Abhagaraatiya 5 - Iimuuma Iinyaaya

Obhwiyagaaro bhwa Omukiriisitu

¹ Kiriisitu ꞉aakiyaaye obhwiyagaaro, insonga kiikare kiiyagaarire. Mmbe woori, mwikomeeshe, mwasiga okwikirisha okusubha kweki mu-bhugaya bhwa ebhiraagiro.

² Mwitegeereshe kinu anye Pawuro enibhabhwira! Raabhe omwikirisha okusaarwa, ku-nsonga ya okugwata ebhiraagiro bhya Musa, ayo insonga ya emwe okubha na Kiriisitu itariwo.

³ Enibhabhwirira abhweru kweki ati, omuunu woonewoone unu kaasaarwa, keendwa agwate na ebhiraagiro bhya Musa bhyone kutyo.

⁴ Raabhe omwenda mubharwe ati muri bharengeresi ku-Nyamuwanga okuturira ku-bhugwati bhwa ebhiraagiro bhya Musa, mumenye ati mwiyawuuye ku-Kiriisitu, na muri areera na iinema ya Nyamuwanga.

⁵ Nawe eswe, kiri na obhwisige okuturira ku-bhuturo bhwa Mwoyo Omutaakatiifu ati, Nyamuwanga kaaja okukibhara ati kiri bharengeresi, okuturira obhwikirisha bhweswe ku-Yeesu.

⁶ Enaaika kutyo, kwa okubha kikabha kiyimbeene na Kiriisitu Yeesu, okusaarwa na okusiga okusaarwa kutakusakira kyonekyone kw-iswe. Kinu ekyendwa ni obhwikirisha bhweswe bhunu obhurorerwa mu-kwenda kweswe abhaanu abhandi.

⁷ Ku-bhwambiro, mwariga mugenda kujomu! Ni niga kweki unu abhagaanyiishe okugwata ameeyigisho ga ekimari?

⁸ Obhukongya bhuyo bhutakusooka ku-Nyamuwanga, unu abhabhirikiiye.

⁹ Nawe mumenye ati, ameeyigisho ga bhanu abhabhakongya gayo, gari rwa kutyo, “Ekimera kitooto era, ekitundusha ginfu gyone kutyo!”

¹⁰ Okuriingʼaana na obhuyimbani bhwemwe na Raatabhugenyi Yeesu enibheesiga ati, mutakuuja kwiganiirisha kundi. Nawe omuunu unu kaabhajimya, kaaja okuramurirwa.

¹¹ Bhakiriisitu bheejaasu, raabhe eniraasha ati abhaanu bhasaarwe, kubhaki woori Abhayawudi abhanyansha? Nikabheeye nindaasha abhaanu okusaarwa, okuraasha kwani iiguru ya amangʼana ga okufwa Yeesu ku-musarabha, kutaakakorere Abhayawudi bhambiyirirwe.

¹² Abhaanu bhanu abhabhakora mwitimaata ku-mangʼana ga insaaro, nyakara bhaakeetemere emitima gyebhwe abheene!

Okwikara na Mwoyo Omutaakatiifu

¹³ Bhakiriisitu bheejaasu, Nyamuwanga ꞉aabhabhirikiiye insonga mwikare mwiyagaarire. Nawe obhwiyagaaro bhwemwe bhwasiga okubha nsonga ya okubhasira ku-majomerwa ga omubhiri, tari musakiranega mwendeene.

¹⁴ Ebhiraagiro bhya Musa bhyone kutyo bhiyimbirwe mu-kiraagiro kimwi kinu ekyaika ati, “Wende omwikashaanya waawo, rwa kutyo owiiyenda omwene.”

¹⁵ Nawe, raabhe mukagenderera okurumana na okuryana rwa gintyanyi, mwangarire mwasiga okumarana-wo.

¹⁶ Mmbe, enibhabhwira ati, mutangasibhwe na Mwoyo Omutaakatiifu. Mukakora kutyo, mutakuuja kweki okuseeta amajomerwa amabhiibhi aga omubhiri.

¹⁷ Enibhabhwira kutyo kwa okubha kiyana, omubhiri oguranga okukora amangʼana nguyajana na Mwoyo Omutaakatiifu, na Mwoyo Omutaakatiifu woone ˆnaayajana nagwo. Mmbe, kwa okubha Mwoyo Omutaakatiifu na omubhiri ebhiyajana, mutakutura okukora kyonekyone kinu omwenda okukora.

¹⁸ Raabhe mukatangasibhwa na Mwoyo Omutaakatiifu, mutakutungwa kweki na ebhiraagiro.

¹⁹ Mmbe, ebhikorwa bhinu omubhiri ogukora bhimenyekeene ati ni bhinu, okutaara ameega, gintungwa gimbiibhi ku-meega, na amangʼana agandi ganu agaswasha,

²⁰ okuramya ebhisusano, obhurosi, obhusoko, iinyombo, orwango, riisungu, obhwawukani, obhwibhusha bhwa amangʼana,

²¹ obhwendi bhwa ebhiinu bhya abhandi, obhukorwa, obhuwubhaaru na amangʼana agandi goone kutyo ganu agasusana na gayo. Enibhabhwira kweki rwa kutyo naamarire okubhabhwira ati, abhaanu bhanu abhakora amangʼana rwa gayo, bhatarigabha kyonekyone mu-bhukama bhwa Nyamuwanga.

²² Nawe raabhe ekitangasibhwa na Mwoyo Omutaakatiifu, ekibha na ganu mu-mitima gyeswe, obhwendani, orugirigiri, omurembe, obhusimbiiru, omutima omujomu, obhuyaani, obhwitongeeye,

²³ obhufura na okwiyiinya. Kitariwo kiraagiro kinu ekigaanya omuunu okukora amangʼana rwa gayo.

²⁴ Abhaanu bhanu bhayimbeene na Kiriisitu Yeesu, bhasungire amajomerwa geebhwe aga emibhiri na obhwiganiirisha bhwebhwe obhubhiibhi ku-musarabha gwa Yeesu.

²⁵ Mwoyo Omutaakatiifu akiyaaye obhurame, mmbe kikore ganu omwene keenda.

²⁶ Kyasiga okwikumangya bhusa era, enu nkisindirana na okukorerana orwango.