Abharuumi 4 - Iimuuma Iinyaaya

Ekirengekanyo kya obhwikirisha bhwa Bhurayimu

¹ Mmbe woori, kyaikire kutiki raata Bhurayimu? Ni kiinuki kinu ꞉kyakorere Nyamuwanga ˆnaamubhara ati ni murengeresi?

² Raabhe Bhurayimu akabheeye abhariiywe obhurengeresi mu-meeso ga Nyamuwanga okuturira ku-bhikorwa bhyaye ebhijomu, ari na ekiinu kya okwiyeemera. Nawe, atari na kyonekyone ekya okwiyeemera mu-meeso ga Nyamuwanga.

³ Amakaamo Amataakatiifu agaaika ati, “Bhurayimu ꞉eekirisiishe Nyamuwanga, niwe Nyamuwanga ˆnaamubhara ati ni murengeresi mu-meeso gaaye.”

⁴ Mmbe, omuunu akakora emirimu, indiyo yaaye gutari musanga, tari ni kiinu kinu eesire ariywe.

⁵ Nawe omuunu unu atakwisiga ebhikorwa bhyaye, akeekirisha Nyamuwanga unu kaabharira abhakayi obhurengeresi, omuunu uyo Nyamuwanga kaamubharira obhurengeresi okuturira ku-bhwikirisha bhwaye.

⁶ Ni rwa kutyo omukama Dawudi ꞉aaikiiye giinonkwe gya omuunu unu kaabharirwa na Nyamuwanga obhurengeresi ataringiiye bhikorwa bhyaye. ꞉Aaikire ati,

⁷ “Nyakara abhaanu bhanu Nyamuwanga aabhiiye amabhiibhi, na okubhasoosisha-wo ebhikayo bhyebhwe.

⁸ Nyakara omuunu unu Raatabhugenyi Nyamuwanga atakubharira ebhikayo.”

⁹ Angu, giinonkwe giyo, ni ku-nsonga ya abhaanu bhanu bhasimukire mbasaarwa era, amwi ati giri na ku-bhanu bhasimukire bhatakusaarwa? Enibhayiitya kutyo Amakaamo Amataakatiifu agaaika ati, Nyamuwanga ꞉aabharire Bhurayimu ati ni murengeresi mu-meeso gaaye okuturira ku-bhwikirisha bhwaye.

¹⁰ ꞉Aamubhariiye obhurengeresi ebhagaki? Bhunu ꞉aariga aasaarirwee, bhunu ꞉aariga akyari kusaarwa? ꞉Aariga akyari kusaarwa!

¹¹ Okusaarwa kwaye, ꞉kyariga kiri kimenyegesho ati Nyamuwanga amubhariiye obhurengeresi okuturira ku-bhwikirisha bhwaye. Obhwikirisha bhuyo ꞉aariga ari nabhwo akyari okusaarwa. ꞉Aamubhariiye kutyo, insonga Bhurayimu abhe Ese abhaanu bhoone kutyo bhanu abheekirisha Nyamuwanga, na bhanu bhasimukire bhatakusaarwa, insonga bhoone bhabharwe ati ni bharengeresi mu-meeso ga Nyamuwanga.

¹² Nyamuwanga ꞉aakorere Bhurayimu abhe Ese abhaanu bhanu bhasimukire mbasaarwa, raabhe abheekirisha Nyamuwanga. Bhurayimu ni Ese abhaanu bhanu abheekirisha Nyamuwanga, rwa kutyo omwene ꞉eekirisiishe Nyamuwanga akyari okusaarwa.

¹³ Nyamuwanga ꞉aaragire Bhurayimu na orwibhuro rwaye ati, kaaja okubhayaana ekyaro kyone kutyo kibhe omugabho gwebhwe. Nawe Nyamuwanga ꞉ataaragire Bhurayimu kutyo, ati kwa okubha kaakora kutyo ebhiraagiro ebhyenda, tari kwa okubha ꞉aariga ˆneekirisha Nyamuwanga. Niwe Nyamuwanga ˆnaamubhara ati ni murengeresi mu-meeso gaaye.

¹⁴ Raabhe abhagwati bha ebhiraagiro nibho abhagabhi ku-Nyamuwanga, kiikirisiishe bhusa era. Na ganu Nyamuwanga ꞉aaragire goone gatariwo,

¹⁵ kwa okubha okutaamibhwa okukora kutyo ebhiraagiro ebhyenda, okureeta riisungu rya Nyamuwanga. Nawe raabhe ebhiraagiro bhitariwo, na okukaya kutariwo.

¹⁶ Kiyo nikyo ekikora ganu Nyamuwanga ꞉aaragire gaturire ku-bhwikirisha era, kwa okubha aganyoorwa okuturira ku-nema yaaye. Insonga gasoosibhwe ku-bhaanu bhoone kutyo abha orwibhuro rwa Bhurayimu, itari ku-bhanu bhagwatire ebhiraagiro bhya Musa era, tari na ku-bhanu bhari na obhwikirisha rwa obhwa Bhurayimu. Bhurayimu niwe raata, kw-iswe bhanu ekiikirisha Nyamuwanga.

¹⁷ Ni rwa kutyo Nyamuwanga ꞉aabhwiriiye Bhurayimu mu-Makaamo Amataakatiifu ati, “Naakukora ubhe Ese bhaanu bha mu-bhyaro bhyafu.” Bhurayimu ꞉aaragirwe kutyo na Nyamuwanga, ˆneekirisha Nyamuwanga unu kaasuura abhafuuye, unu kaatogora era ebhiinu bhinu bhitariwo muna bhyabheeye-wo.

¹⁸ Bhunu Bhurayimu ꞉aabhwiriiywe amangʼana gayo, ꞉yaariga ikomeeye muno okugeekirisha. Nawe ˆnaagenderera okwikirisha na okwisiga ati Nyamuwanga kaaja okumukora abhe Ese bhaanu bha mu-bhyaro bhyafu, kwa okubha Nyamuwanga ꞉aariga amubhwiriiye ati, “Abhaanu bha orwibhuro rwawo bharibha bhaafu rwa ginjota.”

¹⁹ Akabhaga kayo, Bhurayimu ꞉aariga ari na myaka egana rimwi kutya. ꞉Aariga amenyere ati, atakyatura okwibhusha kweki, na mukaaye Saara woone ꞉aariga ari mugumba. Nawe, obhwikirisha bhwaye ꞉bhutaasuuyire.

²⁰ Na ꞉aariga atari na kiitimaato kyonekyone ku-ganu Nyamuwanga ꞉aariga amuragire. Tari ꞉aagendereeye okukomeera okumwikirisha na okumugungya,

²¹ enu amenyerega ati Nyamuwanga kaatura okukora ganu ꞉aariga amuragire.

²² Okuriingʼaana na obhwikirisha bhuyo, Nyamuwanga ꞉aamubharire ati ni muunu murengeresi mu-meeso gaaye.

²³ Nawe amangʼana ganu agaaika ati, “Nyamuwanga ꞉aamubharire ati ni murengeresi mu-meeso gaaye,” ꞉gataakaamirwe ku-nsonga ya Bhurayimu omwene era,

²⁴ tari ꞉gaakaamirwe na ku-nsonga ya eswe kyone kutyo. Amangʼana gayo agakibhwira ati kikeekirisha Nyamuwanga unu ꞉aasuurire Yeesu Raatabhugenyi weeswe okusooka mu-bhafuuye, niwe eswe kyone ekibharwa na Nyamuwanga ati kiri bharengeresi.

²⁵ Nyamuwanga ꞉aasoosiishe Yeesu afwe, ku-nsonga ya ebhikayo bhyeswe, ˆnaamusuura okusooka mu-bhafuuye, insonga kibharwe ati kiri bharengeresi mu-meeso gaaye.