Abhaebhuraaniya 5 - Iimuuma Iinyaaya

¹ Omushengesi omukuru kaasorwa okusooka mu-bhaanu bheejaabho, insonga ayambaarire amangʼana ga Nyamuwanga ku-nsonga ya abhaanu. Omushengesi uyo ariwo, insonga asoosishe Nyamuwanga emigabho na ebhimweso ku-nsonga ya ebhikayo bhya abhaanu bhayo.

² Omushengesi omukuru kaatura okufwira ekigongo abhaanu bhanu abhakora ebhikayo bhatakumenya ati ni bhikayo, kwa okubha omwene woone ari na ganu kaataamibhwa.

³ Kyakora keendwa asooshe ekimweso ku-nsonga ya ebhikayo bhyaye, rwa kutyo kaasoosha ku-nsonga ya ebhikayo bhya abhaanu abhandi.

⁴ Atariwo omuunu unu kaatura okwiyaana omwene ekibharo kya obhushengesi obhukuru, tari Nyamuwanga niwe kaasora omuunu rwa kutyo ꞉aasorere Aruuna.

⁵ Nikwo kutyo Kiriisitu woone ꞉ateeyaagariiye omwene ekibharo kya okubha Omushengesi Omukuru, tari Nyamuwanga niwe ꞉aamusorere ˆnaamubhwira ati, “Awe uri Mwana waani, reero anye naakwibhura naabha Esomwana.”

⁶ Rwa kutyo kweki ꞉aaikire ayandi ati, “Awe uri mushengesi kajaanende, rwa kutyo Merikijeedeki ꞉aariga ari.”

⁷ Bhunu Yeesu ꞉aariga ari mu-kyaro anu, ꞉aasabhaga ku-Nyamuwanga aamuuye obhuraka ˆnaarira masiga, ˆneesaasaamaga anyoore obhusakisi okusooka ku-Nyamuwanga, kwa okubha ꞉aariga amenyere ati niwe ari na obhuturo bhwa okumwerusha okusooka mu-rufu. Nyamuwanga ˆnaamuungwa kwa okubha ꞉aariga eetuuye emwaro mu-meeso ga Nyamuwanga.

⁸ Raabhé kutyo Yeesu ꞉aariga ari Mwana wa Nyamuwanga, nawe ꞉eeyigiiye okukora kutyo Nyamuwanga ꞉eendaga okuturira mu-bhinyansho bhinu ꞉aanyoorere.

⁹ Amangʼana gayo, ngakora Nyamuwanga ˆnaakora Yeesu eese okubha obhusimukwa bhwa obhwerusha bhunu bhutakuweera ku-bhaanu bhoone kutyo bhanu abhamuungwa.

¹⁰ Na Nyamuwanga amutuuye-wo abhe Omushengesi Omukuru rwa kutyo Merikijeedeki ꞉aariga ari.

Abhaanu bhanu bhakomeeye mu-bhwikirisha na bhanu bhakyari

¹¹ Kiri na mangʼana maafu aga okwaika iiguru ya Yeesu okubha Omushengesi Omukuru, nawe okubhabhwira emwe ni kukomeeye kwa okubha mutari bhangu okusombookerwa.

¹² Woori anu mwamwendwa mubhe mwiyigisha abheejaanyu, nawe na woori mukyeenda omuunu wa okubheeyigisha ameeyigisho ga okwamba aga Riingʼana rya Nyamuwanga! Muri rwa abhaana abhajaare bhanu bhakyaneena amasaraka, bhatakutura okurya ebhyokurya ebhikomeeye.

¹³ Omuunu unu kaaneena amasaraka era, akyari mwana mujaare, atakumenya amajomu na amabhiibhi.

¹⁴ Nawe abhaanu abhakuru nibho abharya ebhyokurya ebhikomeeye. Abhaanu bhayo bheeyigiiye, mbamenya obhutaashaanya bhwa amangʼana amajomu na amabhiibhi.