Abhaebhuraaniya 3 - Iimuuma Iinyaaya

Yeesu ni mukuru okukira Musa

¹ Mmbe woori, Abhakiriisitu bheejaasu, emwe bhanu Nyamuwanga asorere mubhe bhataakatiifu bhaaye, mwiganiirishe muno Yeesu, omwene niwe Omutumwa wa Nyamuwanga, na Omushengesi Omukuru owa obhwikirisha bhunu kiikirisiishe.

² Omwene ꞉aariga ari mwitongeeye ku-Nyamuwanga unu ꞉aamusorere, rwa kutyo Musa woone ꞉aariga ari mutangasha mwitongeeye wa abhaanu abha mu-nyumba ya Nyamuwanga bhoone kutyo.

³ Omuumbaki kaayaanwaga ekibharo okukira iinyumba inu oombakire. Nikwo kutyo Yeesu woone eesire okuyaanwa ekibharo okukira Musa.

⁴ Giinyumba gyone kutyo giri na abhoombaki bhaagyo, nawe Nyamuwanga niwe omuumbaki omukuru wa ebhiinu bhyone kutyo.

⁵ Musa ꞉aariga ari mujuuma mwitongeeye ku-bhaanu bha mu-nyumba ya Nyamuwanga bhoone kutyo. Omurimu gwaye ꞉gwariga guri okubhwira abhaanu bhayo orususo rwa amangʼana ganu Nyamuwanga ꞉aariga aramuuye okwaika imbere eyo.

⁶ Nawe Kiriisitu omwene ni Mwana mwitongeeye unu kaayambaarira abhaanu mu-nyumba ya Nyamuwanga. Abhaanu bhayo ni eswe, raabhe kikagenderera okubha na riibhaasi, na okwiyeemera ganu ekiisiga okuyikira ku-bhuteero.

Iinyanko ya okurema okubha na obhwikirisha

⁷ Mmbe woori, rwa kutyo Mwoyo Omutaakatiifu kaaika mu-Makaamo Amataakatiifu ati, “Reero, raabhe mukoongwa obhuraka bhwa Nyamuwanga,

⁸ mwasiga okukora emitima gyemwe okubha mikomeeye, rwa kutyo bhaajaaji waanyu ꞉bhaariga mbarema okutangasibhwa na anye, mu-kabhaga kanu ꞉bhaariga mbansakya ku-nsi ya orukungu.

⁹ Ku-nsi ya orukungu eyo niyo bhaajaaji waanyu ꞉bhaariga mbansakya, raabhé kutyo ꞉naabhakoreeye ebhigwa bhyafu ku-myaka makumi gana.

¹⁰ Ku-nsonga iyo ꞉naabhiiyiriiywe abhaanu bhayo, naaika ati, ‘Abhaanu bhanu ni bhajeemi nsiku gyone kutyo, bhatakwenda okuseeta injira yaani.’

¹¹ ꞉Naabhiiyiiywe nindayira ati, ‘Abhaanu bhanu bhatakuuja okwingira owa okumuunyira, anu nibharoosisiishe.’”

¹² Abhakiriisitu bheejaasu emwe, mwiyangarire, aasiga okubha-wo omuunu woonewoone agati weemwe unu ari na mutima omubhiibhi, unu atakwikirisha, na unu kaarema okuseeta Nyamuwanga unu keesha omwoyo.

¹³ Nawe mukomeeshaanye emwe abheene na abheene ku-nsiku inu eyaaikwa ati, “Reero,” insonga aasiga okubha-wo omuunu woonewoone agati weemwe unu ari na omutima omukomeeye, kwa okubha ajimiibhwe na ebhikayo.

¹⁴ Enaaika kutyo kwa okubha ekiija okuyimbana na Kiriisitu, raabhe kikagenderera okumwisiga okuyikira ku-bhuteero, rwa kutyo ꞉kyariga nkimwisiga bhunu ꞉kyaambire okwikirisha.

¹⁵ Rwa kutyo ikaamirwe mu-Makaamo Amataakatiifu ati, “Reero, raabhe mukoongwa obhuraka bhwa Nyamuwanga, mwasiga okukora emitima gyemwe okubha mikomeeye, rwa kutyo bhaajaaji waanyu ꞉bhaariga mbarema okutangasibhwa na anye.”

¹⁶ Ni bhaaga bhanu ꞉bhoonguuywe obhuraka bhwa Nyamuwanga, mbarema okutangasibhwa nawe? Bhatari bhoone kutyo bhanu ꞉bhaariga mbasooka Miisiri bhatangasiibhwega na Musa?

¹⁷ Ni bhaaga kweki bhanu Nyamuwanga ꞉aabhiiyiriiywe myaka makumi gana? Angu, bhatari bhanu ꞉bhaakorere ebhikayo, mbafwa ku-nsi ya orukungu?

¹⁸ Ni bhaaga bhanu Nyamuwanga ꞉aarayiriiye ati bhatakuuja okwingira owa okumuunyira, anu ꞉aariga abharoosisiishe? Angu, bhatari bhanu ꞉bhaajeemere?

¹⁹ Mmbe, kimenyere ati abhaanu bhayo ꞉bhataaturire okwingira owa okumuunyira, kwa okubha ꞉bhaaremere okwikirisha Nyamuwanga.