Abhakorosaayi 1 - Iimuuma Iinyaaya

Obhukeesha

¹ Iinyarubha inu eniyikaama anye Pawuro, omutumwa wa Kiriisitu Yeesu ku-ganu Nyamuwanga keenda, niri amwi na Timoteeyo, Omukiriisitu weejaasu mu-bhwikirisha.

² Ekibhakaamira emwe abhataakatiifu, bhanu mwikaaye mu-musi gwa Korosaayi, emwe Abhakiriisitu bheejaasu abheetongeeye mu-kuyimbana kweswe na Kiriisitu. Iinema na omurembe okusooka ku-Raata Nyamuwanga, gibhe amwi na emwe.

Obhusaasaami na ginkumyo ku-Nyamuwanga

³ Ekikumya Nyamuwanga esemwene Raatabhugenyi weeswe Yeesu Kiriisitu kiyana, bhunu ekibhasabhira.

⁴ Ekikora kutyo, kwa okubha kyunguuywe kutyo omwikirisha Kiriisitu Yeesu na okwenda Abhakiriisitu bhoone kutyo.

⁵ Okwikirisha na okwenda kwemwe kuyo, okureetwa na obhwisige bhwemwe ati omuuja okuramira giinonkwe ginu Nyamuwanga abhatuuriiye-wo mu-rwire. ꞉Mwoonguuywe amangʼana ga obhwisige bhuyo, bhunu ꞉mwaraasisiibhwe iingʼana ya ekimari, gayo nigo Amangʼana Amajomu.

⁶ Amangʼana Amajomu gayo rwa kutyo ꞉gaaraasiibhwe kw-imwe, nikwo kutyo agaswerana mu-kyaro kyone kutyo. Agagenderera okukora abhaanu bhayindukire Nyamuwanga, rwa kutyo ꞉gaakorere kw-imwe okwambira orusuku runu ꞉mwoonguuywe amangʼana ga iinema ya Nyamuwanga na okumenya kujomu ekimari kyayo.

⁷ Emwe ꞉mweeyigiiye Amangʼana Amajomu gayo okusooka ku-Epafura. Omwene kaakora emirimu na eswe, ni mujuuma weejaasu omwende, ni muunu mwitongeeye wa Kiriisitu ku-nsonga yeemwe.

⁸ Aakibhwira amangʼana ga obhwendi bhwemwe bhunu obhusooka ku-Mwoyo Omutaakatiifu.

⁹ Ku-nsonga iyo, ekibhasabhira kiyana, okwambira orusuku runu ꞉kyoonguuywe amangʼana geemwe. Ekisaasaama ku-Nyamuwanga abhayaane obhumenyi bhwone kutyo ku-ganu omwene keenda. Abhayaane obhwenge bhwone kutyo na obhumenyi bhunu obhusooka ku-Mwoyo Omutaakatiifu.

¹⁰ Akore kutyo insonga mubhe na obhuturo bhwa okukora ganu Raatabhugenyi Yeesu keenda, mumujomisha ku-mangʼana goone kutyo. Omuuja okumujomisha ku-bhikorwa bhyemwe ebhijomu, enu mugenderera okumenya muno Nyamuwanga.

¹¹ Ekisaasaama ku-Nyamuwanga abhakomeeshe na amanaga gaaye amaafu muno aga okuruguusha, insonga mubhe na obhuturo bhwa okurindirira na okusimbiira goone kutyo, enu mujomeeywe,

¹² mukumyaga Raata Nyamuwanga, unu abhayaaye obhuturo bhwa okugabha amwi na abhataakatiifu bhaaye mu-bhukama bhwaye, obhukama bhuyo bhutarimo kisuute.

¹³ Akyerusiishe okusooka mu-bhukama bhwa ekisuute, ˆnaakingʼaanyisisha mu-bhukama bhwa Omwana waaye omwende.

¹⁴ Okuturira ku-Mwana waaye, kituuriibhwe, na ebhikayo bhyeswe bhyabhiiywe.

Obhuturo bhwa Kiriisitu

¹⁵ Kiriisitu keeresha abhweru kutyo Nyamuwanga ari, raabhé kutyo Nyamuwanga omwene atakurorwa. Omwene niwe omwibhurwa wa okwamba unu ari na obhuturo iiguru ya ebhibhumbwa bhyone kutyo.

¹⁶ Okuturira ku-mwene, ebhiinu bhyone kutyo ꞉bhyabhumbirwe, bhinu bhiri ku-rwire na bhinu bhiri ku-kyaro, bhinu ebhirorwa na bhinu bhitakurorwa, bhabhe bhakama amwi ati abha obhutungi, abha obhuturo amwi ati abha amanaga. Bhyone ꞉bhyabhumbirwe okuturira ku-mwene na ꞉bhyabhumbirwe ku-nsonga yaaye.

¹⁷ Omwene ꞉aabheeye-wo ebhiinu bhyone kutyo bhikyari kubhumbwa, niwe kaagwatanya ebhiinu bhyone kutyo amwi nawe.

¹⁸ Omwene niwe omutangasha omukuru wa riikanisa. Na niwe obhwambiro bhwaryo, kwa okubha ꞉aariga ari owa okwamba okusuuka mu-bhafuuye, insonga abhe mutungi iiguru wa ebhiinu bhyone kutyo.

¹⁹ Nikwo kutyo, Nyamuwanga ꞉eendere ati obhukuumiiye bhwaye bhwone kutyo bhwikare ku-Mwana waaye.

²⁰ Na okuturira ku-Kiriisitu agwatanye ebhiinu bhyone kutyo na omwene, ebhya ku-kyaro kunu na bhinu bhiri mu-rwire. ꞉Aakorere kutyo insonga areete omurembe okuturira amaanyinga ga Kiriisitu ganu ꞉geetikire ku-musarabha.

²¹ Kara ayo, emwe mwone ꞉mwariga muri areera na Nyamuwanga. ꞉Mwariga muri bhasoko bhaaye ku-nsonga ya obhwiganiirisha na ebhikorwa ebhibhiibhi, nawe woori abhagwatanyiishe nawe,

²² okuturira ku-mubhiri gwa Kiriisitu, ku-kufwa kwaye, ꞉aabhagwatanyiishe insonga abhareete mu-meeso gaaye muri bhaanu bhataakatiifu, mutari na katogosi amwi kwaikwa kubhiibhi.

²³ Nawe omwendwa mugenderere na obhwikirisha, musimbiire, mubhe na amanaga. Mwasiga kwikirisha okusiga obhwisige bhunu ꞉mwanyoorere, ku-kabhaga kanu ꞉mwoonguuywe Amangʼana Amajomu, ganu ꞉gaaraasiibhwe ku-bhaanu bhoone kutyo bha mu-kyaro anu. Anye Pawuro nibheeye mujuuma waago.

Emirimu gya Pawuro mu-makanisa

²⁴ Woori enijomererwa ebhinyansho bhinu eninyoora ku-nsonga yeemwe. Kweki, enikuumisha ku-mubhiri gwani ebhinyansho bhinu ꞉bhyasuuyire ku-Kiriisitu ku-nsonga ya omubhiri gwaye, omubhiri guyo nigwo riikanisa ryaye.

²⁵ Okuriingʼaana na obhukene bhwaye, Nyamuwanga antuuye-wo nibhe mujuuma wa riikanisa ryaye, insonga nibharaasishe emwe amangʼana gaaye ku-bhukuumiiye bhwago.

²⁶ Amangʼana gayo nigo imbisike yaaye inu ꞉yaariga ibhisirwe ku-bhaanu bha kara na kara bhoone kutyo. Nawe woori Nyamuwanga atuuriiye abhweru abhataakatiifu bhaaye.

²⁷ Nyamuwanga ꞉aakorere kutyo kwa okubha ꞉eendaga emwe bhanu mutari Bhayawudi mumenye obhugungyo bhwa okuruguusha bhwa imbisike iyo. Imbisike eyeene ni inu ati, Kiriisitu ari mw-imwe, na niwe kaabhayaana obhwisige bhwa okuyimbana nawe ku-bhugungyo bhwa Nyamuwanga.

²⁸ Ekiraasha amangʼana ga Kiriisitu ku-bhaanu, nkigonya na okwiyigisha abhaanu bhoone kutyo okuturira ku-bhwenge bhwone kutyo. Ekikora kutyo insonga kireete abhaanu bhoone kutyo mu-meeso ga Nyamuwanga bhari bhaanu bhanu bhakurire ku-kuyimbana kwebhwe na Kiriisitu.

²⁹ Kyakora enikomeera okukora emirimu okuriingʼaana na amanaga amanene ga Kiriisitu ganu anaaye.