2 Timoteeyo 3 - Iimuuma Iinyaaya

Amabhiibhi ga mu-nsiku gya obhuteero

¹ Nawe umenye ati, riibhaga rya mu-nsiku gya obhuteero riribha ekomeeye muno.

² Riibhaga riyo abhaanu bhariiyenda abheene era, bharibha bheendi bha yera, bheekumangi, bhafumi bha abhaanu. Abhaanu bhayo bhataryungwa abheebhusi bheebhwe, bhaanu bhanu bhatakukumya, bhanu bhateerere emitima.

³ Abhaanu bhayo bhatakwenda bhayiiri bheebhwe, bhatakwenda okugwatanyibhwa na abhasoko bheebhwe, abhabheeyeresha bha abhaanu, bhanu bhatakutura okwiyiinya, bharuru, bhanu bhatakwenda bhikorwa bhijomu.

⁴ Abhaanu bhayo ni bhari bha njeejemo, bhachaamu, bheeyeemi, bhaanu bhanu bheendere okurya obhurame ku-kyaro kunu okukira kutyo abheenda Nyamuwanga.

⁵ Abhaanu bhayo bhari rwa bhanu abhakora ganu Nyamuwanga keenda, nawe abheegaana amanaga gaaye. Bhayo bhoone wiikenge nabho.

⁶ Enaaika kutyo kwa okubha agati weebhwe bharimo bhanu abheeyingisha mu-nyumba gya abhaanu, mbangʼeeneresha abhagasi abhatengʼo bhanu bhari na emiseeri gya ebhikayo, bhanu abhakururwa na amajomerwa ga mbaga nyafu.

⁷ Abhagasi bhayo abheeyigira ku-nsiku, nawe bhatakutura okuyikiira okumenya ekimari.

⁸ Rwa kutyo Yaane na Yambure ꞉bhaayajeene na Musa nikwo kutyo bhanu bhoone abhayajana na ekimari kiyo. Ni bhaanu bhanu bhaanyamukire obhwenge bhwebhwe, bharemere okwikirisha Nyamuwanga.

⁹ Nawe, bhataritura kugenderera muno, kwa okubha obhutengʼo bhwebhwe bhuri ayeeyi okubha ku-bhweru ku-bhaanu bhoone rwa kutyo obhutengʼo bhwa Yaane na Yambure, ꞉bhwatuuywe ku-bhweru.

Pawuro kaatongera Timoteeyo

¹⁰ Tari awe useetere ameeyigisho gaani, gintungwa gyani, obhukene bhwani, obhwikirisha bhwani, na obhusimbiiru bhwani.

¹¹ Useetere na obhwendi bhwani, okurindirira amangʼana, na giinyanko gyani. Umenyere na amangʼana ganu ꞉gaanyoorere niri Antiyokiya, Ikooniyo na Risitira, na ebhinyansho bhyone kutyo bhinu ꞉neegumiirisiishe, Raatabhugenyi ˆnaanyerusha mu-goone gayo.

¹² Yee, abhaanu bhoone kutyo bhanu bheendere okukora kutyo Nyamuwanga keenda okuturira ku-Kiriisitu Yeesu, bharinyansibhwa.

¹³ Nawe abhakayi na abhabheeyi bharigenderera okubha bhakayi mbajimyaga bhoone mbajimibhwa.

¹⁴ Nawe awe genderera okugwata ameeyigisho ganu ꞉weeyigisiibhwe nuwikirisha, kwa okubha umenyere kujomu ni bhaaya bhanu ꞉weeyigiiye-ko.

¹⁵ Awe okwambira ukyari mutooto, umenyerega Amakaamo Amataakatiifu ganu agatura okukuyaana obhwenge bhwa okumenya ati, ekinyoora obhwerusha okuturira ku-bhwikirisha bhunu bhuri ku-Kiriisitu Yeesu.

¹⁶ Mwoyo Omutaakatiifu niwe atangashaga abhaanu okukaama Amakaamo Amataakatiifu goone kutyo. Amakaamo gayo geesire okwiyigisisha ekimari, okugonya abhaanu bhasige ebhikayo bhyebhwe, okubhatangasha, na okwimya gintungwa gya abhaanu gibhe gya bhurengeresi.

¹⁷ Gibhe kutyo insonga omuunu wa Nyamuwanga abhe na obhuturo bhwa okukora ebhikorwa ebhijomu bhyone kutyo.