Abhakorosaayi 4 - Iimuuma Iinyaaya

¹ Emwe bharaatabhugenyi, mwone mukoreraga abhagaya bheemwe amangʼana amajomu kutyo eyeendwa. Muyiite ati emwe mwone muri na Esobhugenyi mu-rwire.

Amaragiriro agandi

² Musaasaamega nsiku gyone kutyo, mwiyangariiye enu mukumya Nyamuwanga.

³ Mukisabhire eswe kyone, insonga Nyamuwanga akiigurire injira ya okuraasha riingʼana ryaye, na okuraasha amangʼana ga Kiriisitu ganu kara ꞉gaariga gabhisirwe. Anye nibhoyerwe ku-nsonga ya okuraasha amangʼana gayo.

⁴ Munsabhirega ku-Nyamuwanga ati nibhe na amanaga ga okuraasha abhweru amangʼana gayo rwa kutyo eyeendwa.

⁵ Mubhe na obhwenge mu-bhaanu bhanu bhakyari kwikirisha Yeesu. Riibhaga rinu muri naryo murikorere kujomu emirimu.

⁶ Murome kujomu na abhaanu, amangʼana geemwe gabhe na omwaya, insonga mumenye okusubhya abhaanu bhoone kutyo bhanu abhabhabhuusha.

Amangʼana ga okuragana

⁷ Omukiriisitu weejaasu omwende Tukiko, kaaja okubhabhwira amangʼana gaani goone kutyo, omwene ni mujuuma mwitongeeye unu ekikora nawe emirimu gya Raatabhugenyi.

⁸ Enimutuma kw-imwe, insonga abhabhwire ganu gari kw-iswe enu, awooyereshe na emitima gyemwe.

⁹ Ariija na Wonesimo, Omukiriisitu weejaasu omwende, woone ni muunu mwitongeeye, Wonesimo unu ni muunu wa ewaanyu eyo. Bhariija, bharibhabhwira amangʼana goone kutyo ganu agakoreka enu.

¹⁰ Arisitariko unu abhoyerwe amwi na anye mu-jeera anu, na Maariko omubhyara wa Bharinaabha abhabhakeesha. Naabhabhwiriiye amangʼana ga Maariko. Mmbe, bhunu ariija kw-imwe eyo, mumuramire kujomu.

¹¹ Yeesu unu kaatogwa Yuusito, woone kaabhakeesha. Mu-Bhayawudi bhanu bheekirisiishe Yeesu Kiriisitu, bhanu era, nibho abhakora emirimu gya obhukama bhwa Nyamuwanga amwi na anye. Abhansakira muno.

¹² Epafura, omujuuma wa Kiriisitu Yeesu, omuunu wa ewaanyu eyo, kaabhakeesha. Akomeeye muno okubhasabhira insonga mukomeere, mugenderere okusimbiira mu-bhwikirisha bhwemwe, mumenye kujomu ganu Nyamuwanga keenda.

¹³ Enimurora ati, ni mukomeeye muno ku-mirimu ku-nsonga yeemwe na abhaanu bha mu-misi gya Rawodiikiya na Yeerapoori.

¹⁴ Ruuka omuragusi weeswe omwende, na Dema, abhabhakeesha.

¹⁵ Mwone mukikeesishe Abhakiriisitu bheejaasu abha Rawodiikiya ayo. Mukikeesishe Nimfwa, na riikanisa rinu erisangira ewaaye.

¹⁶ Mukamara okusoma iinyarubha inu, muyisire ku-Bhakiriisitu bha riikanisa rya Rawodiikiya insonga bhoone bhayisome. Emwe mwone mugege iinyarubha yeebhwe inu ꞉naabhatumiiye muyisome.

¹⁷ Mubhwire Arikipo ati, eekomeeshe amare kujomu emirimu ginu Raatabhugenyi ꞉aamuyaaye.

¹⁸ Ni anye Pawuro enikaama obhukeesha bhunu na okubhoko kwani omwene. Muyiite ati nibhoyerwe mu-jeera. Iinema ya Nyamuwanga ibhe amwi na emwe.