Abhaebhuraaniya 4 - Iimuuma Iinyaaya

Orumuunyo runu Nyamuwanga ꞉aaragire

¹ Mmbe, Nyamuwanga ꞉aaragire abhaanu okwingira mu-rumuunyo rwaye, na ikyari kutyo. Mmbe woori, ekyendwa kiiyangarire, insonga aasiga okubha-wo omuunu woonewoone agati weemwe unu aritaamibhwa okwingira.

² Ni kimari ati, eswe kiraasisiibhwe Amangʼana Amajomu gayo, rwa kutyo bhaajaaji bhoone ꞉bhaaraasisiibhwe. Nawe amangʼana gayo ꞉gataabhasakiiye kyonekyone, kwa okubha ꞉bhoonguuywe, nawe bhanu ꞉bhoonguuywe ꞉bhaariga bhatari na obhwikirisha mu-mitima gyebhwe.

³ Eswe bhanu kiikirisiishe ekiingira mu-rumuunyo runu Nyamuwanga ꞉aaragire. Nawe ku-bhaajaaji omwene ꞉aaikire ati, “꞉Naabhiiyiiywe nindayira ati, ‘Abhaanu bhanu bhatakuuja okwingira owa okumuunyira, anu nibharoosisiishe.’” ꞉Aaikire gayo, raabhé kutyo ꞉aariga aamarire emirimu gyaye gyone kutyo okwambira bhunu ꞉aabhumbire ekyaro.

⁴ Enaaika kutyo, kwa okubha mu-Makaamo Amataakatiifu agaaikira orusuku rwa mungati arebhe ati, “Nyamuwanga ꞉aamuunyire orusuku rwa mungati, ˆnaasiga okukora emirimu gyaye gyone kutyo.”

⁵ Nawe mu-Makaamo Amataakatiifu iiguru ayo, Nyamuwanga ꞉aaikire ati, “Abhaanu bhanu bhatakuuja okwingira owa okumuunyira, anu nibharoosisiishe.”

⁶ Mmbe, kwa okubha risigaaye riingʼana rinu ati, bhariwo abhaanu bhanu bhariingira-wo, na bhaajaaji bhanu ꞉bhaatangatire okuungwa Amangʼana Amajomu aga orumuunyo ruyo ꞉bhaataamiibhwe okwingira-wo ku-nsonga ya obhujeemi bhwebhwe,

⁷ Nyamuwanga ꞉aatuuye-wo kweki orusuku orurebhe orwa okwingira owa okumuunyira. Orusuku ruyo ꞉aarubhirikiiye ati, “Reero.” Rwa kutyo Nyamuwanga ꞉aaikire okuturira ku-Dawudi akabhaga kaaturire-wo, ku-mangʼana ganu gaaikirwe iiguru ayo ati, “Reero, raabhe mukoongwa obhuraka bhwa Nyamuwanga, mwasiga okukora emitima gyemwe okubha mikomeeye.”

⁸ Raabhe Yoshuwa akayikiishe abhaanu owa okumuunyira, Nyamuwanga ꞉ataakaaikiiye mmara orusuku orundi orwa okumuunya.

⁹ Mmbe rukyariwo orumuunyo, rwa orumuunyo rwa Insabhaato ku-bhaanu bha Nyamuwanga.

¹⁰ Omuunu woonewoone unu keengira mu-rumuunyo rwaye, kaamuunya okukora emirimu, rwa kutyo Nyamuwanga ꞉aamuunyire bhunu ꞉aamarire emirimu gya okubhumba.

¹¹ Mmbe, woori kiikomeeshe okwingira mu-rumuunyo ruyo. Kikore kutyo, insonga omuunu woonewoone aasiga okutaamibhwa okwingira ku-nsonga ya obhujeemi, rwa kutyo bhaajaaji ꞉bhaakorere.

¹² Riingʼana rya Nyamuwanga eriisha omwoyo, na riri na amanaga okukira ekiraawa kyonekyone kinu kiri na moogi gabhiri. Na riingʼana riyo eritura okutaaganya omutima na omwoyo, na eritura okutaaganya amaguwa na amafuta ganu garimo. Riingʼana riyo ryanguyire okumenya obhwiganiirisha na obhukene bhwa omwoyo.

¹³ Kitariwo ekibhumbwa kyonekyone kinu kiiyibhisire mu-meeso ga Nyamuwanga. Ebhiinu bhyone kutyo bhiri abhweru mu-meeso gaaye, na ku-mwene niwe kiryendwa kyaike amangʼana ga ebhikorwa bhyeswe bhyone kutyo.

Yeesu niwe Omushengesi Omukuru

¹⁴ Mmbe, raabhe kiri na Omushengesi Omukuru unu ꞉eengiiye mu-rwire, Yeesu Omwana wa Nyamuwanga, ku-nsonga iyo, kyangarire muno amangʼana ganu ekiigamba.

¹⁵ Omushengesi Omukuru uyo niwe kaamenya obhutaamibhwa bhweswe, kwa okubha ꞉aasakiibhwe na Sitaani ku-njira gyone kutyo rwa eswe, nawe omwene ꞉ataakorere ebhikayo.

¹⁶ Ku-nsonga iyo kibhe na riibhaasi okufugera imbere ku-kitebhe kya ekikama ekya Nyamuwanga wa iinema, insonga akifwire ekigongo, kinyoore na iinema ya okukisakira mu-kabhaga ka iinyanko.