Abhagaraatiya 6 - Iimuuma Iinyaaya

Okusakirana na okukora amajomu

¹ Bhakiriisitu bheejaasu, mukamenya ati oweejaanyu akorere ekikayo ekirebhe, emwe bhanu mukomeeye ku-mangʼana ga Nyamuwanga, mumusubhye ku-bhwikirisha mufuraaye. Nawe mumuje-ko mwiyangariiye, mwasiga okukomwa muyindukira ku-ntungwa gyaye.

² Musakiranega amangʼana geemwe amasito. Mukakora kutyo omubha mukuumisha ebhiraagiro bhya Kiriisitu.

³ Omuunu woonewoone unu keerora ati kaakira abheejaabho, enu itari kutyo, keejimya era.

⁴ Omuunu omwene ˆneeringire akatungiiye kaaye. Raabhe kaakora amajomu, ayo niwe kaatura okwikumangya ku-mangʼana amajomu ganu kaakora. Nawe aasiga kwirengekanya na ganu owundi kaakora,

⁵ kwa okubha abhaanu wumwiwumwi arigega omujigo gwaye omwene.

⁶ Eyeendwa omwiyigira wa Riingʼana rya Nyamuwanga, agabhire omwiyigisha waaye ebhiinu ebhijomu bhinu kaanyoora.

⁷ Musige okwijimya, Nyamuwanga atakusangʼaywa, kwa okubha kyonekyone kinu omuunu kaayamba, nikyo arigesa.

⁸ Omuunu unu kaaseeta amajomerwa ga omubhiri, okugesa kwaye ni majomerwa gayo nigo garimumara-wo. Nawe unu kaaseeta Mwoyo Omutaakatiifu, okugesa kwaye, arinyoora obhurame bhunu bhutakuweera okusooka ku-Mwoyo Omutaakatiifu.

⁹ Mmbe woori, kyasiga kuyigwa okukora amajomu! Raabhe kikagenderera kutyo, ekiija okugesa amajomu, akabhaga kariyika-wo.

¹⁰ Okuriingʼaana na kutyo ekinyoora omwanya, kikorere abhaanu bhoone kutyo amajomu, nawe munomuuno kikorere Abhakiriisitu bheejaasu.

Ameeresho ga okumariisha

¹¹ Muringire kutyo enikaama na nyuguta nene, woori enikaama na okubhoko kwani omwene.

¹² Abhaanu bhanu abhabhasingʼiirisha okusaarwa, abhakora kutyo insonga bhanyoore ekibharo mu-Bhayawudi. Abhoobhaya bhaasiga okunyansibhwa ku-nsonga ya okuraasha amangʼana iiguru ya okufwa kwa Kiriisitu ku-musarabha.

¹³ Na bhanu bhasaarirwe abheene, bhatakugwata bhiraagiro bhyone kutyo. Kinu abheenda, emwe musaarwe era, insonga bheekumangishe okusaarwa kwemwe.

¹⁴ Nawe anye nitakwenda okwikumangisha engʼana ryoneryone, tari okufwa kwa Raatabhugenyi weeswe Yeesu Kiriisitu ku-musarabha. Okuturira okufwa kwaye, amangʼana goone kutyo aga ku-kyaro kinu ku-anye gaabhusiishe-mo omuta. Anye noone ku-mangʼana gayo eniibhara ati nirafuuye na Yeesu ku-musarabha.

¹⁵ Okusaarwa amwi ati okusiga okusaarwa, kutakusakira kiinu. Kinu ekyendwa ni okukorwa bhuya mu-mutima na Nyamuwanga.

¹⁶ Omurembe na ekigongo kinu ekisooka ku-Nyamuwanga bhibhe na abhaanu bhoone kutyo bhanu abhaangarira ekimari kiyo, bhayo nibho abhaanu bha Nyamuwanga.

¹⁷ Mmbe, okwambira woori omuunu woonewoone aasiga okunyansha kweki, kwa okubha anye niri na giingʼofu ku-mubhiri gwani ku-nsonga ya okukorera Yeesu emirimu.

¹⁸ Bhakiriisitu bheejaasu, iinema ya Raatabhugenyi weeswe Yeesu Kiriisitu ibhe amwi na emyoyo gyemwe. Amina.