Abhagaraatiya 3 - Iimuuma Iinyaaya

Obhwikirisha na ebhiraagiro

¹ Emwe abhaanu bha Garaatiya, kimari muri bhasiru! Niga abharogere? Ndora ꞉naabhabhwiriiye kujomu, insonga ya Yeesu Kiriisitu okusungwa ku-musarabha.

² Woori, siga nibhabhuushe-ko engʼana rimwi. Angu, ꞉mwaramiiye Mwoyo Omutaakatiifu okuturira ku-bhugwati bhwa ebhiraagiro bhya Musa, amwi ati mwaramiiye bhunu ꞉mweekirisiishe era Amangʼana Amajomu aga Yeesu?

³ Angu mubheeye bhasiru kutyo? ꞉Mwaambire mutangasibhwaga na Mwoyo Omutaakatiifu, woori omwenda okumariisha na amanaga geemwe abheene?

⁴ Angu, ebhinyansho bhyafu bhinu ꞉mwanyoorere, ꞉bhyariga bhiri bhya bhusa? Wuri, ꞉bhyariga bhitari bhya bhusa!

⁵ Angu, Nyamuwanga abhayaaye Mwoyo Omutaakatiifu ˆnaakora na ebhigwa kw-imwe okuturira ku-bhugwati bhwemwe obhwa ebhiraagiro bhya Musa, amwi ati abhayaaye bhunu ꞉mweekirisiishe Amangʼana Amajomu aga Yeesu?

⁶ Mwiganiirishe amangʼana ga Bhurayimu. Amakaamo Amataakatiifu agaaika ati, “꞉Eekirisiishe Nyamuwanga, niwe Nyamuwanga ˆnaamubhara ati ni murengeresi mu-meeso gaaye.”

⁷ Mmbe woori, mwikare mumenyerega ati abhaanu bhanu abheekirisha Nyamuwanga, bhayo nibho abhaana bha Bhurayimu!

⁸ Amakaamo Amataakatiifu ꞉gaarorere okwambira kara ati Nyamuwanga aribharira abhaanu bhanu bhatari Bhayawudi okubha bharengeresi okuturira obhwikirisha bhwebhwe. Nyamuwanga ꞉aatangatire kara okuraasisha Bhurayimu Amangʼana Amajomu gayo ati, “Okuturira ku-awe, abhaanu bha mu-bhyaro bhyone kutyo bhariyaanwa giinonkwe.”

⁹ Mmbe, abhaanu bhanu abheekirisha Nyamuwanga, abhanyoora giinonkwe, rwa kutyo Bhurayimu ꞉aaginyoorere okuturira ku-bhwikirisha.

Abhaanu abheerusibhwa okusooka mu-kiyiimo kya ebhiraagiro bhya Musa

¹⁰ Nawe abhaanu bhanu abheesiga okwerusibhwa okuturira ku-bhugwati bhwa ebhiraagiro bhya Musa, bhayo bhari mu-kiyiimo, kwa okubha Amakaamo Amataakatiifu agaaika ati, “Woonewoone unu atakukora goone kutyo ganu gakaamirwe mu-kitabho kya ebhiraagiro, eeyiimirwe.”

¹¹ Iri abhweru ati, atariwo muunu unu kaabha murengeresi mu-meeso ga Nyamuwanga okuturira ku-bhugwati bhwa ebhiraagiro bhya Musa, kwa okubha Amakaamo Amataakatiifu agaaika ati, “Omurengeresi kaarama okuturira ku-bhwikirisha bhwaye.”

¹² Ebhiraagiro bhya Musa bhitasookereeye ku-bhwikirisha, tari ebhyenda ebhikorwa bhya omuunu bhinu kaakora. Rwa kutyo Amakaamo Amataakatiifu agaaika ati, “Omuunu unu kaakora ganu ageendwa na ebhiraagiro, arirama okuturira ku-bhugwati bhwaye obhwa ebhiraagiro bhiyo.”

¹³ Kiriisitu ꞉aakituuriishe okusooka mu-kiyiimo kya ebhiraagiro bhya Musa, kwa okubha ꞉aakorerwe mwiyiime ku-nsonga yeeswe. Amakaamo Amataakatiifu agaaika ati, “Woonewoone unu kaasungwa ku-musarabha, eeyiimirwe.”

¹⁴ ꞉Aakituuriishe, insonga giinonkwe gya Bhurayimu giyikire abhaanu bhanu bhatari Bhayawudi okuturira ku-Kiriisitu Yeesu. Woori, eswe kyone kutyo ekitura okuramira Mwoyo Omutaakatiifu unu Nyamuwanga ꞉aaragire okukiyaana, okuturira okwikirisha Kiriisitu Yeesu.

Amangʼana ganu Nyamuwanga ꞉aaragire Bhurayimu

¹⁵ Bhakiriisitu bheejaasu, musige nibhabhwire-ko ekirengekanyo. Kyaike ati bhariwo bhaanu bhabhiri bhanu bheekirishaanyiishe kw-ingʼana riirebhe. Bhakamara okurya iimuuma kimwikimwi, atariwo muunu unu kaatura kweki okurema, amwi ati okwongesha engʼana ryoneryone ku-muuma iyo.

¹⁶ Mmbe, Nyamuwanga ꞉aaragire jaaji Bhurayimu, na omwibhurwa waaye. Amakaamo gatakwaika ati, “Ku-bheebhurwa bhaaye,” kwa okubha okwaika kutyo kukeeresiishe ati ni bhaafu, tari amakaamo agaaika ati, “Ku-mwibhurwa waaye.” Na okwaika kutyo okweresha ati ni wumwi, na owumwi uyo ni Kiriisitu.

¹⁷ Kinu nikyo eneenda okwaika, ati, Nyamuwanga ꞉aakorere iimuuma yaaye iyo, myaka magana gana na makumi gasatu, ebhiraagiro bhya Musa bhikyari kubha-wo. Okubha kutyo, ebhiraagiro bhiyo bhitakutura okunyamura iimuuma iyo, amwi ati okuyindura kinu Nyamuwanga ꞉aaragire.

¹⁸ Raabhe abhaanu bhakabheeye mbaramira omugabho gwa obhwerusha, okusooka ku-Nyamuwanga okuturira ku-bhugwati bhwa ebhiraagiro, omugabho guyo, gutaakeesigire kweki Nyamuwanga arage. Nawe, Nyamuwanga okuturira ku-nema yaaye, ꞉aayaaye Bhurayimu omugabho gwa iimuuma kwa okubha ꞉aariga amuragire.

Insonga ya ebhiraagiro bhya Nyamuwanga ku-Musa

¹⁹ Woori, ebhiraagiro bhiri na murimuki? Ebhiraagiro ꞉bhyatuuywe-wo ku-nsonga ya okweresha ebhikayo bhya abhaanu, bhibhe-wo okuyikira anu omwibhurwa wa Bhurayimu ariija, unu Nyamuwanga ꞉aaragire ati kaaja okuuja. Nyamuwanga ꞉aayaaye Musa ebhiraagiro bhiyo okuturira ku-bhaamaraayika, Musa niwe ˆnaabha mugwatanya wa Nyamuwanga na abhaanu bhaaye.

²⁰ Omugwatanya kaakenwa era, mbaara ebhiri gikabha ngikirishaanya. Nawe Nyamuwanga ꞉aakorere iimuuma na Bhurayimu ari omwene era, atariwo omugwatanya.

²¹ Angu, ebhiraagiro bhya Musa bhitakwikirishaanya na ganu Nyamuwanga ꞉aaragire? Wuri, itari kutyo! Raabhe ebhiraagiro bhikabheeye mbitura okuyaana abhaanu obhurame bhunu bhutakuweera, kikabharirwe na Nyamuwanga ati, kiri bharengeresi okuturira ku-bhugwati bhwa ebhiraagiro bhiyo.

²² Nawe itari kutyo. Amakaamo Amataakatiifu agaaika ati, abhaanu bhoone kutyo bhari mu-bhutungi bhwa ebhikayo. Ku-nsonga iyo, Nyamuwanga ꞉aaragire okuyaana riiragano ryaye abhaanu bhoone kutyo bhanu abheekirisha Yeesu Kiriisitu.

²³ Bhunu ꞉kyariga kikyari kubha na obhwikirisha ku-Yeesu Kiriisitu, ebhiraagiro bhya Musa ꞉bhyariga bhikitungire kiri bhabhoywa, nkirindiriraga akabhaga kanu obhwikirisha bhunu bhuri ku-Yeesu Kiriisitu bhurituurwa abhweru.

²⁴ Ebhiraagiro bhiyo ꞉bhyariga mbikitangasha okukireeta ku-kabhaga ka okwijira-mo Kiriisitu, insonga kibharwe na Nyamuwanga ati kiri bharengeresi okuturira ku-bhwikirisha.

²⁵ Nawe woori, obhwikirisha bhwamarire okuuja, ku-nsonga iyo, kitakutangasibhwa kweki na bhiraagiro.

²⁶ Woori, okuturira obhwikirisha bhwemwe ku-Kiriisitu Yeesu emwe mwone kutyo muri bhaana bha Nyamuwanga.

²⁷ Emwe mwone kutyo bhanu mwikirisiishe Kiriisitu mubhatiisibhwa, muyimbeene nawe, muri muna mumufwaye.

²⁸ Mmbe woori, bhutariwo obhutaashaanya bhwa Omuyawudi na unu atari Muyawudi, omugaya na unu atari mugaya, omurume na omugasi. Emwe mwone kutyo muri wumwi ku-Kiriisitu Yeesu.

²⁹ Raabhe emwe muri bha Kiriisitu, mmbe, muri bheebhurwa bha Bhurayimu, mwone omuuja okunyoora omugabho gunu Nyamuwanga ꞉aaragire.