Abhaebhuraaniya 2 - Iimuuma Iinyaaya

Obhwerusha obhunene bhwa Nyamuwanga

¹ Ku-nsonga iyo, ekyendwa kiiyangarire muno ku-mangʼana ganu kyunguuywe, kyasiga okugabhusha.

² Kimenyere ati iingʼana inu bhaajaaji ꞉bhoonguuywe okuturira ku-bhaamaraayika bha Nyamuwanga ꞉yaariga iri ya kimari. Kyakora abhaanu bhoone kutyo bhanu ꞉bhaariga bhatakuyiseeta na okukora kutyo ꞉yeendaga, Nyamuwanga ꞉aabhayaaye ebhirusho bhinu ꞉bhyariga bhibheesire okunyoora.

³ Mmbe, raabhe ꞉gaabheeye kutyo ku-bheene, angu eswe ekiija okuwona kutiki raabhe kitakwigana obhwerusha obhunene bhunu kinyoorere? Obhwerusha bhuyo okwamba ꞉bhwaraasiibhwe na Raatabhugenyi Yeesu, bhanu ꞉bhaamwitegeereshaga bhoone mbamenyegesha kw-iswe ati ni kimari.

⁴ Nyamuwanga woone ˆnaamenyegesha ati ni kimari okuturira ku-bhimenyegesho, ebhiruguusho na ebhigwa bhya mbaga nyafunyafu. Na ꞉aagabhiiye abhaanu ebhiyaanwa bhya Mwoyo Omutaakatiifu okuriingʼaana na kutyo ꞉aariga akenere omwene.

Okwituura emwaro ku-Yeesu

⁵ Kimenyere ati, Nyamuwanga ꞉ataayaaye bhaamaraayika obhuturo bhwa okutunga ekyaro ekiyaaya kinu ekyaikira. Nawe omuunu wumwi ꞉aaikire mu-Makaamo Amataakatiifu ati,

⁶ “Omuunu ni kiinuki, awe Nyamuwanga umwiganiirishe? Omwana wa omuunu ni niga umwigane?

⁷ Ukorere omuunu abhe mutooto okukira bhaamaraayika mu-kabhaga kafuyi. Na umuyaaye obhugungyo na ekibharo,

⁸ utuuye ebhiinu bhyone kutyo emwaro mu-bhutungi bhwaye.” Mmbe, Nyamuwanga ꞉aatuuye-wo omuunu insonga atunge ebhiinu bhyone kutyo. Insonga yende-ko ni ati, kitariwo kiinu na kimwi kinu ꞉kitaatungirwe na omuunu. Nawe woori anu kitakurora omuunu ˆnaatunga ebhiinu bhiyo bhyone kutyo.

⁹ Nawe ekirora Yeesu, unu Nyamuwanga ꞉aamukorere okubha mutooto okukira bhaamaraayika mu-kabhaga kafuyi. Nyamuwanga ꞉aakorere kutyo, insonga okuturira ku-nema yaaye, Yeesu afwe ku-nsonga ya okwerusha abhaanu bhoone kutyo. Woori, Nyamuwanga amuyaaye obhugungyo na ekibharo, kwa okubha ꞉aanyankire ˆnaayikira okufwa.

¹⁰ Nyamuwanga niwe ꞉aabhumbire ebhiinu bhyone kutyo, ˆnaabhikora kutyo bhiri. ꞉Aarorere ati ni kujomu areete abheekirisha bhaafu mu-bhugungyo bhwaye. Mmbe Nyamuwanga ˆnaakora Yeesu abhe omwambisha omujomu wa obhwerusha bhweswe, okuturira ku-bhinyansho bhyaye.

¹¹ Yeesu na abhaanu bhanu keesha ebhikayo, Esemwene ni wumwi. Kyakora Yeesu atakwiswara okubhabhirikira ati ni bhaawaamuwaabho.

¹² Yeesu ꞉aaikire ati, “Ee Nyamuwanga, eniija okuraasha ebhikorwa bhyawo ebhinene ku-bhaawaamuwaasu, niriimba ameembo ga okukukumangya anu abhaanu bhaawo abhasangira.”

¹³ ꞉Aaikire kweki ati, “Niriisiga Nyamuwanga.” ˆNaaika kweki ati, “Anye niri anu, amwi na abhaana bhanu Nyamuwanga anaaye.”

¹⁴ Mmbe, kwa okubha abhaana bhanu bhari na emibhiri na amaanyinga, Yeesu woone ꞉eejire ari na omubhiri na amaanyinga rwa abheene. ꞉Aakorere kutyo, insonga okuturira okufwa kwaye, ayige amanaga ga Sitaani. Sitaani ari na obhuturo bhwa okukora abhaanu bhafwe.

¹⁵ Yeesu ꞉aafuuye insonga abhaanu bhanu ꞉bhaariga bhari bhagaya mu-bhurame bhwebhwe bhwone kutyo ku-nsonga ya okuubhaya okufwa, bhanyoore obhwiyagaaro.

¹⁶ Mmbe, iri abhweru ati Yeesu ꞉ateejire okusakira bhaamaraayika, tari ꞉eejire okusakira abhaanu bha orwibhuro rwa Bhurayimu.

¹⁷ Ku-nsonga iyo, ꞉eejire enu ari rwa bhaawaamuwaabho kutyo bhari mu-mangʼana goone kutyo, insonga abhe Omushengesi Omukuru unu ari na ekigongo, omwitongeeye ku-mirimu gyaye mu-meeso ga Nyamuwanga. Okuturira injira iyo, ꞉aaturire okwisoosha okubha ekimweso kya okugwatanya abhaanu na Nyamuwanga, insonga Nyamuwanga aabhire abhaanu ebhikayo bhyebhwe.

¹⁸ Na kwa okubha Yeesu ꞉aasakiibhwe ˆnaanyansibhwa, kaatura okusakira na bhanu abhasakibhwa.