Abhaefeso 2 - Iimuuma Iinyaaya

Nyamuwanga kaakyerusha okuturira ku-nema yaaye

¹ Emwe ꞉mwariga mufuuye mu-myoyo gyemwe, ku-nsonga ya okurema okuungwa Nyamuwanga na ebhikayo bhyemwe.

² Ebhikayo bhiyo, ꞉mwakoraga kara enu museetaga kutyo ekyaro ꞉kyabhasiraga. Mu-kabhaga kayo, ꞉mwaseetaga Sitaani omutungi wa obhukama bhwa mu-rutumba, unu kaakora emirimu na woori mu-mitima gya abhaanu bhoone kutyo bhanu bhajeemere Nyamuwanga.

³ Eswe kyone kara kikyari kwikirisha Yeesu, nikwo kutyo ꞉kyariga kiri rwa bhayo. ꞉Kyakoraga amajomerwa amabhiibhi aga emibhiri, na aga obhukene bhweswe. Bhusimukwa, kyone ꞉kyariga kiisire okunyoora ebhirusho rwa abhaanu abhandi.

⁴ Nawe kwa okubha Nyamuwanga ari na kigongo kyafu muno, na okuturira ku-bhwendi bhwaye bhwafu kw-iswe,

⁵ bhunu ꞉kyariga kiri rwa abhafuuye ku-nsonga ya okurema kweswe okuungwa aga Nyamuwanga, akiyaaye obhurame amwi na Kiriisitu. ꞉Mweerusiibhwe okuturira ku-nema ya Nyamuwanga.

⁶ ꞉Eejire aakisuura amwi na Kiriisitu, ˆnaakiikasha amwi nawe mu-kyaro kinu kitakurorwa, okuturira ku-bhumwi bhweswe na Kiriisitu Yeesu.

⁷ Nikwo kutyo ꞉aariga akenere ati eereshe bhanu bharibha-wo mu-kabhaga kanu kariija, obhwafu bhwa iinema yaaye inu itakurengekanywa na kiinu, kutyo ꞉yaatuuywe ku-bhweru kw-iswe, okuturira ku-bhujomu bhwa omutima gwaye bhunu bhuri kw-iswe, okuturira ku-Kiriisitu Yeesu.

⁸ Ni nema ya Nyamuwanga niyo ibheerusiishe okuturira ku-bhwikirisha bhwemwe, itari ati Omwerusibhwa okuturira ku-bhikorwa bhyemwe ebhijomu. Gunu ni musanga okusooka ku-Nyamuwanga omwene.

⁹ Obhwerushwa bhutari ku-bhikorwa bhyemwe, insonga muunu woonewoone aasiga okwikumangya.

¹⁰ Nyamuwanga niwe ꞉aakibhumbire eswe, na okuturira ku-Kiriisitu Yeesu, akibhumbire bhuyaaya insonga kiikare nkikoraga ebhikorwa ebhijomu, bhinu ꞉aariga atangatire okukituurira-wo kikorega.

Obhumwi bhunu kiri nabhwo okuturira ku-Yeesu Kiriisitu

¹¹ Woori ku-nsonga iyo, muyiite ati emwe bhanu mutari Bhayawudi ku-bhwibhurwa, kara mwabhirikirwaga na bhanu bhasaarire ati muri “Bhariisha.” Na okusaarwa kwebhwe kuyo, okukorwa ku-mibhiri, na ni bhaanu nibho abhakora.

¹² Muyiite ati mw-ibhaga rinu ꞉mwariga mutakumenya Kiriisitu, emwe ꞉mwariga mutakubharirwa amwi na Abhaijirayeeri abhaanu bha Nyamuwanga. ꞉Mwariga muri bhagenyi ku-muuma inu Nyamuwanga ꞉aatuuye-wo. ꞉Mwariga mwikaaye mu-kyaro mutakuramya Nyamuwanga, mutari na bhwisige bhwonebhwone.

¹³ Nawe woori okuturira ku-Kiriisitu Yeesu, emwe bhanu ꞉mwariga muri areera, mutakumenya Nyamuwanga, mureeterwe ayeeyi okuturira ku-maanyinga gaaye.

¹⁴ Kwa okubha Kiriisitu omwene niwe omurembe gweswe, ꞉kyariga kiri bhaanu bhabhiri, nawe woori niwe akikorere Abhayawudi na bhanu bhatari Bhayawudi kibhe bhamwi, ˆnaagwisha ekiyingiro na okukambura orubhago rwa obhusoko runu ꞉rwariga ruri agati weeswe.

¹⁵ Ebhiraagiro bhya Musa na amaragiriro gaabhyo, ganu ꞉gaariga gakorere obhusoko agati weeswe ꞉aagasoosiishe-wo okuturira mu-kufwa kwaye ku-musarabha, insonga agwatanye Abhayawudi na bhanu bhatari Bhayawudi abhe muunu wumwi muyaaya, bhasige kweki okubha bhabhiri. Okukora kutyo ˆnaakireetera omurembe.

¹⁶ Anu ꞉aamarire okusoosha-wo obhusoko bhuyo okuturira ku-musarabha, ˆnaagwatanya bhoone kutyo bhabhiri na Nyamuwanga.

¹⁷ ˆNaaja ˆnaaraasha Amangʼana Amajomu aga omurembe ku-bhoone kutyo, bhanu ꞉mwariga muri areera ku-Nyamuwanga na bhanu ꞉bhaariga bhari ayeeyi nawe.

¹⁸ Woori, okuturira ku-Yeesu Kiriisitu, Mwoyo Omutaakatiifu kaakifugesha bhoone kutyo ayeeyi ku-Nyamuwanga, Abhayawudi na bhanu bhatari Bhayawudi.

¹⁹ Mmbe okwambira woori, emwe bhanu mutari Bhayawudi mutakyari bhagenyi, amwi ati bhatusi, tari woori muri bheekasi amwi na abhataakatiifu, na muri bhaanu bha mu-nyumba ya Nyamuwanga.

²⁰ Emwe muri rwa iinyumba inu yumbakirwe ku-musingi gunu ꞉gwatuuywe-wo na abhatumwa na abharagi, na Kiriisitu Yeesu omwene niwe riigina riinene erya mu-rufuka.

²¹ Omwene niwe koombaka riikindaasi ryone kutyo ndiyikiira okubha eyekaru etaakatiifu ku-nsonga ya Raatabhugenyi.

²² Okuturira ku-mwene, emwe mwone muumbakirwe amwi na abhandi, insonga mubhe bhwikaro bhunu Nyamuwanga keekara-mo, okuturira ku-Mwoyo Omutaakatiifu waaye.