Abharuumi 3 - Iimuuma Iinyaaya

Nyamuwanga ni mwitongeeye ku-Bhayawudi

¹ Mmbe, okubha Omuyawudi kuri na muyeeroki? Na okusaarwa kuri na muyeeroki?

² Ni kimari ati, okubha Omuyawudi kuri na muyeero mwafu. Okwamba, Nyamuwanga ꞉aayaaye Abhayawudi amangʼana gaaye.

³ Nawe Abhayawudi abhandi ꞉bhateekirisiishe amangʼana gaaye. Mmbe woori kyaike ati Abhayawudi bhayo bhakorere Nyamuwanga woone asige obhwitongeeye bhwaye ku-mangʼana ganu ꞉aaikire?

⁴ Wuri, itari kutyo! Raabhé kutyo abhaanu bhoone kutyo ni bhabheeyi, nawe Nyamuwanga eeresiishe ati kaakora kinu kaaika. Ni rwa kutyo Amakaamo Amataakatiifu agamwaika ati, “Ukasitaakya abhaanu ku-nsonga ya ebhikayo bhyebhwe, amangʼana gaawo ni kimari. Ukabharamurira, indamuro yaawo ni ya obhurengeresi.”

⁵ Nawe woori, kyaike kutiki raabhe obhukayi bhweswe nibhwo obhutuura abhweru obhurengeresi bhwa Nyamuwanga? Angu kyaike ati Nyamuwanga atari murengeresi kwa okubha kaakiyaana ebhirusho? (Anu enaaika niri rwa abhaanu abhandi.)

⁶ Wuri, itari kutyo! Ikabheeye iri kutyo, Nyamuwanga akaturire kutiki okuramurira abhaanu mu-kyaro?

⁷ Na ekitura okwaika ati, “Raabhe ebhikayo bhyeswe ebhikora abhaanu abhandi mbamenya ati Nyamuwanga ni mwitongeeye, mbagenderera okumugungya, kubhaki woori kikyaramurirwa ati kiri abhakosi bha ebhikayo?”

⁸ Ni rwa kutyo kiraaike ati, “Kibhe nkikora ebhikayo, insonga Nyamuwanga akireetere amajomu.” Abhaanu abhandi abhakibheeyeresha ati, ekiiyigisha kutyo. Nawe anye enaaika ati, abhaanu bhayo bhoone kutyo bhariyaanwa ebhirusho okuriingʼaana na amabhiibhi geebhwe.

Atariwo omuunu omurengeresi mu-meeso ga Nyamuwanga

⁹ Mmbe, woori kyaike kutiki? Ati eswe Abhayawudi ekikira abhaanu abhandi bhanu bhatari Bhayawudi? Wuri! Kwa okubha naamarire okweresha, Abhayawudi na bhanu bhatari Bhayawudi, bhoone kutyo bhatungirwe na ebhikayo.

¹⁰ Ni rwa kutyo Amakaamo Amataakatiifu agaaika ati, “Atariwo murengeresi na wumwi mu-meeso ga Nyamuwanga.

¹¹ Atariwo muunu unu amenyere amangʼana ga Nyamuwanga, amwi ati unu kaagara okumumenya.

¹² Abhaanu bhoone kutyo bhasigire okuungwa Nyamuwanga, bhoone kutyo bhabhorere. Atariwo muunu unu kaakora amajomu, atariwo na wumwi.”

¹³ “Ebhimiro bhyebhwe bhiri rwa gimbiiyira ginu gitarimo bhafuuye, gindimi gyebhwe egyaika orubheeyi.” “Mu-minwa gyebhwe, nimwo agasooka amangʼana amaruru gari rwa obhusungu obhwa ekisoro.”

¹⁴ “Eminwa gyebhwe giijuuye ameeyiimo, na amangʼana amaruru.”

¹⁵ “Amaguru geebhwe ganguyiiye okugenda okwita.

¹⁶ Woonewoone enu abhagya, abhanyamura mbasikya.

¹⁷ Bhatakumenya okwikara bhari na omurembe na abheejaabho.”

¹⁸ “Bhatakwigana okukora kutyo Nyamuwanga keenda.”

¹⁹ Mmbe, eswe kimenyere ati, amangʼana goone kutyo ganu gakaamirwe mu-Makaamo Amataakatiifu, ꞉gaakaamirwe ku-nsonga ya abhaanu bhanu ꞉bhaayaaywe ebhiraagiro bhya Musa. Ebhiraagiro ꞉bhyatuuywe-wo, insonga abhaanu bhoone kutyo bhaasiga okubha na ryoneryone erya okwibhagira, bhunu Nyamuwanga ariramurira ekyaro.

²⁰ Atariwo muunu woonewoone unu aribharirwa obhurengeresi na Nyamuwanga ku-bhugwati bhwaye obhwa ebhiraagiro. Emirimu gya ebhiraagiro bhiyo, ni kweresha ati abhaanu bhoone kutyo ni bhakosi bha bhikayo.

Obhwikirisha nibhwo injira ya okubharirwa obhurengeresi

²¹ Nawe woori, injira ya Nyamuwanga eya obhurengeresi ituuywe abhweru. Woori abhaanu abhabharirwa obhurengeresi bhatagwatire ebhiraagiro bhya Musa. Ebhiraagiro bhiyo na amakaamo ga abharagi gatuuye abhweru amangʼana gayo.

²² Obhurengeresi bhunu obhusooka ku-Nyamuwanga okuturira ku-kwikirisha Yeesu Kiriisitu. Abhaanu bhoone kutyo bhanu abheekirisha Yeesu Kiriisitu, Nyamuwanga kaabhabhara ati ni bharengeresi mu-meeso gaaye. Omwene atakusoroora muunu,

²³ kwa okubha abhaanu bhoone kutyo bhakorere ebhikayo, ebhikorwa bhyebhwe bhitakweresha obhugungyo bhwa Nyamuwanga.

²⁴ Nawe, okuturira ku-nema ya Nyamuwanga, bhabharirwe ati ni bharengeresi mu-meeso gaaye. Bhatuuriibhwe okusooka mu-bhikayo bhyebhwe okuturira ku-Kiriisitu Yeesu.

²⁵ Nyamuwanga ꞉aakorere Yeesu abhe ekimweso kya okugwatanya abhaanu na Nyamuwanga, insonga abhaanu bhaabhirwe ebhikayo bhyebhwe, bhakeekirisha ati Yeesu ꞉aafuuye ku-nsonga yeebhwe. Nyamuwanga ꞉aakorere kutyo, insonga eereshe ati omwene ni murengeresi, kwa okubha ꞉aasimbiirire, ꞉ataabhayaaye ebhirusho ku-bhikayo bhinu ꞉bhaariga bhatangatire okukora kara.

²⁶ ꞉Aakorere kutyo, insonga eereshe obhurengeresi bhwaye ku-kabhaga kanu, ku-bhaanu bhoone kutyo bhanu abheekirisha Yeesu, abhabharire obhurengeresi mu-meeso gaaye.

²⁷ Riingʼana riyo erikigaanya okwikumangya? Yee, kwa okubha eswe kyone kitakubharwa ati kiri bharengeresi mu-meeso ga Nyamuwanga okuturira ku-bhugwati bhwa bhiraagiro bhya Musa, tari ni kuturira ku-kwikirisha Yeesu era.

²⁸ Kimenyere ati Nyamuwanga kaabhara omuunu ati ni murengeresi okuturira ku-kwikirisha Yeesu era, atagwatire bhiraagiro bhiyo.

²⁹ Angu, Nyamuwanga ni wa Bhayawudi era? Atari wa bhanu bhatari Bhayawudi bhoone? Nyamuwanga ni wa Abhayawudi na bhanu bhatari Bhayawudi!

³⁰ Ariwo Nyamuwanga wumwi era, na iriwo njira yimwi era eya okubharira abhaanu obhurengeresi mu-meeso gaaye. Abhayawudi na bhanu bhatari Bhayawudi, bhoone kutyo abhabharwa na Nyamuwanga ati ni bharengeresi okuturira ku-kwikirisha Yeesu era.

³¹ Angu, okukomeeresha okwikirisha Yeesu, ni kwaika ati ebhiraagiro bhya Musa bhitakusakira kiinu? Wuri, itari kutyo! Nawe kikeekirisha Yeesu, niwe ekibha nkikuumisha goone kutyo ganu ebhiraagiro bhiyo ebhyaika.