Abhagaraatiya 4 - Iimuuma Iinyaaya

¹ Nawe, eneenda mumenye ati, omwana omugabhi wa ebhiinu bhya esemwene woonewoone, akabha akyari mutooto, kaabha ari rwa omugaya, raabhé kutyo ebhiinu bhyone kutyo ebhibha bhiri bhyaye.

² Akabhaga kayo koone kutyo, omwana uyo kaabha ˆnaangarirwa na abharesi na abhaanu bhanu abhayambaarira ebhiinu bhyaye, okuyikira akabhaga kanu esemwene ꞉aariga aramuuye.

³ Nikwo kutyo eswe kyone, bhunu Kiriisitu ꞉aariga akyari kuuja, ꞉kyariga kiri rwa abhaana, ꞉kyariga kitungirwe na gintungwa ginu egitunga ekyaro kinu.

⁴ Nawe akabhaga akeene ꞉keejire kaayika, Nyamuwanga ˆnaatuma Omwana waaye mu-kyaro. Omwana uyo ˆneebhurwa na omugasi, woone ˆnaabha mugwati wa ebhiraagiro bhya Musa.

⁵ ꞉Aabheeye mugwati wa ebhiraagiro bhya Musa, insonga atuurye, bhanu ꞉bhaariga bhari bhagwati bha ebhiraagiro bhiyo. ꞉Aakorere kutyo, insonga kiramirwe na Nyamuwanga kibhe bhaana bhaaye.

⁶ Na kwa okubha woori kiri bhaana bha Nyamuwanga, Nyamuwanga ꞉aatumire Mwoyo Omutaakatiifu wa omwana waaye mu-mitima gyeswe. Mwoyo uyo niwe kaakora nkyamurira Nyamuwanga obhuraka nkimubhirikiraga ati, “Abha,” insonga yeende-ko, “Raata.”

⁷ Mmbe woori, awe utari mugaya kweki, tari uri mwana wa Nyamuwanga. Na raabhe uri mwana, mmbe, uri mugabhi ku-Nyamuwanga.

Pawuro kaagonya Abhagaraatiya

⁸ Kara ayo, kwa okubha ꞉mwariga mutakumenya Nyamuwanga, ꞉mwariga muri bhagaya ku-misambwa, na giyo gitari Nyamuwanga bhusimukwa.

⁹ Nawe woori, mumenyere Nyamuwanga, omwene woone abhamenyere kujomu. Kubhaki woori omwenda okutungwa kweki na gintungwa gya ku-kyaro kinu? Gintungwa giyo gitari na bhwera, amwi ati bhuturo bhwonebhwone. Ndora nigyo kweki omwenda okusubha-ko mubhe bhagaya bhaagyo?

¹⁰ Mugwatiiye ginsikukuru gya giidiini, omuyaana ekibharo ginsiku gindebhe, ameesi, na emyaka.

¹¹ Enuubhaya muno, itaaja okubha ati ꞉naanyankire bhusa ku-mirimu ginu ꞉naakorere kw-imwe.

¹² Bhakiriisitu bheejaasu, enibheesaasaama ati, mubhe rwa anye, kwa okubha anye noone niri rwa emwe. Bhunu ꞉naariga niri amwi na emwe ꞉mutaankoreeye engʼana ebhiibhi ryoneryone.

¹³ Mumenyere ati okwamba, obhurwaye bhunu ꞉naariga niri nabhwo, nibhwo ꞉bhwakorere ninyoora omwanya gwa okubharaasisha Amangʼana Amajomu.

¹⁴ Obhurwaye bhwani bhukaturire okukora munjeere amwi ati mundeme, nawe ꞉mutaakorere kutyo. Tari ꞉mwandamiiye kujomu rwa maraayika wa Nyamuwanga, rwa Kiriisitu Yeesu omwene.

¹⁵ Akabhaga karya ꞉mwariga mujomeeywe, woori anu niki kibheeye-wo? Enaaika ekimari ati, bhunu ꞉naariga niri kw-imwe eyo, mukabheeye na obhuturo bhwa okunokora ameeso geemwe mugaanaane, mukaganokooye.

¹⁶ Angu, woori naabha musoko weemwe kwa okubha enibhabhwira ekimari?

¹⁷ Abheeyigisha abhabheeyi bhabhakenere muno, nawe bhatakubheendera amajomu. Abheenda okubhataanya na anye, insonga mubhanyankirire.

¹⁸ Okwikomeesha ni kujomu, nawe kubhe ku-mangʼana amajomu. Mwikomeeshe akabhaga koone kutyo, kanu niri na emwe na kanu nitari na emwe.

¹⁹ Bhaana bhaani, enibhoongwira obhururu kweki rwa omugasi unu kaarumwa obhusungu, okuyikira anu gintungwa gya Kiriisitu giribha mw-imwe.

²⁰ Nikabheeye amwi na emwe woori kutya, amwi nikaaikire na emwe nifuraaye. Nawe woori enuubhaya muno, nitakumenya kutyo agaaja okubha kw-imwe!

Ekirengekanyo kya Ajiri na Saara

²¹ Woori mumbwire, emwe bhanu omwenda okubha bhagaya bha ebhiraagiro bhya Musa, mumenyere kimari kutyo ebhiraagiro ebhyaika?

²² Amakaamo Amataakatiifu agaaika ati, Bhurayimu ꞉aariga ari na bhaana bhabhiri. Omwana owumwi ku-Ajiri omugasi omugaya, na omwana owundi ku-mukaaye Saara.

²³ Omwana wa ku-mugasi omugaya ni bhaanu ꞉bhaanyookeene era, mbamwibhura. Nawe unu ꞉eebhuuye ku-mukaaye ꞉aamwibhuuye okuriingʼaana na kutyo Nyamuwanga ꞉aariga aragire.

²⁴ Abhagasi abhabhiri bhayo, abharengekanyibhwa na giimuuma giibhiri. Ajiri niwe iimuuma ya okwamba inu ꞉yaakorekere mu-kiima kya Sinaayi mu-kyaro kya Arabhiya. Abhaana bhaaye ꞉bheebhuuywe rwa abhagaya mu-bhiraagiro bhya Musa.

²⁵ Abhaanu bha Yerusareemu abha woori abhasusanywa na abhaana bha Ajiri, kwa okubha ni bhagaya bha ebhiraagiro bhya Musa, rwa Ajiri kutyo ari, na abhaana bhaaye bhoone kutyo.

²⁶ Nawe Saara ni kirengekanyo kya Yerusareemu ya mu-rwire, na uyo kw-iswe niwe maayi.

²⁷ Mu-Makaamo Amataakatiifu ikaamirwe ati, “Nuujomerwe awe unu uri mugumba, awe unu utakutura okwibhura, yaamura obhuraka, urire awe unu ukyariga okurumwa obhusungu, kwa okubha abhaana bha omugasi unu anugirwe ni bhaafu, okukira abha unu ari na omurume.”

²⁸ Mmbe woori, Bhakiriisitu bheejaasu, emwe muri bhaana bha Nyamuwanga rwa Isaaka okuriingʼaana na kutyo Nyamuwanga omwene ꞉aaragire.

²⁹ Rwa kutyo omwana unu abhaanu ꞉bhaanyookeene era mbamwibhura, ꞉aanyansiishe omwana unu ꞉eebhuuywe ku-bhuturo bhwa Mwoyo Omutaakatiifu, nikwo kutyo gari na woori.

³⁰ Nawe Amakaamo Amataakatiifu agaaika kutiki? Agaaika ati, “Bhirimya omugasi omugaya na omwana waaye, kwa okubha omwana wa omugaya, atakutura okugabha amwi na omwana wa omugasi omugabhurwa.”

³¹ Okubha kutyo, Bhakiriisitu bheejaasu, eswe kitari bhaana bha omugasi omugaya, tari kiri bhaana bha omugasi omugabhurwa.