Abhaebhuraaniya 7 - Iimuuma Iinyaaya

Obhushengesi bhwa Merikijeedeki

¹ Merikijeedeki uyo ꞉aariga ari mukama wa omusi gwa Sareemu. Na ꞉aariga ari mushengesi wa Nyamuwanga Unu ari iiguru wa ebhiinu bhyone kutyo. Merikijeedeki ꞉aanyookeene na Bhurayimu bhunu Bhurayimu ꞉aariga ˆnaasooka mw-iremo. Bhurayimu ꞉aariga arwanire na bhakama bhana abhayigire. Niwe Merikijeedeki ˆnaamuyaana giinonkwe.

² Bhurayimu woone ˆnaasoosha riibhaara erimwi kw-ikumi erya ebhiinu bhinu ꞉aateeshaga abhasoko mw-iremo, ˆnaayaana Merikijeedeki. Insonga ya riisiina Merikijeedeki, ni “Mukama wa obhurengeresi,” na riisiina rya “Omukama wa Sareemu,” insonga yaaryo, ni “Mukama wa omurembe.”

³ Atariwo omuunu unu amenyere abheebhusi bhaaye, amwi ati ruganda rwaye. Atariwo unu amenyere obhwambiro bhwa nsiku gyaye, na obhuteero bhwa obhurame bhwaye. Omwene ni mushengesi kajaanende rwa kutyo Omwana wa Nyamuwanga ari.

⁴ Mwiganiirishe kutyo Merikijeedeki ꞉aariga ari mukuru okuyikira jaaji Bhurayimu amuyaane riibhaara erimwi kw-ikumi erya ebhiinu bhinu ꞉aateesiishe abhasoko mw-iremo!

⁵ Okuriingʼaana na ebhiraagiro bhya Musa, abhaanu bhoone kutyo okusooka mu-ruganda rwa Abharaawi bhanu abhayaanwa obhushengesi, nibho bheesire okuramira riibhaara erimwi kw-ikumi okusooka ku-bhiinu bhya Abhaijirayeeri bheejaabho, raabhé kutyo bhoone kutyo abhasooka ku-Bhurayimu.

⁶ Merikijeedeki ꞉aariga atakusookerera mu-ruganda rwa Abharaawi, nawe ꞉aaramiiye riibhaara erimwi kw-ikumi okusooka ku-Bhurayimu. Na niwe ꞉aayaaye giinonkwe Bhurayimu, unu Nyamuwanga ꞉aaragire okuyaana giinonkwe.

⁷ Gitariwo mamba! Omukuru niwe kaayaanaga omutooto giinonkwe.

⁸ Na abhashengesi okusooka mu-ruganda rwa Abharaawi bhanu abharamira riibhaara erimwi kw-ikumi, ni bhaanu bhanu abhafwa. Nawe Merikijeedeki unu ꞉aaramiiye riibhaara erimwi kw-ikumi okusooka ku-Bhurayimu, Amakaamo agaaika ati keesha omwoyo na woori.

⁹ Mmbe, ekitura okwaika ati, Raawi woone unu abhaanu bha mu-ruganda rwaye abharamira riibhaara erimwi kw-ikumi, omwene woone ꞉aasoosiishe riibhaara erimwi kw-ikumi, okuturira ku-jaaji waabho Bhurayimu.

¹⁰ Enaaika kutyo, kwa okubha Raawi ꞉aariga akyari mu-mubhiri gwa jaaji waabho Bhurayimu, bhunu Bhurayimu ꞉aanyookeene na Merikijeedeki.

Obhushengesi bhwa Yeesu obhurengekanywa na obhwa Merikijeedeki

¹¹ Obhushengesi bhwa Abharaawi nibhwo ꞉bhwariga bhugwatiriiye ebhiraagiro bhya Musa bhinu Abhaijirayeeri ꞉bhaariga bhayaaywe. Nawe obhushengesi bhuyo ꞉bhutaakuumisiishe ganu ebhiraagiro ꞉bhyeendaga. Ku-nsonga iyo, omushengesi owundi unu ꞉aariga ari rwa Merikijeedeki ꞉aariga ˆneendwa, unu atakusooka mu-ruganda rwa Aruuna.

¹² Mmbe, raabhe obhushengesi obhuyinduka, eyeendwa ebhiraagiro bhyone bhiyinduke.

¹³ Omushengesi unu kaaikwa anu, ni Raatabhugenyi weeswe Yeesu unu ꞉aariga atari Muraawi. Na atariwo omuunu woonewoone okusooka mu-ruganda rwaye unu ꞉aakorere-ko emirimu gya obhushengesi.

¹⁴ Iri abhweru ati omwene ꞉aasookereeye mu-ruganda rwa Yuuda, na bhunu Musa ꞉aaikiiye abhashengesi, ꞉ataatogooye oruganda ruyo.

¹⁵ Amangʼana ganu enaaika gari abhweru muno, kwa okubha omushengesi owundi eejire, unu ari rwa Merikijeedeki.

¹⁶ Omwene ꞉ataabheeye mushengesi, kwa okubha ati ꞉aakuumisiishe ebhiraagiro bhinu ebhiragirira ati, abhashengesi bhasookerere mu-ruganda rwa Abharaawi. Tari ꞉aakorerwe okubha mushengesi okuturira ku-managa ga obhurame bhunu bhutari na bhuteero.

¹⁷ Mu-Makaamo Amataakatiifu yaaikirwe ati, “Awe uri mushengesi kajaanende, rwa kutyo Merikijeedeki ꞉aariga ari.”

¹⁸ Mmbe, Nyamuwanga ꞉aasoosiishe-wo riiragiriro rya kara erya abhashengesi okusooka mu-ruganda rwa Abharaawi, kwa okubha ꞉ryariga ritari na managa na ꞉ryariga ritari na murimu gwonegwone.

¹⁹ ꞉Aarisoosiishe-wo, kwa okubha ebhiraagiro bhya Musa ꞉bhyariga bhitari na bhuturo bhwa okukuumisha engʼana ryoneryone. Nawe woori Nyamuwanga akiyaaye obhwisige obhundi obhujomu okukira bhuyo, na ku-bhwisige bhunu, ekitura okufugerera Nyamuwanga.

²⁰ Bhunu Nyamuwanga ꞉aasorere omushengesi omuyaaya uyo, ꞉aarayiiye.

²¹ Nawe bhunu ꞉aayaanaga Abharaawi obhushengesi, ꞉ataarayiraga. Na ku-kuyaana Yeesu obhushengesi, ꞉aarayiiye, rwa kutyo ikaamirwe mu-Makaamo Amataakatiifu ati, “Raatabhugenyi arayiiye, na atakuuja okuyinduka. ‘Awe uri mushengesi kajaanende.’”

²² Mmbe, kwa okubha Nyamuwanga amurayiriiye kutyo, Yeesu niwe omuyambaasi wa iimuuma injomu muno okukira eya kara.

²³ Mu-kabhaga ka iimuuma ya kara, abhashengesi ꞉bhaariga bhari bhaafu. ꞉Bhaariga bhatakugenderera okukora emirimu giyo kwa okubha ꞉bhaariga mbafwa.

²⁴ Nawe Yeesu niwe Omushengesi kajaanende, kwa okubha omwene kaarama kajaanende.

²⁵ Ku-nsonga iyo, omwene ari na obhuturo bhwa okwerusha kimwi abhaanu bhoone kutyo bhanu abhagenda ku-Nyamuwanga okuturira ku-mwene. Omwene kaarama kajaanende, insonga abhasabhirega ku-Nyamuwanga.

²⁶ ꞉Ryariga riri engʼana ejomu kw-iswe okubha na omushengesi omukuru rwa uyo, kwa okubha omwene ni mutaakatiifu, atari na bhikayo, na atari na katogosi koonekoone. Nyamuwanga ꞉aamwawuuye okusooka ku-bhakosi bha ebhikayo, ˆnaamwimusha okugenda mu-rwire.

²⁷ Abhashengesi abhakuru ꞉bhaariga mbasoosha ekimweso ku-nsiku, okwamba ku-nsonga ya ebhikayo bhyebhwe abheene, mbamara mbasoosha ku-nsonga ya ebhikayo bhya abhaanu abhandi. Nawe Yeesu atari na bhukene bhwa okukora rwa abhashengesi bhayo, kwa okubha omwene ꞉eesoosiishe rumwi era, ˆnaabha ekimweso ku-nsonga ya ebhikayo bhya abhaanu bhoone kutyo, bhunu ꞉aafuuye ku-musarabha.

²⁸ Okuriingʼaana na ebhiraagiro bhya Musa, abhaanu ꞉bhaariga mbakorwa okubha abhashengesi abhakuru, raabhé kutyo ꞉bhaariga bhari bhakosi bha ebhikayo. Nawe bhunu akabhaga kareera ꞉kaaturire, Nyamuwanga ꞉aarayiriiye Omwana waaye, ˆnaamukora abhe Omushengesi Omukuru unu akuumiiye kajaanende.