Abhaefeso 1 - Iimuuma Iinyaaya

Obhukeesha

¹ Ni anye Pawuro, ku-bhukene bhwa Nyamuwanga, aankorere nibhe mutumwa wa Kiriisitu Yeesu. Iinyarubha inu eniyikaamira emwe, abhaanu abhataakatiifu bhanu muri [Efeso], bhanu mwitongeeye ku-meeyigisho ga Yeesu Kiriisitu.

² Iinema na omurembe okusooka ku-Raata Nyamuwanga, na Raatabhugenyi Yeesu Kiriisitu bhibhe amwi na emwe.

Giinonkwe ginu ekinyoora ku-Yeesu Kiriisitu

³ Agungibhwe Nyamuwanga, esemwene Raatabhugenyi weeswe Yeesu Kiriisitu, unu ꞉aakiyaaye giinonkwe gyone gya mu-myoyo, ku-kyaro kinu kitakurorwa, okuturira ku-bhugwatani bhweswe na Kiriisitu.

⁴ Nyamuwanga ꞉aakyendere ˆnaakisora kigwatane na Kiriisitu akyari na kubhumba kyaro, insonga kibhe bhaanu bhataakatiifu mu-meeso gaaye, na bhaanu bhanu bhatakwaikwa kubhiibhi na muunu.

⁵ Okwambira ku-bhwambiro ꞉aariga aramuuye okukisora eswe kibhe bhaana bhaaye okuturira ku-Yeesu Kiriisitu. ꞉Aakorere kutyo kwa okubha ꞉ryamujomesiishe na nikwo kutyo ꞉aariga akenere.

⁶ Mmbe woori, ekikumangya Nyamuwanga ku-nsonga ya iinema yaaye eya obhugungyo, inu akyereeye omutima, ˆnaakiyaana bhusa, okuturira ku-mwana waaye omwende.

⁷ Okuturira ku-Yeesu, na amaanyinga gaaye, kinyoorere obhutuuribhwa bhweswe, na okwabhirwa ebhikayo okuriingʼaana na obhwafu bhwa iinema yaaye.

⁸ Nyamuwanga ꞉aakisukiiye iinema iyo iri nyafu muno, iri amwi na obhwenge bhwone kutyo na obhumenyi.

⁹ ˆNaakibhwira na imbisike yaaye inu ꞉aariga akenere, okuriingʼaana na kutyo ꞉aariga akenere okuyikuumisha okuturira ku-Kiriisitu.

¹⁰ Imbisike eyeene ni inu ati, akabhaga akeene kariyika-wo, arituura ebhiinu bhya ku-kyaro na ebhya mu-rwire bhyone kutyo amwi, bhibhe ku-bhutungi bhwa Kiriisitu.

¹¹ Okuturira ku-Kiriisitu eswe Abhayawudi kyone ꞉kyakorerwe kibhe bhagabhi bha obhwerusha. Nyamuwanga ꞉aakisorere okwambira kara okuriingʼaana na obhukene bhwaye omwene, kwa okubha omwene kaakoraga amangʼana goone kutyo okuriingʼaana na kutyo kaabha akenere omwene.

¹² ꞉Aakorere kutyo ku-nsonga ati, eswe bhanu ꞉kyatangatire okutuura obhwisige bhweswe ku-Kiriisitu, kiyaane Nyamuwanga ginkuma gya obhugungyo bhwaye.

¹³ Emwe mwone bhanu mutari Bhayawudi, ꞉mwabheeye Bhakiriisitu, bhunu ꞉mwoonguuywe riingʼana rya ekimari, Amangʼana Amajomu iiguru ya obhwerusibhwa bhwemwe. Na mwamarire okwikirisha Yeesu, mutuurirwa-ko orubhano na Mwoyo Omutaakatiifu unu Nyamuwanga ꞉aabharagire.

¹⁴ Mwoyo Omutaakatiifu uyo niwe ingomboro ya Nyamuwanga kw-iswe eya okunyoorera-ko goone kutyo ganu Nyamuwanga ꞉aaragire abhaanu bhaaye. Na riingʼana riyo erikiyaana ekimari ati Nyamuwanga arituurya abhaanu bhaaye bhoone kutyo, okubha obhugungyo na ginkuma ku-mwene.

Pawuro kaasabhira Abhakiriisitu bha Efeso

¹⁵ Enikumya Nyamuwanga, ku-nsonga ya amangʼana gayo goone kutyo. Anye noone okwambira bhunu ꞉noonguuywe kutyo omwikirisha Raatabhugenyi Yeesu, na kutyo mwendere Abhakiriisitu bhoone kutyo,

¹⁶ nikyariga kusiga okukumya Nyamuwanga ku-nsonga yeemwe. Na enibhayiita ebhaga ryone kutyo rinu enibhaga ku-bhusabhi bhwani.

¹⁷ Enigenderera okubhasabhira ati, Nyamuwanga wa Raatabhugenyi weeswe Yeesu Kiriisitu, Raata wa obhugungyo, abhayaane obhwenge mu-myoyo gyemwe, na emyoyo gya okumenya ganu geeyibhisire, insonga mumenye muno Nyamuwanga.

¹⁸ Kweki enibhasabhira ati Nyamuwanga abheeshe ameeso ga emitima gyemwe, mumenye obhwisige bhunu abhabhirikiriiye kutyo bhuri, na obhwafu bhwa omugabho gwaye kutyo obhuruguusha, ku-bhaanu abhataakatiifu,

¹⁹ na okumenya obhuturo bhwaye bhunu bhutakurengekanywa kutyo bhuri kw-iswe bhanu kiikirisiishe. Obhuturo bhuyo obhukora emirimu mu-mitima gyeswe, okuriingʼaana na obhuturo bhwaye obhwafu,

²⁰ bhunu ꞉aasuuriiye Kiriisitu okusooka mu-bhafuuye. ˆNaamutuura orubhaara rwa ebhuryo mu-kyaro kinu kitakurorwa,

²¹ iiguru muno okukira nkama gyone kutyo na obhuturo, amanaga, na obhutungi, na masiina goone kutyo ganu agatogorwa mu-kyaro kinu kiriwo woori, na mu-kinu kiribha-wo.

²² Nyamuwanga ˆnaatuura ebhiinu bhyone kutyo ansi, ˆnaamukora abhe Mutungi ku-bhiinu bhyone kutyo ku-nsonga ya riikanisa.

²³ Riikanisa niryo omubhiri gwa Kiriisitu, na obhusweye bhwa Kiriisitu nibhwo bhwijuuye mw-ikanisa. Na omwene uyo niwe ari mangʼana goone kutyo ku-goone kutyo.