Abhafiripi 3 - Iimuuma Iinyaaya

Pawuro keesiga Kiriisitu

¹ Mmbe woori, Bhakiriisitu bheejaasu enibhabhwira ati mujomerwe kwa okubha muri bhaanu bha Raatabhugenyi Yeesu. Anye nitakuyigwa okubhakaamira mangʼana garyagarya ganu niramarire okubhakaamira, nimenyere ati insubhiirisha iyo eyiija okubhasakira.

² Mwiyangarire na abheeyigisha bhanu abheeyigisha ebhiraagiro bhya Ekiyawudi mw-ikanisa ryeswe. Abheeyigisha bhayo ni bhakayi, na abhakomeeresha abhaanu ati bhatasaarire bhatakutura kujomisha Nyamuwanga.

³ Nawe, ni eswe kiri na insaaro eyeeneyeene, bhatari bhayo, kwa okubha eswe ekiramya Nyamuwanga okuturira ku-Mwoyo Omutaakatiifu waaye. Na eswe ekiiyeemera Kiriisitu Yeesu, na kitakwisiga mibhiri gyeswe.

⁴ Nawe anye nikaturire okwisiga omubhiri gwani. Omuunu woonewoone akeerora ati ari na ebhikorwa bhinu bhiisire okwisigwa, anye enimukira.

⁵ Anye ꞉neebhuuywe, niinsaarwa ku-rusuku rwani orwa munaana, niri Muijirayeeri wa mw-iyito rya Bhenjamiini, Mwebhuraaniya bhusimukwa. Ku-mangʼana ga okugwatira ebhiraagiro bhya Ekiyawudi, anye ꞉naariga niri Mufarisaayo.

⁶ Na ꞉naariga niikomeesha muno okunyansha Abhakiriisitu, niitogaga ati gayo nigo agajomisha Nyamuwanga. Ku-kukora kutyo ebhiraagiro ebhyenda ꞉naariga niri murengeresi, nitari na kikayo kyonekyone.

⁷ Nawe amangʼana ganu ꞉gaanjomeraga kara, woori gatakyanjomera kweki ku-nsonga ya obhuyimbani bhwani na Kiriisitu.

⁸ Gatari gayo era, enibhara ati nifwiriiywe-mo amangʼana goone kutyo, ku-nsonga ya okunyoora obhujomu bhunu bhutakuriingʼaanywa na kiinu, obhwa okumenya Kiriisitu Yeesu, Raatabhugenyi waani. Ku-nsonga ya Raatabhugenyi, nisigire amangʼana agandi goone kutyo, ningarora rwa amafwi, insonga nibhe muunu wa Kiriisitu,

⁹ nigwatane nawe. Nitakyeesiga kweki okunyoora bhurengeresi bhunu abhanyoora bhakagwatira ebhiraagiro, tari eniisiga obhurengeresi bhunu ekinyoora okusooka ku-Nyamuwanga kikeekirisha Kiriisitu.

¹⁰ Eneenda nimenye muno Kiriisitu, nimenye na amanaga ganu ꞉gaamusuurire. Niyimbane nawe ku-bhinyansho bhyaye, na nifwe rwa kutyo omwene ꞉aafuuye.

¹¹ Eneenda amangʼana gayo insonga ku-njira yooneyoone nisuurirwe amwi na abhaanu bhanu Nyamuwanga arisuura okusooka mu-bhafuuye.

Okusimbiira okuyikira ku-bhuteero bhwa emirimu

¹² Anye nitakwaika ati naakorere gayo goone kutyo, amwi ati naakomeeye ku-bhwikirisha, tari, noone enirwanirira insonga nigayikiire. Enirwanirira kutyo, kwa okubha gayo nigo Kiriisitu Yeesu ꞉aambirikiriiye.

¹³ Bhakiriisitu bheejaasu, nitakwaika ati naagayikiiriiye, tari enikora kiinu kimwi era ati, nitakwiganiirisha ganu gaaturire, na eniikomeesha insonga niyikiire ganu gakyari imbere.

¹⁴ Eniikomeesha mu-rugendo, eneenda niyike ku-bhuteero ninyoore ekiyaanwa kyani. Ekiyaanwa kiyo nikyo Nyamuwanga ꞉aambirikiriiye okwingira mu-rwire, okuturira ku-Kiriisitu Yeesu.

¹⁵ Mmbe woori, eswe bhanu kikomeeye mu-bhwikirisha, kiiganiirishe gayo. Na raabhe mukeeganiirisha engʼana ryoneryone erindi, Nyamuwanga kaaja okubhatuurira ku-bhweru na gayo mugamenye.

¹⁶ Nawe kigenderere okugwata muno rinu kyamarire okumenya.

Abhakiriisitu bheeyigire akatungiiye ka Pawuro

¹⁷ Bhakiriisitu bheejaasu, mwiyigire ku-anye. Na muringirirega ku-bhanu abhakora rwa kutyo ꞉kyabhabhwiriiye mukorega.

¹⁸ Bhariwo abhaanu agati weemwe bhanu abharema obhwerusha bhunu ꞉kyanyoorere okuturira ku-musarabha gwa Kiriisitu. Riingʼana rinu naabhabhwiriiye kaafu, nawe enigenderera okubhabhwira kweki enu amasiga ngangera ati,

¹⁹ obhuteero bhwa abhaanu bhayo, ni kumarwa-wo. Bhariitwa, kwa okubha bhatungirwe amajomerwa geebhwe amabhiibhi aga emibhiri. Abheegungisha ebhikorwa bhyebhwe ebhibhiibhi bhinu abhakora. Bheeki abheeganiirisha amangʼana ga ku-kyaro kunu era.

²⁰ Nawe, eswe obhwikasi bhweswe bhuri mu-rwire, na ekirindirira muno Omwerusi, Raatabhugenyi Yeesu Kiriisitu asubhe.

²¹ Omwene ari na obhuturo bhwa okukora ebhiinu bhyone kutyo bhibhe ku-bhutungi bhwaye. Okuturira obhuturo bhuyo, kaaja okuyindura emibhiri gyeswe eminyamuke ginu, gibhe na obhugungyo rwa kutyo ogwaye guri.