Abhakorosaayi 3 - Iimuuma Iinyaaya

¹ Mmbe, kwa okubha woori musuukire amwi na Kiriisitu, mwagare amangʼana ga mu-rwire, enu Kiriisitu ari, eekaaye orubhaara rwa ebhuryo orwa Nyamuwanga.

² Mwiganiirishe amangʼana ganu gari iiguru, musige okwiganiirisha aga mu-kyaro munu,

³ kwa okubha obhusimukwa bhwemwe obhwa ebhikayo bhufuuye. Woori obhurame bhwemwe bhubhisirwe amwi na Kiriisitu ku-Nyamuwanga.

⁴ Kiriisitu niwe obhusimukwa bhwa obhurame bhwemwe. Bhunu arituurwa abhweru, niwe emwe mwone muriyimbana nawe ku-bhugungyo bhwaye.

⁵ Mmbe woori, musige kimwi amangʼana goone kutyo aga mu-kyaro anu ganu gari mu-mitima gyemwe, obhutaasi bhwa ameega, obhujabhi, amajomerwa amabhiibhi, obhwiganiirisha obhubhiibhi, na okwenda obhuniibhi. Okwenda obhuniibhi okurengekanyibhwa na ekikayo kya okuramya ebhisusano.

⁶ Amangʼana rwa gayo, nigo agakora Nyamuwanga abhiiyirirwe abhaanu bhanu bhatakumuungwa.

⁷ Emwe mwone kara ꞉mwariga mukora gayogayo, bhunu ꞉mwariga mukyatungirwe nago.

⁸ Nawe woori musige kimwi riisungu, ekiyirimuko, obhukayi, amafumo na amangʼana ganu gateesire emwe okwaika.

⁹ Mwasiga kujimyanya, kwa okubha mufuurire obhusimukwa bhwemwe obhwa ebhikayo amwi na ebhikorwa bhyabhwo,

¹⁰ woori mufwaye obhurame obhuyaaya. Nyamuwanga omwene niwe ꞉aabhumbire obhurame bhuyo, kaagenderera okubhuroosha kw-imwe insonga mususane muno nawe, na mumumenye kujomu.

¹¹ Mmbe woori, itariwo ati unu ni Muyawudi amwi ati atari Muyawudi, unu asaarirwe amwi ati atasaarirwe, ni mwikasi amwi ati ni mugenyi, ni mugaya amwi ati atari mugaya. Kiriisitu ni mukuru okukira goone kutyo, na ari mu-goone kutyo.

¹² Woori, kwa okubha emwe mubheeye bhasorwa bha Nyamuwanga, abhataakatiifu bhanu mwenderwe, mubhe na emitima gya ekigongo, mubhe na emitima emijomu, mwituure emwaro, mubhe bhafura na musimbiire.

¹³ Mugegeranaga na okwabhirana, raabhe omuunu ari na riingʼana ku-weejaabho, amwabhire rwa kutyo Raatabhugenyi ꞉aabhaabhiiye emwe.

¹⁴ Riingʼana riinene okukira gayo goone kutyo ni rinu ati mwendane, kwa okubha obhwendi nibhwo obhubhagwatanya mwone kutyo amwi ku-bhumwi bhwa ekimari.

¹⁵ Omurembe gwa Kiriisitu gutunge mu-mitima gyemwe, kwa okubha mubheeye mubhiri gumwi, mubhirikiiywe insonga mwikare muri na omurembe, mukumya Nyamuwanga.

¹⁶ Riingʼana rya Kiriisitu ribhe ryafu mu-mitima gyemwe. Mwiyigishaanye, na okugonyana muri na obhwenge bhwone kutyo. Okuturira ku-nema, mwimbire Nyamuwanga okusooka mu-myoyo, mutangasibhwa na Mwoyo Mutaakatiifu. Mwaikanirega mu-jabhuri, na ameembo agandi goone kutyo aga okukumangya Nyamuwanga.

¹⁷ Goonegoone ganu omwaika amwi ati ganu omukora, mugakorega okuturira kw-isiina rya Raatabhugenyi Yeesu, mukumya Raata Nyamuwanga okuturira kw-isiina riyo.

Okurama bhujomu mu-nyumba gya Abhakiriisitu

¹⁸ Emwe abhagasi abhagabhurwa, muungwe abharume bheemwe, rwa kutyo eyeendwa ku-bhaanu bhanu abheekirisha Raatabhugenyi Yeesu.

¹⁹ Abharume mwone, mwende abhagasi bheemwe, musige okubhawunuka.

²⁰ Emwe abhaana mwone, muungwe abheebhusi bheemwe ku-mangʼana goone kutyo, kwa okubha okukora kutyo okujomisha Raatabhugenyi Yeesu.

²¹ Emwe abheebhusi bha ekirume, mwasiga okusindira abhaana bheemwe, insonga bhaasiga okufwa emitima.

²² Abhagaya mwone, muungwe bheesobhugenyi abha mu-kyaro anu ku-mangʼana goone kutyo. Mwasiga kukora kutyo ku-kabhaga kanu abhabha bhariwo mbabharora era insonga mubheekumbe, tari mubhayaane ekibharo okusooka mu-mitima, kwa okubha omukora ganu Raatabhugenyi keenda.

²³ Ryoneryone rinu omukora, murikore na mutima gumwi, rwa bhanu omukorera Raatabhugenyi emirimu, mwasiga kukora rwa bhanu abhakorera bhaanu era.

²⁴ Muyiite ati Kiriisitu niwe Raatabhugenyi unu omukorera, kaaja okubhayaana omugabho gunu aragire.

²⁵ Nawe woonewoone unu kaakora amabhiibhi, ariramurirwa okuriingʼaana na amabhiibhi gaaye, kwa okubha Nyamuwanga atakusoroora muunu woonewoone.