Abhagaraatiya 2 - Iimuuma Iinyaaya

Abhatangasha bha riikanisa rya Yerusareemu abheekirisha ameeyigisho ga Pawuro

¹ Bhunu myaka ekumi na ena ꞉gyaturire, ningenda kweki Yerusareemu, ku-kabhaga kayo ꞉naagendere na Bharinaabha, ningega na Tiito woone nkigenda nawe.

² ꞉Naagendere Yerusareemu, kwa okubha Nyamuwanga niwe ꞉aariga ambwiriiye ati nigende. Bhunu ꞉kyayikire eyo, nkinyookana na abhatangasha bha riikanisa abheene era. Nimbatondera kutyo ꞉naaraashaga Amangʼana Amajomu ku-bhaanu bhanu bhatari Bhayawudi. ꞉Naaramuuye okubhatondera gayo, insonga emirimu ginu ꞉naariga ninkora na ginu enigenderera okukora, gyasiga okubha gya bhusa, mbeekirishaanya na anye.

³ ꞉Naariga niri na Tiito, omwene ꞉aariga ari Muyunaani, nawe ꞉ataasingʼiirisiibhwe okusaarwa.

⁴ Riingʼana rya okusaarwa riyo, ꞉ryabhuusiibhwe na abhaanu bhanu ꞉bhaariga mbeekora ati ni Bhakiriisitu bheejaasu, nawe ꞉bhaariga bhakorere obhwenge bheeyingisiishe mw-iswe okubhuusirisha obhwiyagaaro bhweswe bhunu ꞉kyayaaywe na Kiriisitu Yeesu. ꞉Bhaariga mbarwanya okukikora kibhe bhagaya bha ebhiraagiro bhya Musa.

⁵ Eswe ꞉kitaasakire okwikirishaanya nabho, insonga ekimari kya Amangʼana Amajomu kigenderere okubha na emwe nsiku gyone kutyo.

⁶ Nawe abhatangasha bha riikanisa bhayo, bhanu ꞉bhaariga bhari na ekibharo muno mu-bhaanu, ꞉bhaariga bhatari na engʼana rindi ryoneryone eyaaya erya okumbwira. Ni kimari ꞉bhaariga mbayaanwa ekibharo muno, nawe anye riyo ritakunsaasa, kwa okubha Nyamuwanga atakwigana ekibharo kya muunu.

⁷ Abhatangasha bhayo ꞉bhaamenyere ati, Nyamuwanga ꞉aantumire niraashe Amangʼana Amajomu aga Yeesu ku-bhaanu bhanu bhatasaarirwe, rwa kutyo ꞉aatumire Peetero araashe ku-bhanu bhasaarirwe.

⁸ Unu ꞉aayaaye Peetero obhuturo okubha mutumwa ku-bhanu bhasaarirwe, niwe ꞉aanaaye anye obhuturo nigende ku-bhaanu bhanu bhatari Bhayawudi.

⁹ Mmbe bhunu abhatangasha abhakuru, Yakobho, Keefa na Yowana, ꞉bhaamarire okumenya ati Nyamuwanga niwe ꞉aanaaye emirimu ginu okuturira ku-nema yaaye, mbakigwata amabhoko anye na Bharinaabha okweresha obhuyimbani bhwebhwe kw-iswe. Nkiikirishaanya ati eswe kigende okukora emirimu ku-bhaanu bhanu bhatari Bhayawudi, abheene bhakore emirimu ku-Bhayawudi.

¹⁰ Abhatangasha bhayo ꞉bhaakisabhire engʼana rimwi era ati, kibhe nkiyiita okutuma obhusakisi ku-Bhakiriisitu abhatobhu bhanu bhari Yerusareemu ayo. Anye noone niikomeesiishe muno okukora riyo.

Pawuro kaagonya Keefa

¹¹ Nawe bhunu Keefa ꞉eejire mu-musi gwa Antiyokiya, rusuku rumwi ꞉naaremere amangʼana gaaye abhweru, kwa okubha ꞉aariga ayabhire.

¹² Bhunu ꞉eejire, ꞉aariga ˆnaariira amwi na Abhakiriisitu bhanu bhatari Bhayawudi kujomu era. Nawe bhunu abhaanu abharebhe ꞉bheejire okusooka ku-Yakobho, Keefa ˆnaarema okurya na bhanu bhatari Bhayawudi. ꞉Aakorere kutyo, kwa okubha ꞉aariga ˆnoobhaya abhaanu bhanu ꞉bhaariga mbakomeeresha ati Abhakiriisitu bhoone kutyo bhabhe bhasaarirwe.

¹³ Niwe Abhakiriisitu abhandi Abhayawudi bhoone mbaamba okukora kutyo Keefa ꞉aakoraga. Kimwi Bharinaabha woone ˆnaayimbana nabho.

¹⁴ Nawe bhunu ꞉naarorere ati bhatakukora kutyo ekimari kya Amangʼana Amajomu ekyenda, nimbwirira Keefa mu-meeso ga abhaanu bhoone kutyo ati, “Awe uri Muyawudi, nawe owukoraga kutyo abhaanu bhanu bhatari Bhayawudi abhakora. Kubhaki woori usiige bhanu bhatari Bhayawudi okuseeta gintungwa gya Ekiyawudi?”

Abhaanu abheerusibhwa bhakeekirisha Yeesu Kiriisitu

¹⁵ Ni kimari ati, anye na omwene, kiri Bhayawudi bhusimukwa. Kitari bhaanu bha ebhyaro ebhindi bhanu eswe ekibhirikira ati, “Abhakosi bha ebhikayo.”

¹⁶ Nawe kimenyere ati, omuunu atakutura kubharwa ati ni murengeresi ku-Nyamuwanga, ku-kugwata ebhiraagiro bhya Musa, tari, ni kuturira okwikirisha Yeesu Kiriisitu omwene era. Okubha kutyo eswe kyone, kiikirisiishe Kiriisitu Yeesu, insonga kibharwe na Nyamuwanga ati kiri bharengeresi, okuturira obhwikirisha bhuyo, itari okugwata ebhiraagiro bhya Musa. Ni kimari ati atariwo muunu unu kaatura okubharwa ati ni murengeresi mu-meeso ga Nyamuwanga, okuturira obhugwati bhwa ebhiraagiro bhya Musa.

¹⁷ Raabhe eswe bhanu ekyenda okubharwa ati kiri bharengeresi mu-meeso ga Nyamuwanga, okuturira ku-Kiriisitu, nawe abhandi abhakyaika ati kiri bhakosi bha bhikayo, angu, Kiriisitu kaakikora eswe kibhe bhakosi bha bhikayo? Wuri! Itari kutyo.

¹⁸ Nikaamba kweki okwiyigisha ameeyigisho ga okugwata ebhiraagiro bhya Musa, ameeyigisho ganu naamarire okurema, eneeresha ati anye omwene niri mukayi.

¹⁹ Bhunu ꞉naariga niinsaka okugwata ebhiraagiro bhya Musa, ebhiraagiro ꞉bhyandamuriraga. Nawe woori, nitakusaka kweki okugwata ebhiraagiro bhiyo, insonga niture okwikara kutyo Nyamuwanga keenda.

²⁰ Bhunu Kiriisitu ꞉aafuuye ku-musarabha, ꞉naafuuye amwi nawe, nawe woori eniisha omwoyo, obhurame bhunu niri nabhwo bhutari bhwani, enirama ku-nsonga ya Kiriisitu unu ari mu-mutima gwani. Woori, enirama okuturira ku-bhwikirisha bhunu niri nabhwo ku-Mwana wa Nyamuwanga. Omwene ꞉aanyeendere ˆnaasoosha obhurame bhwaye insonga anyeerushe.

²¹ Nitakurema iinema ya Nyamuwanga, raabhe kimari Nyamuwanga kaabharira omuunu obhurengeresi okuturira ku-kugwata ebhiraagiro bhya Musa, mmbe, Kiriisitu ꞉aafuuye bhusa!