2 Timoteeyo 4 - Iimuuma Iinyaaya

¹ Enikuragirira mu-meeso ga Nyamuwanga na aga Kiriisitu Yeesu unu ariramurira abharore na abhafuuye bhunu arisubha okutunga ku-bhukama bhwaye.

² Uraashe Riingʼana rya Nyamuwanga, ubhe wiituuye-wo mu-kabhaga akajomu na akabhaga akabhiibhi. Wunuka, simbiisha abhaanu, gonya abhaanu usimbiirire muno, na ubheeyigishe.

³ Enaaika kutyo kwa okubha, kariija akabhaga kanu abhaanu bharirema ameeyigisho ga ekimari mbaseetaga kutyo emitima gyebhwe egyenda. Bhariikumanyisha abheeyigisha bhaafu bhanu bharibheeyigishaga ganu amatwi geebhwe garyendaga okuungwa era.

⁴ Bhariikenga okwitegeeresha aga ekimari, mbayindukira ku-ngani.

⁵ Tari awe wiiyiinye ku-mangʼana goone kutyo, simbiira ebhinyansho, kora emirimu gyawo gya okuraasha Amangʼana Amajomu, kuumisha emirimu gyawo kujomu.

⁶ Enikubhwira gayo kwa okubha, amaanyinga gaani woori gari ayeeyi okusukwa rwa ekimweso kya iidivaayi. Woori anu naamaamiiye ngʼendo.

⁷ Nirwanire kujomu riiremo, orugendo naarumarire, obhwikirisha bhwani nibhwangariiye.

⁸ Okumara gayo nituuriiywe-wo orusuurya rwa obhurengeresi, runu Raatabhugenyi Omuramusi omurengeresi ariinaana ku-rusuku ruyo. Atariinaana anye era, tari na abhandi bhoone kutyo bhanu bhakenere muno okurora kutyo Yeesu arisubha.

Amaragiriro ku-Timoteeyo omwene

⁹ Iikomeesha wuunyiije-ko bhwangu,

¹⁰ kwa okubha Dema ꞉eendere amajomerwa ga ku-nsi kunu ˆnaansiga ˆnaagenda Teesaroonike. Kiresike ꞉aagendere Garaatiya okukorera Nyamuwanga emirimu, Tiito weeki agendere Darimaatiya.

¹¹ Anu nisigaaye na Ruuka era. Wuunyiijire na Maariko, kwa okubha uyo kaatura okunsakira ku-mirimu.

¹² Tukiko ꞉naamutumire Efeso.

¹³ Runu uriija, wuunyiijire na riikabhuuti ryani, ꞉naarisigire ewa Karipo mw-irara rya Turowa eyo, wundeetere na ebhitabho, munomuuno ebhya orwayi bhirya.

¹⁴ Arekijanda omuyeesi wa ebhisisira, ꞉aankoreeye mangʼana mabhiibhi muno. Raatabhugenyi arimuriya ku-mangʼana goone kutyo ganu ꞉aankoreeye.

¹⁵ Awe woone wiikenge nawe kwa okubha ꞉ateekirishaanyaga na ameeyigisho geeswe.

¹⁶ Ku-bhwibhagisi bhwani obhwa okwamba atariwo woonewoone unu ꞉aayambaaye ku-rubharika rwani, tari bhoone kutyo ꞉bhaansigire. Kw-ingʼana riyo enibhasabhira ku-Nyamuwanga aasiga okubhabharira obhukayi.

¹⁷ Nawe Raatabhugenyi omwene ꞉aayambaaye na anye ˆnaankomeesha, insonga okuturira ku-mirimu gyani egya okuraasha, Amangʼana Amajomu goone kutyo, gayikire bhanu bhatari Bhayawudi, bhagoongwe. Noone, Raatabhugenyi ˆnaanyerusha okusooka mu-ndamuro ya orufu rwa kutyo omuunu keerusibhwa mu-kanwa ka indwi.

¹⁸ Kweki Raatabhugenyi arigenderera okunyerusha ku-mangʼana amabhiibhi goone kutyo na okunyangarira okuyikira anu niriyikira mu-bhukama bhwaye bhwa mu-rwire. Niwe ari na obhugungyo kajaanende. Amina.

Amangʼana ga okuragana

¹⁹ Nkeesisha Piriisika na Akira na abheenda ewa Nesifworo ayo.

²⁰ Eraasito ꞉aasigaaye mu-musi gwa Korinto. Torofimo ꞉naamusigire Mireto eyo arwaye.

²¹ Iikomeesha okuuja bhwangu akabhaga ka imbewo iinyafu kakyari okwamba. Ewubhuro, Puude, Riino, Kirawudiyo na Abhakiriisitu bheejaasu bhoone kutyo, abhakukeesha.

²² Raatabhugenyi abhe amwi na awe. Na iinema yaaye yoone ibhe amwi na emwe bhoone kutyo.