Abhaefeso 6 - Iimuuma Iinyaaya

Ameeyigisho ku-bhaana na ku-bheebhusi

¹ Emwe abhaana mwone, kwa okubha woori mugwateene na Raatabhugenyi Yeesu, muungwe abheebhusi bheemwe. Mukakora kutyo omubha mukorere engʼana ejomu.

² Ekiraagiro kya okwamba kinu Nyamuwanga ꞉aayaaye abhaanu abharagiiye-ko ni kinu ati, “Yaana ekibharo abheebhusi bhaawo,

³ amangʼana gaawo gabhe majomu ku-nsi kunu, na urame ku-kyaro.”

⁴ Abheebhusi bha ekirume emwe mwone, musige okusindira abhaana bheemwe, tari mubhatongere kujomu, mubhabhwiraga na amaragiriro ga Raatabhugenyi Yeesu.

Ameeyigisho iiguru ya abhagaya na bheesebhugenyi

⁵ Abhagaya mwone, muungwe bheesobhugenyi abha ku-kyaro kunu, mubhayaane ekibharo, mubhoobhayire, mwimire emitima. Mubhoongwe rwa kutyo omuungwa Yeesu Kiriisitu.

⁶ Mukorega kutyo, itari mu-kabhaga kanu abhabha bhariwo mbabharora era insonga mubheekumbe, tari mukore emirimu rwa abhagaya bha Kiriisitu, mukoraga ganu agajomisha Nyamuwanga emitima gyerere.

⁷ Mukore emirimu kwa mutima gumwi, mukoraga muna omukorera Raatabhugenyi Yeesu, itari ati omukorera muunu.

⁸ Mukore mumenyerega ati engʼana ryoneryone ejomu rinu omuunu kaakora niryo Raatabhugenyi Yeesu kaamusubhisha, abhe ati ni mugaya, amwi ati atari mugaya.

⁹ Emwe bhanu omukorerwa emirimu, mukore kutyokutyo ku-bhagaya bheemwe, musige okubha bharuru ku-bheene. Mukorega mumenyere ati Esobhugenyi weemwe bhoone kutyo ari mu-rwire, na omwene atakusoroora bhaanu.

Ebhigwato bhyeswe ebhya okurwanira na Sitaani

¹⁰ Amangʼana agandi ganu eneenda okumariisha okubhabhwira ni ati, musimbiire ku-Raatabhugenyi Yeesu, mumusigiiye omwene abhayambaashe na amanaga gaaye.

¹¹ Mufware ebhigwato bhyone bhinu Nyamuwanga abhayaaye, insonga muture okurema obhungʼeeni bhwa Sitaani.

¹² Enibhabhwira kutyo, kwa okubha kiri na riiremo. Na riiremo rinu kitakuyajana na bhaanu, tari obhuyajani bhweswe ekiyajana na amayijo ga ebhiwi ku-kyaro kinu kitakurorwa. Ekirwana na ginkama na obhuturo, na abhakuru bhanu abhatunga ekisuute.

¹³ Ku-nsonga iyo, mugwatirire ebhigwato bhinu muyaaywe na Nyamuwanga, insonga ku-rusuku runu obhubhiibhi bhuriija mubhuyige. Na mukamara okukora gayo goone kutyo, muyambaare musimbiirire.

¹⁴ Mmbe musimbiire mwibhoyerega ekimari rwa omuchipi mu-bhukende, na obhurengeresi bhubhe rwa ingibho ya ekyuma eya okufwara ku-kifubha,

¹⁵ na obhwendi bhwa okuraasha Amangʼana Amajomu aga omurembe bhubhe rwa ebhikwirya ku-maguru geemwe.

¹⁶ Na okukira gayo goone kutyo, obhwikirisha bhubhe rwa ingubha mu-mabhoko geemwe. Iyo niyo eyitura okusimya omuriro gwa emisimu ginu omukayi Sitaani kaabharasira.

¹⁷ Muramire obhwerusha bhubhe rwa ingofiira ya ekyuma ku-mitwe gyemwe, na Riingʼana rya Nyamuwanga ribhe rwa ekiraawa kinu omuyaanwa na Mwoyo Omutaakatiifu.

¹⁸ Kutyo omugenderera okukora gayo, mugenderere na okusaasaama kiyana ku-Nyamuwanga, mumusabhaga na ganu omwenda abhasakire, okuriingʼaana na kutyo Mwoyo Omutaakatiifu kaabhatangasha okusabha. Mutuure gayo mu-mitima gyemwe mwiyangariiye, na nsiku gyone kutyo musabhirega Abhakiriisitu bhoone kutyo.

¹⁹ Munsabhire anye noone insonga Nyamuwanga aanaane amangʼana ga okwaika, niture okuraasha kujomu ganu geeyibhisire mu-Mangʼana Amajomu aga Yeesu, niri na riibhaasi.

²⁰ Anye niri mwaiki wa Yeesu Kiriisitu, owa okubhwira abhaanu Amangʼana Amajomu aga Nyamuwanga, na gayo nigo agakora bhamboyere eminyororo mu-jeera. Munsabhire niraasishe abhaanu amangʼana gayo kutyo eyeendwa nitari na ebhaasi.

Pawuro kaasabhira Abhakiriisitu giinonkwe

²¹ Tukiko Omukiriisitu weejaasu omwende, na omujuuma omwitongeeye owa Raatabhugenyi, kaaja eyo. Na ariyika eyo, niwe aribhabhwira amangʼana goone kutyo ganu ꞉gaanyoorere, insonga mumenye kutyo niri, na kinu enikora woori anu.

²² Enimutuma kw-imwe insonga abhabhwire ganu gari kw-iswe enu, awooyereshe na emitima gyemwe.

²³ Enisabha ku-Nyamuwanga omurembe, obhwendi, na obhwikirisha bhunu obhusooka ku-raata Nyamuwanga, na ku-Raatabhugenyi Yeesu Kiriisitu, bhibhe na emwe Abhakiriisitu bheejaasu.

²⁴ Iinema ibhe na abhaanu bhoone kutyo bhanu bheendere Raatabhugenyi weeswe Yeesu Kiriisitu ku-bhwendi bhunu bhutakuweera. Amina.