ˆNeekara omwene era enu bhaanu bhatari, nawe abhaanu ꞉bhaagendereeye okumuuja-ko okusooka mbaara gyone kutyo.