Abhaebhuraaniya 6 - Iimuuma Iinyaaya

¹ Ku-nsonga iyo, kisige okusubhirasubhira ameeyigisho ga okwamba aga Kiriisitu, tari kiikomeeshe okugenderera okwiyigira, insonga kikomeere mu-bhwikirisha. Kyasiga okuumbaka kweki omusingi gwa ameeyigisho ga okwamba aga okunuga ebhikorwa bhinu ebhireeta orufu, na ameeyigisho ga omuunu okwikirisha Nyamuwanga.

² Kisige okwisubhiirisha okwiyigira ameeyigisho ga obhubhatiisibhwa, aga okutuurira-ko abhaanu amabhoko, aga okusuuka kwa abhafuuye, na aga indamuro ya kajaanende.

³ Tari, Nyamuwanga akeenda, ekiija okugenderera okukura na okukomeera mu-bhwikirisha.

⁴ Mmbe, abhaanu bhanu bhaamarire okuyaanwa obhuturo bhwa okumenya ekimari, mbarabha-ko ekiyaanwa kya mu-rwire, mbakorwa bhayimbane na Mwoyo Omutaakatiifu,

⁵ mbarabha obhujomu bhwa Riingʼana rya Nyamuwanga, na amanaga ga obhutungi bhwaye bhwa mu-kyaro kinu kiriija,

⁶ abhaanu bhayo bhakasiga okwikirisha Nyamuwanga, kitakutura okubhakora bhanuge ebhikayo bhyebhwe kweki, kwa okubha abhabha muna abhasunga Omwana wa Nyamuwanga orwa akabhiri, na abhamuswasha abhweru!

⁷ Insi inu eyigwirwa ingubha kaafu, niikusha ebhyokurya bhinu ebhisakira omurimi, insi iyo eyibha na giinonkwe ginu egisooka ku-Nyamuwanga.

⁸ Nawe insi inu eyikusha amawa na amanyansi, itakusakira kyonekyone omurimi, eyibha ayeeyi na okwiyiimwa na Nyamuwanga, na ku-bhuteero eyookibhwa mu-muriro.

⁹ Bheendwa bhaani, raabhé kutyo naabhakaamira amangʼana amaruru ganu, nawe niri na ekimari ati omukora amangʼana amajomu ganu ageeresha ati mwerusiibhwe.

¹⁰ Nyamuwanga ni murengeresi, atakutura okurabhirwa ebhikorwa ebhijomu bhinu mwakorere na obhwendi bhunu ꞉mweeresiishe ku-nsonga yaaye, okuturira ku-bhusakisi bhwemwe obhwa okwamba ku-Bhakiriisitu bheejaanyu, na woori mukyagenderera.

¹¹ Naaneendere muno ati mwone kutyo mukomeere okwendana abheene na abheene okuyikira ku-bhuteero bhwemwe, insonga muramire goone kutyo ganu omwisiga.

¹² Mwasiga okubha bharenga, tari mubhe rwa bhanu okuturira okwikirisha na okusimbiira, abharamira ganu Nyamuwanga ꞉aaragire okubhayaana.

Kinu Nyamuwanga kaaraga ni kimari

¹³ Mmbe, bhunu Nyamuwanga ꞉aaragire Bhurayimu, ꞉eerayiiye kw-isiina ryaye omwene, kwa okubha ꞉aariga atariwo woonewoone unu ꞉aariga ari mukuru okumukira.

¹⁴ Nyamuwanga ꞉aabhwiriiye Bhurayimu ati, “Kimari eniija okukuyaana giinonkwe na okwongesha orwibhuro rwawo.”

¹⁵ Mmbe, kutyo Bhurayimu ꞉aarindire asimbiirire, ˆnaanyoora goone kutyo ganu Nyamuwanga ꞉aariga amuragire.

¹⁶ Abhaanu bhakarayira, abharayira kw-isiina rya omuunu omukuru okubhakira, na okurayira kuyo okweresha ati goone kutyo ganu abhaaika ni ga kimari. Okukora kutyo okumara-wo giimamba.

¹⁷ Nikwo kutyo Nyamuwanga woone ꞉aarayiiye okweresha ati okuraga kwaye ni kwa kimari. ꞉Aakorere kutyo, kwa okubha ꞉aariga ˆneenda okweresha abhaanu bhanu ꞉aariga aragire ati, okuraga kwaye kutakuyinduka.

¹⁸ Mmbe, Nyamuwanga ꞉aakorere amangʼana agabhiri gayo, na agabhiri gayo gatakuyinduka, kwa okubha Nyamuwanga atari mubheeyi. ꞉Aaragire na okurayira, insonga akiwooyereshe emitima, eswe bhanu kimubhirimiiye-ko, kigenderere okwisiga amangʼana ganu agaaja okubha-wo imbere.

¹⁹ Kiri na obhwisige bhuyo mu-mitima gyeswe. Bhuyo nibhwo bhuri rwa iinanga inu eyigwatirira iimeeri yaasiga okuyeywa. Obhwisige bhuyo ni Yeesu, unu ꞉eengiiye Ataakatiifu oweeneweene mu-rwire eyo, okuturira ku-rugito rwa ingibho.

²⁰ Omwene ꞉aatangatire okwingira-mo ku-nsonga yeeswe. Abheeye Omushengesi Omukuru kajaanende, rwa kutyo Merikijeedeki ꞉aariga ari.