Abhakorosaayi 2 - Iimuuma Iinyaaya

¹ Eneenda mumenye kutyo eniikomeesha ku-mirimu ku-nsonga yeemwe, na ku-nsonga ya abhaanu bha mw-irara rya Rawodiikiya, na abhaanu abhandi bhoone kutyo bhanu bhakyariga okundora.

² Enikora kutyo insonga mukomeere mu-mitima na okugwatanywa mu-bhwendi. Eneenda munyoore obhumenyi bhwone kutyo bhunu obhubhakora mumenye ekimari. Niwe omuuja okumenya imbisike ya Nyamuwanga inu ꞉yaariga ibhisirwe okwambira kara, okumenya Kiriisitu omwene.

³ Ku-Kiriisitu niwe obhwenge na obhumenyi bhwone kutyo bhwiyibhisire.

⁴ Enibhakaamira gayo, insonga mwasiga okujimibhwa amwi ati kukongibhwa na muunu woonewoone.

⁵ Raabhé kutyo nitari amwi na emwe eyo, nawe mu-mutima gwani niri amwi na emwe. Nijomeeywe kwa okubha nunguuywe amangʼana kutyo muri na omugambirano na kutyo omugenderera okukomeera mu-bhwikirisha bhwemwe ku-Kiriisitu.

Obhurame obhuyaaya bhwa Ekikiriisitu

⁶ Kwa okubha woori mwikirisiishe Kiriisitu Yeesu okubha Esobhugenyi, mugenderere okuyimbana nawe.

⁷ Musire emisi ku-Kiriisitu, mukomeere mu-bhwikirisha rwa kutyo ꞉mweeyigiiye. Na ebhaga ryone kutyo mubhe bhaanu bhanu omukumya.

⁸ Mwiyangarire omuunu aasiga okubhayabhya na ameeyigisho gaaye ganu gatari na bhwera, ganu agayabhya, ni meeganiirisho ga abhaanu era. Gayo ni meeyigisho ga emyoyo ginu egitunga ekyaro kinu, gatari ga Kiriisitu.

⁹ Enaaika kutyo kwa okubha obhuswereene bhwa Nyamuwanga bhwone kutyo bhuri abhweru okuturira ku-Yeesu, ku-mubhiri gwaye.

¹⁰ Na mu-kuyimbana kwemwe na Kiriisitu munyoorere obhuswereene bhwone kutyo. Omwene niwe omutungi iiguru ya abhatungi, na abha obhuturo bhoone kutyo.

¹¹ Mu-kuyimbana kwemwe na Kiriisitu ꞉mwasaarirwe, ꞉mweerusiibhwe okusooka mu-bhusimukwa bhwa ebhikayo, nawe insaaro iyo itakukorwa na bhaanu, tari ni nsaaro ya Kiriisitu mu-myoyo.

¹² Bhunu ꞉mwabhatiisiibhwe, ꞉mwabhiikirwe amwi na Kiriisitu. Mu-kubhatiisibhwa kuyo, musuuka amwi nawe, kwa okubha ꞉mweekirisiishe amanaga ga Nyamuwanga unu ꞉aamusuurire okusooka mu-bhafuuye.

¹³ Emwe ꞉mwariga mufuuye mu-myoyo gyemwe ku-nsonga ya ebhikayo na okurema okusaarwa kwemwe. Nawe Nyamuwanga ꞉aabhayaaye obhurame amwi na Kiriisitu bhunu ꞉aakyabhiiye ebhikayo bhyeswe bhyone kutyo.

¹⁴ Okuturira ku-Yeesu okukifwira ku-musarabha, ꞉aariyire riisiiri rya ebhikayo bhyeswe rinu ꞉ryakisitaakyaga, ˆnaarisoosha-wo kimwi ˆnaaribhumiirira ku-musarabha.

¹⁵ Okuturira ku-musarabha, Nyamuwanga ꞉aateesiishe abha obhutungi, obhutungi bhwebhwe, na abha obhuturo, obhuturo bhwebhwe, ˆnaabhayiga ari na orugirigiri, ˆnaabhaswasha abhweru.

¹⁶ Mmbe, omuunu woonewoone aasiga okubharamurira ku-nsonga ya ebhyokurya, bhinu omunywa, nsikukuru gya iidiini, nsikukuru gya okubhoneka kwa okwesi, amwi Nsabhaato.

¹⁷ Gayo goone kutyo ꞉gaariga gari erengeesi era, erya ganu gakeejire. Na ganu ꞉geejire ni Kiriisitu omwene.

¹⁸ Bhariwo abhaanu ku-kubharora abhakomeeresha muno amangʼana ga okwituura emwaro, na ga okuramya bhaamaraayika. Mwasiga okubheekirisha bhataaja okubhateesha ekiyaanwa kyemwe ekya kajaanende. Abhaanu bhayo abheeyeema ati, abharora amangʼana gayo mu-bhiroro. Nawe, obhwiganiirisha bhwebhwe obhubhiibhi obhwa ku-kyaro kunu, bhubhatengʼoasiishe.

¹⁹ Abhaanu bhayo bheeyawuuye ku-Kiriisitu unu kaatangasha riikanisa, rwa omutwe ku-mubhiri. Niwe kaariisha na okugwatanya amwi ebhigwatanya na emisiiya gyone kutyo. Omubhiri gwone kutyo ngukura kujomu rwa kutyo Nyamuwanga keenda.

²⁰ Mmbe, raabhe ꞉mwafuuye amwi na Kiriisitu, musigana na ameeyigisho aga okwamba aga ekyaro kinu, woori kubhaki mubhe rwa abhaanu bha mu-kyaro munu? Kubhaki omuseeta ebhiraagiro bhinu ati,

²¹ “Mwasiga kugwata kinu! Mwasiga kukuunʼya-ko kiyo! Mwasiga okurabha kirya!”

²² Gayo goone kutyo ni maragiriro na ameeyigisho ga abhaanu era, bhiyo ni bhiinu bhinu bhikamara okuriibhwa bhitakyari na mirimu kweki.

²³ Abhaanu abharora abhaanu bhanu abhaseeta ebhiraagiro bhiyo ati bhari na obhwenge. Abhaseeta ebhiraagiro bhinu bheetuuriiye-wo abheene, okwituura emwaro ku-mangʼana ga anja na okutunga emibhiri gyebhwe bhururu. Nawe ebhiraagiro bhiyo bhitakutura okuyinga amajomerwa amabhiibhi aga emibhiri.