Abhafiripi 2 - Iimuuma IinyaayaOkwiyigira okwituura emwaro rwa Yeesu Kiriisitu 1 Angu obhwikirisha bhwemwe ku-Kiriisitu bhubhayaaye amanaga? Angu obhwendi bhwaye kw-imwe obhubhawooyeresha? Angu muyimbeene na Mwoyo Omutaakatiifu na omufwirirana ekigongo emwe abheene na abheene? 2 Mmbe woori, mubhe na bhwiganiirisha bhumwi, muri bhamwi, mwendeene emwe abheene na abheene, insonga mukuumishe obhujomerwa bhwani. 3 Mwasiga okwisoroora kw-ingʼana ryoneryone, na okukora ryoneryone mwiyeemere. Tari mwituurega emwaro, muroraga ati nyakara abheejaanyu kukira kutyo emwe muri. 4 Agati weemwe aasiga kubha-wo muunu unu angariiye amangʼana gaaye omwene, tari aangarire okusakira oweejaabho. 5 Mukene kutyokutyo, na obhukene bhuyo nibhwo ꞉bhwariga bhuri na Kiriisitu Yeesu. 6 Raabhé kutyo omwene bhusimukwa ꞉aariga ari rwa kutyo Nyamuwanga ari, nawe ꞉ataarorere ati ni kujomu okugwatirira riyo. 7 Mmbe, omwene ꞉aasigire gayo goone kutyo, ˆneetuura emwaro, ˆnaabha rwa omugaya, ˆneebhurwa rwa abhaanu abhandi, ˆnaabha muunu. 8 ꞉Eejire abha muunu rwa abhandi, ˆneetuura emwaro, ari muungwa ku-Nyamuwanga, ˆneekirisha okufwa, orufu rwa ku-musarabha! 9 Ku-nsonga iyo Nyamuwanga bhunu ꞉aamusuurire ˆnaamuyaana kibharo kinene muno. ˆNaamuyaana riisiina rinu erikira amasiina goone kutyo, 10 insonga okuturira kw-isiina rya Yeesu, ebhibhumbwa bhyone kutyo ebhya mu-rwire, ebhya mu-kyaro, na ebhya nyombe, bhiifukame. 11 Na abhaanu bhoone kutyo bhaaike ati Yeesu Kiriisitu niwe Raatabhugenyi, insonga Raata Nyamuwanga agungibhwe. Abhakiriisitu bhabhe rwa obhweru mu-kyaro 12 Mmbe woori, abheendwa bhaani, riibhaga rinu ꞉naariga niri kw-imwe eyo, ku-nsiku ꞉mwariga muri bhoongwa ku-Nyamuwanga. Mmbe, na woori bhunu niri areera na emwe mugenderere okukora kutyo, muno. Mukomeere okukora ganu ageendwa gakorwe na abhaanu bhanu bheerusiibhwe na Nyamuwanga. Mugakorega, muubhayire muyarariraga Nyamuwanga. 13 Mukore kutyo kwa okubha omwene niwe kaabhasakira mu-kukena kwemwe, na okukora kwemwe amangʼana insonga mukuumishe amajomu ganu omwene keenda. 14 Mukore amangʼana goone kutyo mutakwisigiinyira amwi ati kubhambashaanya, 15 insonga mubhe bhaana bha Nyamuwanga bhanu mwimire emitima. Mwasiga okubha na engʼana ryoneryone rya kwaikwa kubhiibhi na muunu, mu-kyaro kya abhaanu bhanu bharanyamukire emitima. Mu-bhaanu bhayo emwe omungʼarabhya rwa obhweru bhunu obhumirika mu-kyaro. 16 Na mugwatire Riingʼana rya Nyamuwanga, riyo niryo eribhayaana obhurame bhunu bhutakuweera. Mukore kutyo insonga niiyeeme ku-rusuku runu Kiriisitu ariija, ati ꞉nitaakorere mirimu gya bhusa, amwi ati ꞉neenyanshaga bhusa. 17 Raabhé nikasoosha obhurame bhwani, amaanyinga gaani gasoosibhwe gabhe rwa omugabho gwa iidivaayi, ku-nsonga ya obhwikirisha bhwemwe ku-Nyamuwanga, anye noone enijomerwa, na enijomerwa niyimbeene na emwe, mwone kutyo. 18 Mmbe woori, emwe mwone kutyo mujomerwe, kweki enaaika ati mujomerwe amwi na anye. Pawuro kaatuma Timoteeyo na Epafuradito 19 Raatabhugenyi Yeesu akeenda, mu-nsiku gitari nyafu eniija okutuma Timoteeyo aaje kw-imwe eyo, insonga bhunu arisubha enu, nikamenya kutyo omugenderera omutima gwani gusaasamuke. 20 Anye nitari na muunu wundi unu ari mutima gumwi na anye rwa Timoteeyo unu kaabhoongwira obhururu. 21 Abhandi bhoone kutyo bhaangariiye amangʼana geebhwe era, bhatakukora kutyo Yeesu Kiriisitu keenda bhakore. 22 Emwe abheene mumenyere ginkuma gya Timoteeyo, kutyo ꞉kyaraashaga Amangʼana Amajomu kiri amwi nawe, rwa omuunu na esemwene. 23 Woori, eneenda okutuma Timoteeyo kw-imwe eyo, nawe nikyarinda nimenye okwamba kutyo amangʼana gaani gakabhe. 24 Anye noone eniisiga ati nsiku gitari nyafu, Raatabhugenyi Yeesu kaaja okunsakira nibhaaje-ko eyo. 25 Nawe woori naarora nyakara nitume Omukiriisitu weejaasu Epafuradito, unu ekikora nawe emirimu gya Nyamuwanga enu. Unu niwe ꞉kyeekomeesiishe nawe rwa abhasirikare okurwanirira Iingʼana Injomu iraasibhwe. Na niwe ꞉mwatumire okundeetera obhusakisi bhwemwe na okunsakiraga-ko emirimu egindi. 26 Naamutuma eyo kwa okubha omwene woone ꞉aariga ˆnaaranga okurorana na emwe mwone kutyo. Na omwene ꞉aasurumbaaye muno ꞉eejire oongwa ati ꞉mwanyoorere amangʼana ati ꞉aariga arwaye. 27 Kimari ꞉aariga ari murwaye musinge. Nawe Nyamuwanga ꞉aamufwiriiye ekigongo, ˆnaamuwosha. Itari ati Nyamuwanga ꞉aafwiriiye omwene era, tari ꞉aanfwiriiye noone okumuwosha insonga nisige okusurumbara muno. 28 Kyakora naamutuma kw-imwe insonga mukamurora kweki, mujomerwe na omutima gwani gusiiriike. 29 Muramire kujomu Omukiriisitu weejaanyu uyo. Omuunu woonewoone rwa uyo, mumuyaane ekibharo. 30 Omwene ꞉aarebhereeye okufwa ku-nsonga ya emirimu gya Kiriisitu, na bhunu ꞉aandeeteeye obhusakisi bhunu emwe mutaakaturire okuuyikisha kwa okubha ꞉naariga niri areera na emwe. |
© 2023, Wycliffe Bible Translators, Inc. All rights reserved
Wycliffe Bible Translators, Inc.