Abhagaraatiya 1 - Iimuuma Iinyaaya

Obhukeesha

¹ Iinyarubha inu eniyikaama anye Pawuro. Anye nitari mutumwa wa bhaanu amwi ati nitumirwe na muunu murebhe, tari nitumirwe na Yeesu Kiriisitu omwene, na Raata Nyamuwanga unu ꞉aasuurire Yeesu okusooka mu-bhafuuye.

² Anye na Abhakiriisitu bheejaasu bhoone kutyo bhanu bhari amwi na anye anu ekibhakeesha, emwe bhanu muri mu-makanisa ga Nyamuwanga ganu gari Garaatiya.

³ Iinema na omurembe okusooka ku-Raata Nyamuwanga, na ku-Raatabhugenyi Yeesu Kiriisitu, bhibhe amwi na emwe.

⁴ Kiriisitu ꞉eesoosiishe okufwa, ku-nsonga ya ebhikayo bhyeswe, insonga akyerushe okusooka mu-mabhiibhi ga ku-kyaro kunu. ꞉Aakorere kutyo okuriingʼaana na obhukene bhwa Raata Nyamuwanga.

⁵ Nyamuwanga agungibhwe akajaanende koone kutyo. Amina.

Itariwo kweki Ngʼana Njomu eyindi eya ekimari

⁶ Enibharuguura muno! Ni kabhaga kafuyi era kanu kaaturire, ayo era mwambire okusiga okwikirisha Nyamuwanga unu ꞉aabhabhirikiiye okuturira ku-nema ya Kiriisitu! Omwamba okuseeta ameeyigisho agandi ganu abhaanu abhandi abhaaika ati nigo Amangʼana Amajomu.

⁷ Enibhabhwira ati, gatariwo kweki Amangʼana Amajomu agandi. Nawe bhariwo abhaanu bhanu abheenda bhabhanyamure, abheenda okuyindura Amangʼana Amajomu aga Kiriisitu.

⁸ Raabhe muunu woonewoone, ibhe ati asookere kw-iswe abheene, amwi ati maraayika okusooka mu-rwire, akabharaasisha amangʼana ganu gatakuriingʼaana na ganu eswe ꞉kyabharaasisiishe, omuunu uyo eeyiimwe na Nyamuwanga!

⁹ Enisubhira okubhabhwira kweki, rwa kutyo kyamarire okubhabhwira ati, omuunu akabharaasisha amangʼana agandi ganu gatakuriingʼaana na ganu mwaramiiye, omuunu uyo eeyiimwe na Nyamuwanga!

¹⁰ Angu, omutoga ati eneenda neendwe na abhaanu? Wuri, anye eneenda neendwe na Nyamuwanga omwene era. Amwi omutoga ati enaagara okujomisha abhaanu? Nikabheeye naagara okujomisha abhaanu, nitakabheeye mujuuma wa Kiriisitu.

Pawuro kaatumwa na Nyamuwanga okuraasha Amangʼana Amajomu aga Yeesu

¹¹ Bhakiriisitu bheejaasu, eneenda mumenye ati, Amangʼana Amajomu ganu anye ꞉naabharaasisiishe, ꞉nitaagasoosiishe ku-bhaanu.

¹² Amangʼana gayo nitagaramiiye amwi ati kwiyigisibhwa kusooka ku-muunu woonewoone. Nawe Yeesu Kiriisitu omwene niwe ꞉aagantuuriiye abhweru.

¹³ Emwe mwoonguuywe kutyo ꞉naariga ninkora bhunu ꞉naariga niri mu-diini yaani ya Ekiyawudi. Kutyo ꞉naanyanshaga riikanisa rya Nyamuwanga, neendaga nirimare-wo kimwi.

¹⁴ ꞉Naakiraga bhaanu bhaafu abha riikura ryani okurwanirira iidiini yeeswe eya Ekiyawudi. Na ꞉neekomeeshaga muno okuseeta ameeyigisho ga bhaajaaji.

¹⁵ Nawe Nyamuwanga, unu ꞉aansorere nikyari mu-nda ya maayi, ˆnambirikira okuturira ku-nema yaaye,

¹⁶ bhunu ꞉aarorere ati ni kujomu antuurire abhweru, nimenye kutyo Omwana waaye ari. ꞉Aakorere kutyo, insonga niraashe Amangʼana Amajomu aga Omwana waaye ku-bhaanu bhanu bhatari Bhayawudi. ꞉Eejire aansora, ꞉niteekaaye okukora ekiina na muunu woonewoone.

¹⁷ ꞉Nitaagendere Yerusareemu ku-bhanu ꞉bhaantangatiiye okubha bhatumwa. Tari ꞉neemukire ningenda mu-kyaro kya Arabhiya. Kimwi ninsubha kweki mu-musi gwa Dameesiki.

¹⁸ Bhunu ꞉gyaturire myaka esatu, ningenda Yerusareemu, insonga nirorane na Keefa eyo. Niikara ewa Keefa nsiku ekumi na etaanu era.

¹⁹ Nawe ꞉nitaaroreene na mutumwa wundi, ukasiga Yakobho, omumura waabho Raatabhugenyi Yeesu era.

²⁰ Nyamuwanga amenyere ati, amangʼana ganu enibhakaamira ni kimari, gatarimo bhubheeyi!

²¹ Mmbe, okusooka ayo, ꞉naagendere mu-kyaro kya Siiriya na Kirikiya.

²² Mu-kabhaga kayo, Abhakiriisitu bha mu-makanisa ga Nyamuwanga ganu ꞉gaariga gari Ebhuyawudi, ꞉bhaariga bhatakuumenya.

²³ Tari ꞉bhaariga bhoonguuywe era ati, “Omuunu unu ꞉aakinyanshaga ku-bhwambiro, siinu kaaraasha obhwikirisha bhunu ꞉aarwanyaga okumara-wo!”

²⁴ Mmbe, mbakumangya Nyamuwanga ku-nsonga ya ganu ꞉naariga ninkora.