Abhaefeso 5 - Iimuuma Iinyaaya

Gintungwa ginu Nyamuwanga keenda

¹ Mmbe woori mwiyigire gintungwa ku-Nyamuwanga, kwa okubha emwe muri bhaana bheende ku-Nyamuwanga.

² Mwikare mwendeene rwa kutyo Kiriisitu ꞉aakyendere ˆneesoosha okufwa ku-nsonga yeeswe, ˆnaabha ekimweso na omugabho omurange ku-Nyamuwanga.

³ Woori, emwe mwasiga okutaara ameega, na okukora engʼana ryoneryone ejabhi rwa gayo. Mwasiga na okunambaarira ebhiinu okukira kutyo omutura, kwa okubha amangʼana geejaabho gayo, gatakwendwa mu-bhataakatiifu.

⁴ Mwasiga kureeta nswaro, mwasiga okubha na mangʼana ganu gatari na bhwera, na giimamba, gayo gatakwendwa. Tari kinu ekyendwa ni kukumya Nyamuwanga.

⁵ Okunambaarira okunyoora ebhiinu okukira kutyo owutura, nikwo okuramya ebhisusano. Riingʼana rinu murimenyega kujomu ati, abhaanu rwa bhayo, abhataasi bha ameega, na abhajabhi, bhataritura okugabha mu-bhukama bhwa Kiriisitu na Nyamuwanga.

⁶ Omuunu woonewoone aasiga okubhajimya na mangʼana ganu gatari na bhwera, kwa okubha amangʼana rwa gayo naabhabhwira, nigo agakora Nyamuwanga ˆnaabha na riisungu ku-bhaanu bhanu bhatakumuungwa.

⁷ Woori, emwe mwasiga okuyimbana nabho,

⁸ kwa okubha emwe mwone kara, ꞉mwariga muri kisuute, nawe woori okuturira ku-Raatabhugenyi Yeesu Kiriisitu muri mu-bhweru. Mmbe woori mwikare rwa abhaanu bhanu bhari mu-bhweru,

⁹ kwa okubha kinu ekibha-wo ukeekara mu-bhweru ni kukora amangʼana amajomu, aga obhurengeresi na ekimari.

¹⁰ Ganu omukora, mukorega mwamenyere ati nigo agajomisha Raatabhugenyi Yeesu.

¹¹ Musige okuyimbana okukora amangʼana amabhiibhi, tari emwe mugareme na mugaaikire ku-bhweru,

¹² kwa okubha ganu abhakora bhwiyibhise, okugaaika ni nswaro.

¹³ Nawe kyonekyone kinu ekimirikwa na obhweru, ekituurwa ku-bhweru, na abhaanu abhakirora, ekyene kyone ekiyinduka nkibha bhweru.

¹⁴ Kyakora eyigambwa ati, “Awe unu owuwuniirira ramuka, usuuke okusooka mu-bhafuuye, na Yeesu Kiriisitu kaaja okukumirikira.”

¹⁵ Mmbe woori, mwiyangarire muno mu-kwikara kwemwe, musige okwikara muna bhaanu bhanu bhatari na bhwenge, tari mubhe bheenge.

¹⁶ Riibhaga rinu muri naryo murikorere emirimu kujomu, kwa okubha ginsiku ginu ni mbiibhi.

¹⁷ Ku-nsonga iyo, mwasiga kubha bhasiru, tari mumenyegeshe ati ni kiinuki Raatabhugenyi Yeesu keenda mukore.

¹⁸ Musige okukorwa obhwarwa, kwa okubha obhukorwa obhukora omuunu ˆnaakora amangʼana ganu gatari ku-bhaanu. Tari emwe mwijusibhwe Mwoyo Omutaakatiifu.

¹⁹ Mwaikanirega mu-jabhuri, na ameembo agandi goone kutyo aga okukumangya Nyamuwanga. Mwimbirega Nyamuwanga okuturira ku-Mwoyo Omutaakatiifu, enu mujomereywega Raatabhugenyi Yeesu mu-mitima gyemwe.

²⁰ Mukumye Raata Nyamuwanga ku-nsiku, ku-mangʼana goone kutyo, okuturira kw-isiina rya Raatabhugenyi weeswe Yeesu Kiriisitu.

Omusi gwa Ekikiriisitu

²¹ Mwiswariranega emwe abheene na abheene. Okukora kutyo omubha mukora kutyo Yeesu Kiriisitu keenda.

²² Emwe abhagasi abhagabhurwa, muungwe abharume bheemwe rwa kutyo omuungwa Raatabhugenyi weeswe Yeesu.

²³ Omwendwa mukore kutyo kwa okubha omurume niwe omutwe gwa mukaaye, rwa kutyo Kiriisitu woone ari mutwe gwa riikanisa. Riikanisa nigwo omubhiri gwaye, na omwene niwe omwerusi wa omubhiri.

²⁴ Mmbe woori, rwa kutyo riikanisa eryungwa Kiriisitu, nikwo kutyokutyo eyeendwa abhagasi abhagabhurwa bhoone, bhoongwe abharume bheebhwe ku-mangʼana goone kutyo.

²⁵ Emwe abharume mwone, mwende bhaamukeemwe rwa kutyo Kiriisitu woone ꞉eendere riikanisa, ˆneesoosha okufwa ku-nsonga yeebhwe.

²⁶ ꞉Aakorere kutyo insonga okuturira kw-ingʼana ryaye na ku-manji mu-bhubhatiisibhwa eeshe riikanisa.

²⁷ Okukora kutyo ꞉aariga ˆneenda eetuurire-wo ekanisa egunge rinu ritari na katogosi, ritari na nfunyo, na engʼana ryoneryone rwa gayo, tari ribhe etaakatiifu ritakwaikwa kubhiibhi na muunu.

²⁸ Nikwo kutyokutyo iisire abharume bhoone bheende abhagasi bheebhwe rwa emibhiri gyebhwe abheene. Omuunu akeenda mukaaye owubha eeyendere omwene.

²⁹ Na atariwo muunu unu kaatura okubhiiyirirwa omubhiri gwaye omwene, tari kaaguriisha, ˆnaagufwafya kujomu. Nikwo kutyo Kiriisitu woone kaakorera riikanisa ryaye.

³⁰ Eswe ni eswe kigwateenye omubhiri gwaye.

³¹ Ni rwa kutyo Amakaamo Amataakatiifu agaaika ati, “Ku-nsonga iyo, omuunu arisiga esemwene na nyiramwene, ˆnaayimbana na mukaaye, abhabhiri bhayo bharibha mubhiri gumwi.”

³² Iingʼana inu ni nkomeeye muno okuyimenya, nawe anye enaaikira Yeesu Kiriisitu na riikanisa.

³³ Nawe woori, omurume unu agabhuuye eende mukaaye rwa kutyo keeyenda omwene, na omugasi omugabhurwa woone aasiga okuswasha omurume waaye.