Abhaefeso 4 - Iimuuma Iinyaaya

Okwikara kiri bhamwi

¹ Mmbe woori ku-nsonga ya gayo, anye unu nibhoyerwe ku-nsonga ya okukorera Raatabhugenyi Yeesu emirimu, enibheesaasaama ati mukorega ebhikorwa bhinu ebhyeresha ntungwa njomu ginu ꞉mwabhirikiriiywe.

² Mubhe bhafura mwituuraga emwaro ku-nsiku, mubhe bhasimbiiru, mugegeranaga emwe abheene na abheene enu mwendeenega.

³ Mwikomeeshe okubha na obhumwi agati weemwe, na omurembe gunu Mwoyo Omutaakatiifu akiyaaye.

⁴ Eswe kyone kutyo kiri mubhiri gumwi, kiri na Mwoyo Omutaakatiifu wumwi, rwa kutyo ꞉kyabhirikiiywe na Nyamuwanga muramire obhwisige bhumwi.

⁵ Ariwo Raatabhugenyi wumwi, obhwikirisha bhumwi, obhubhatiisibhwa bhumwi,

⁶ na eswe bhoone kutyo ekiramya Nyamuwanga wumwi. Uyo niwe esemwene bhaanu bhoone kutyo, omwene niwe kaakitunga eswe bhoone kutyo. Kaakora emirimu okuturira kw-iswe bhoone kutyo, na eekaaye mw-iswe bhoone kutyo.

⁷ Nawe eswe kyone kutyo Kiriisitu ꞉aakiyaaye ekiyaanwa kyaye, okuriingʼaana na kutyo omwene ꞉aariga akenere.

⁸ Kyakora Amakaamo Amataakatiifu agaaika ati, “Bhunu ꞉aariinyire gimbaara gya iiguru, ꞉aariinyire ari na abhasoko bhaaye bhanu ꞉aagwatire mw-iremo, kimwi ˆnaayaana abhaanu ebhiyaanwa.”

⁹ Mmbe, riingʼana ati, “꞉Aariinyire gimbaara gya iiguru,” insonga yaaryo ni kutiki raabhe itari ati ꞉aambire okwika okwamba emwaro mu-kyaro?

¹⁰ Unu ꞉eekire niwe kweki ꞉aariinyire iiguru ˆnaambuka giinyiire gyone kutyo insonga abhe eejuuye iiguru, na mu-kyaro kyone kutyo.

¹¹ Uyo niwe ꞉aakorere abhandi bhabhe bhatumwa, abhandi bhabhe bharagi, abhandi bhabhe bharaasha bha Amangʼana gaaye Amajomu, abhandi bhabhe bhareefi bha abheeyigira bhaaye, na abhandi bhabhe bheeyigisha bha Amangʼana gaaye.

¹² ꞉Aakoraga kutyo insonga abhaanu bhayo bhakore emirimu gya okukusha abhaanu abhataakatiifu, emirimu gya Nyamuwanga gikorwe, na omubhiri gwa Kiriisitu guumbakwe.

¹³ Omubhiri guumbakwe okuyikira anu eswe kyone kiriyikira obhumwi mu-kwikirisha kweswe, na okumenya muno Omwana wa Nyamuwanga. Kikamara okumumenya, kibhe bhaanu bhanu kikomeeye ku-meeyigisho, okuyikira anu okumenya kweswe kuririingʼaana na Kiriisitu.

¹⁴ Ayo woori, kitakutura okubha rwa abhaana abhajaare, bha kusuukurwa enu na enu nkigegwaga na miyaga gya meeyigisho kweki, na obhungʼeeni bhwa abhaanu, na orurimi rwebhwe, nkiseetaga ameeyigisho ga obhubheeyi.

¹⁵ Nawe kikabha nkibhwirana ekimari enu kyendeene, ekikomeera ku-mangʼana goone kutyo okuyikira anu akatungiiye keeswe kaririingʼaana na Yeesu Kiriisitu, omwene uyo niwe omutwe.

¹⁶ Na eswe bhanu kimwikirisiishe bhoone kutyo, kiri rwa ebhigwatanya bhya omubhiri kutyo ebhigwatanya amwi omubhiri gwa omuunu, ku-mubhiri gwaye. Raabhe ebhigwatanya bhya omubhiri bhikakora emirimu gyebhwe kujomu, omubhiri gwone kutyo ogukura, ngwirooshaga, ekigwatanya ekimwi kyendeene na ekyejaabho.

Obhurame bhwa kara na obhuyaaya

¹⁷ Mmbe woori, okuturira kw-isiina rya Raatabhugenyi Yeesu enibhabhwira ati, okwambira woori musige okutungwa rwa abhaanu bhanu bhatakwikirisha Nyamuwanga. Na obhukene bhwebhwe bhutari na bhwera,

¹⁸ abhaanu bhayo, obhwiganiirisha bhwebhwe bhuri mu-kisuute, bhari areera na obhurame bhunu Nyamuwanga kaakiyaana. Bhari kutyo, ku-nsonga ya obhusiru bhunu bhari nabhwo, bhunu obhusooka mu-bhukomeeye bhwa emitima gyebhwe.

¹⁹ Emitima gyebhwe girindigaaye, abheeyingisha mu-majomerwa ga emibhiri bhatari na nswaro, na abhagenderera okuranga amajabhi.

²⁰ Nawe emwe ꞉muteeyigiiye kutyo okusooka ku-Kiriisitu, raabhe kimari

²¹ ꞉mwoonguuywe na okwiyigira okusooka ku-mwene kutyo ekimari kyaye kiri.

²² ꞉Mweeyigisiibhwe okusigana na obhusimukwa bhwemwe obhwa ebhikayo. Akabhaga ka okwamba ꞉mwariga muranga okukora amangʼana amabhiibhi ganu ꞉gaariga ngabhajimya, ngabhanyamuraga.

²³ ꞉Mweeyigisiibhwe kutyo, insonga emyoyo na obhwiganiirisha bhwemwe bhuroosibhwe bhuyaaya.

²⁴ Mufware obhurame obhuyaaya bhunu ꞉bhwabhumbirwe rwa kutyo Nyamuwanga ari, ku-bhurengeresi bhwone kutyo, na obhutaakatiifu bhwa ekimari.

Ebhiraagiro bhya obhurame obhuyaaya

²⁵ Mmbe woori musige orurimi, mubhwiranega ekimari, kwa okubha kiri rwa ebhigwatanya bhya omubhiri, ku-mubhiri ogumwi.

²⁶ Mukabha na riisungu mwasiga kukora bhikayo, riisuubha risige okugwa riisungu rikyari mu-mitima gyemwe,

²⁷ na mwasiga okuyaana Sitaani omwanya gwa okubhajimya.

²⁸ Omuunu unu ꞉aariga ˆneebha aasiga okwibha kweki, tari nyakara eekomeeshe okukora emirimu emijomu na amabhoko gaaye omwene, insonga abhe na ekiinu kya okusakira abhakene.

²⁹ Engʼana ebhiibhi ryoneryone risige okusooka mu-kanwa keemwe, tari amangʼana geemwe gabhe majomu ganu agatura okusakira abhakene, insonga gayaane iinema bhanu abhagoongwa.

³⁰ Mwasiga okusurumbasha Mwoyo Omutaakatiifu wa Nyamuwanga, kwa okubha uyo niwe orubhano rwa Nyamuwanga kw-imwe, okuyikira ku-rusuku rwa okutuuribhwa.

³¹ Musige kimwi, obhururu, ekiyirimuko, riisungu, giinyombo, na okujabhurana. Musige na okukora obhubhiibhi bhwonebhwone,

³² tari emwe abheene na abheene musakiranega, mubhe na ekigongo, mwabhiranega rwa kutyo Nyamuwanga ꞉aabhaabhiiye emwe okuturira ku-Kiriisitu Yeesu.