Abhaefeso 3 - Iimuuma Iinyaaya

Emirimu gya Pawuro ku-bhanu bhatari Bhayawudi

¹ Ku-nsonga iyo anye Pawuro enibhasabhira ku-Nyamuwanga. Niri mu-jeera ku-nsonga ya okukorera Kiriisitu Yeesu emirimu gya okubharaasisha Amangʼana Amajomu, emwe bhanu mutari Bhayawudi.

² Emwe mwamarire okuungwa ati okuturira ku-nema yaaye, Nyamuwanga aanaaye emirimu giyo nimukorere insonga nibhasakire emwe.

³ Rwa kutyo naamarire okubhakaamira kutooto era ati, Nyamuwanga ꞉aantuuriiye ku-bhweru imbisike iyo.

⁴ Mmbe woori, mukasoma iinyarubha inu, omutura okumenya obhuturo bhunu niri nabhwo bhwa okumenya kujomu imbisike ya Nyamuwanga iiguru ya Kiriisitu.

⁵ Abhaanu bha kara ꞉bhataatuuriiywe ku-bhweru amangʼana gayo, nawe woori okuturira Mwoyo Omutaakatiifu atuuriiye ku-bhweru abhatumwa bhaaye abhataakatiifu, na abharagi abhataakatiifu abha mu-kabhaga kanu.

⁶ Ganu nigo ꞉gaariga gabhisirwe, ati okuturira ku-Mangʼana Amajomu aga Yeesu ganu bheekirisiishe, woori bhanu bhatari Bhayawudi, abhagabha amwi na Abhayawudi. Abhayawudi na bhanu bhatari Bhayawudi abhabha bhigwatanya bhya mubhiri gumwi, na bhoone kutyo abhayimbana ku-bhwerusha bhwa Nyamuwanga bhunu ꞉aariga aragire, okuturira ku-Kiriisitu Yeesu.

⁷ Anye nikorerwe okubha mujuuma wa okuraasha Amangʼana Amajomu okuturira ku-nema inu niyaaywe na Nyamuwanga, na okuturira ku-bhuturo bhwaye obhunene bhunu obhukora ninkora emirimu giyo.

⁸ Raabhé kutyo niri mutooto okukira omutooto mu-bhaanu bha Nyamuwanga abhataakatiifu bhoone kutyo, nawe Nyamuwanga aanaaye iinema inu, okubhwira bhanu bhatari Bhayawudi obhuniibhi bhunu bhutari na ndengo, bhunu obhusooka ku-mangʼana amajomu ganu Kiriisitu kaakora.

⁹ Kweki ꞉aanaaye omurimu gwa okutuurira abhweru abhaanu bhoone kutyo imbisike inu. Nyamuwanga Omubhumbi wa ebhiinu bhyone kutyo ꞉aariga abhisire imbisike yaaye inu bhusimukwa.

¹⁰ ꞉Aayibhisire kutyo insonga iri ati, woori, okuturira kw-ikanisa, abhatungi na abha obhuturo mu-kyaro kinu kitakurorwa, bhamenye obhwenge bhwa Nyamuwanga bhunu bhuri mu-mbaga nyafu.

¹¹ Bhuyo nibhwo obhukene bhwaye bhunu ꞉aariga akenere bhusimukwa, ati aturire ku-Kiriisitu Yeesu Raatabhugenyi weeswe.

¹² Okuturira ku-Yeesu, kwa okubha kimwikirisiishe na kigwateene nawe, kiri na obhuturo bhwa okugenda ku-Nyamuwanga kiiyagaarire kitari na bhuubha.

¹³ Mmbe woori enibhasabha, musige kufwa emitima ku-nyanko inu omuungwa ati eyinyoora ku-nsonga yeemwe. Mwiyungwe kujomu era, kwa okubha iinyanko iyo eyibhareetera emwe obhugungyo.

Pawuro kaasaasaama ku-Nyamuwanga

¹⁴ Ku-nsonga iyo anye Pawuro eniifukamira Raata Nyamuwanga okubhasabhira.

¹⁵ Uyo niwe bhuuraata bhwa abhaanu obhusooka ku-mwene, na niwe ꞉aabhumbire abhaanu bhoone kutyo mu-kyaro anu, na ebhibhumbwa bhya mu-rwire bhyone kutyo.

¹⁶ Enibhasabhira ati abhasakire okuriingʼaana na obhuniibhi obhwa obhugungyo bhwaye, insonga ati okuturira ku-Mwoyo Omutaakatiifu waaye, mukomeere muno mu-myoyo gyemwe.

¹⁷ Okuturira mu-kwikirisha kwemwe, Kiriisitu eekare mu-mitima gyemwe. Anye noone enibhasabhira ati, abhasakire mwigumiirishe kw-isina rya obhwendani, na mubhe rwa bhanu bhasimbiiywe mu-rufuka rwa obhwendani.

¹⁸ Mukore kutyo insonga emwe na abhataakatiifu bheejaanyu mwone kutyo mumenye obhugari, obhureera, na obhusikya, bhwa obhwendi bhwa Kiriisitu kw-iswe.

¹⁹ Enibhasabhira mumenye na kutyo obhwendi bhwaye bhuyo, obhukira obhwiganiirisha bhweswe, na kutyo bhuri bhwafu. Mu-kusabha kwani enibhasabhira kutyo, insonga gintungwa gyemwe gibhe rwa egya Nyamuwanga.

²⁰ Mmbe woori, kigungye Nyamuwanga. Omwene niwe kaatura okukora amangʼana ga okuruguusha ganu gatakurengekanywa. Kaatura okukora okukira na ganu ekimusabhaga na okwiganiirisha, okuriingʼaana na amanaga gaaye ganu agakora emirimu mu-mitima gyeswe.

²¹ Yee bha, Nyamuwanga agungibhwe mw-ikanisa na ku-Kiriisitu Yeesu mu-bhaanu bhoone kutyo akajaanende koone kutyo. Amina.