Abhafiripi 4 - Iimuuma Iinyaaya

¹ Mmbe woori, Bhakiriisitu bheejaasu, nibheendere na nirangire muno okurorana na emwe. Ni emwe omukora ninjomerwa, na ni emwe orusuurya rwani runu niriyaanwa ku-nsonga ya emirimu ginu naakorere. Mmbe woori bheendwa bhaani, omwendwa mwikare muyimbeene na Raatabhugenyi.

Amangʼana ga Pawuro ku-Bhafiripi

² Enibheesaasaama muno Ewodiya na Siintike, muungwane, mubhe na omugambirano gumwi, kwa okubha emwe mwone kutyo muri bhaanu bha Raatabhugenyi Yeesu.

³ Enikusabha awe woone omujuuma weejaasu omwitongeeye, usakire abhagasi abhabhiri bhanu, bhabhe na mugambirano gumwi. Bhabhe kutyo kwa okubha ꞉bhaariga bhari amwi na anye na Kirementi na abhajuuma bheejaasu abhandi bhanu amasiina geebhwe gakaamirwe mu-kitabho kya Obhurame, abhagasi bhayo ꞉bhaakorere muno emirimu gya okuraasha Amangʼana Amajomu aga Yeesu.

⁴ Mujomerwega ku-nsiku kwa okubha muri bhaanu bha Raatabhugenyi, enaaika kweki ati mujomerwe!

⁵ Obhufura bhwemwe bhumenyekane ku-bhaanu bhoone kutyo. Raatabhugenyi ari ayeeyi okusubha.

⁶ Mwasiga okwinyansha kw-ingʼana ryoneryone, tari ku-mangʼana goone kutyo musaasaame Nyamuwanga, mumukumyega, na mumusabhe bhinu omwenda. Mumubhwire na obhukene bhunu muri nabhwo.

⁷ Mmbe woori, kwa okubha muri bhaanu bha Kiriisitu Yeesu, omurembe gwa Nyamuwanga gunu ogukira obhwiganiirisha bhwa abhaanu bhoone kutyo, oguuja okwangarira emitima na obhwenge bhwemwe.

⁸ Mmbe, Bhakiriisitu bheejaasu, amangʼana goonegoone aga ekimari, goonegoone aga ekibharo, goonegoone aga obhurengeresi, goonegoone amajomu, goonegoone ganu ageendwa na abhaanu, goonegoone ganu abhaanu abhakumangya, na bhukabha-wo obhujomu bhwa omutima bhwonebhwone, amwi ati ntungwa njomu yooneyoone, gayo nigo mwiganiirishega.

⁹ Ganu ꞉mweeyigiiye ku-anye mugaramira, ganu ꞉mwoonguuywe, amwi ati ganu ꞉mwarorere okusooka ku-anye, gayo nigo mugenderere okukora. Ayo niwe Nyamuwanga unu kaakiyaana omurembe kaaja okugenderera okubha amwi na emwe.

Pawuro kaakumya Abhafiripi

¹⁰ Mmbe, nijomeeywe muno okuyimbana na Raatabhugenyi Yeesu, kwa okubha woori, obhwiganiirisha bhwemwe bhwambire okubha ku-anye kweki. Nimenyere ati nsiku gyone kutyo ꞉mwariga munyiiganiirisha kutyo niri, nawe ꞉mwariga mubhurirwe injira ya okutuma bhusakisi bhwemwe ku-anye.

¹¹ Mwasiga kutoga ati enaaika gayo ku-nsonga ya obhukene bhunu niri nabhwo. Wuri, anye niiyigiiye okwiswa na kyonekyone kinu niri nakyo.

¹² Anye nimenyere okwikara kitobhu, na nimenyere okwikara kiniibhi. Niiyigiiye okwikirishaanya na mangʼana goone kutyo ganu agannyoora. Niiyigisiibhwe okurumwa omweko na okwiguta, okubha na ebhiinu bhyafu, na okusuuyirwa ebhiinu.

¹³ Enitura okukora amangʼana goone kutyo, kwa okubha Kiriisitu niwe kaanaana amanaga.

¹⁴ Nawe ꞉mwakorere kujomu, bhunu ꞉mwayimbeene na anye mu-nyanko inu ꞉naariga nirimo.

¹⁵ Emwe Abhafiripi, emwe abheene mumenyere kujomu ati, okwamba na okwamba bhunu ꞉mwoonguuywe Amangʼana Amajomu ganu, nisookereeyega Makedooniya, ritariwo ekanisa ryoneryone rinu ꞉ryansakiiye. Tari ni emwe abheene era ꞉mwansakiraga. Riikanisa ryemwe era niryo ꞉ryariga riyimbeene na anye ku-kusoosha na okuramira ebhiinu.

¹⁶ Na bhunu ꞉naariga niri Teesaroonike, eyo woone ꞉mwantumiraga ebhiinu bhya okunsakira ku-bhukene bhwani, na itari rumwi era.

¹⁷ Mwasiga kutoga ati enaaika gayo insonga mugenderere okundeetera ebhiinu. Tari eneenda nirore Nyamuwanga ˆnaabhayaana giinonkwe ku-bhuyaani bhwemwe bhuyo.

¹⁸ Woori, ebhiinu bhinu ꞉mwatumire Epafuradito okundeetera, bhyone kutyo ꞉naabhinyoorere. Bhiinyisire na okusaaga ku-bhukene bhunu ꞉naariga niri nabhwo. Obhusakisi bhwemwe bhuyo bhubheeye rwa omugabho gwa ebhirange ebhijomu, omugabho gunu Nyamuwanga eenderega, na gunu keekirishaga.

¹⁹ Mmbe, Nyamuwanga kaaja okubhayaana kyonekyone kinu omukena okuriingʼaana na obhuniibhi bhwaye obhwafu. Arikora kutyo okuturira obhugungyo bhwa Kiriisitu Yeesu.

²⁰ Raata Nyamuwanga, agungibhwe akajaanende koone kutyo. Amina.

Amangʼana ga okuragana

²¹ Munkeesishe abhaanu bhoone kutyo bhanu bheekirisiishe Kiriisitu Yeesu Firipi ayo. Abhakiriisitu bheejaasu bhanu abhansakira anu, bhoone abhabhakeesha.

²² Na abhataakatiifu bhanu bheekaaye enu bhoone kutyo, abhabhakeesha, munomuuno bhanu bhari ewa Kayijaari.

²³ Iinema ya Raatabhugenyi weeswe Yeesu Kiriisitu ibhe amwi na emyoyo gyemwe.