2 Timoteeyo 2 - Iimuuma Iinyaaya

Omusirikare omwitongeeye ku-Yeesu Kiriisitu

¹ Mmbe woori, mwana waani omwende Timoteeyo, komeera ku-nema inu Kiriisitu Yeesu akiyaaye.

² Na ameeyigisho ganu ꞉woonguuywe niiyigisha mu-meeso ga abharori bhaafu, ugayaane abhaanu abheetongeeye bhanu abhatura okugeeyigisha abhandi.

³ Usimbiire ku-nyanko amwi na anye, rwa omusirikare omwitongeeye ku-Kiriisitu Yeesu.

⁴ Omusirikare omwitongeeye atakusiga emirimu gya ekisirikare naakora ginu gitari gya ekisirikare, kwa okubha obhukene bhwaye ni okujomisha unu amutuuye ku-bhusirikare.

⁵ Ni kutyo na ku-mubhirimi woonewoone atakunyoora ekiyaanwa kya obhuyigi akabha atabhirimire eemiiye ku-bhiraagiro bhya obhubhirimi.

⁶ Na omurimi omukomeeye niwe eesire okubha owa okwamba okunyoora ebhyokurya bhinu ꞉aarimire.

⁷ Timoteeyo iiganiirisha muno amangʼana gayo enaaika, kwa okubha Raatabhugenyi kaaja okukuyaana obhuturo bhwa okumenya gayo goone kutyo.

⁸ Nuuyiite Yeesu Kiriisitu owa mu-ruganda rwa Dawudi unu Nyamuwanga ꞉aasuurire okusooka mu-bhafuuye. Gayo nigo Amangʼana Amajomu ganu eniraasha,

⁹ okuraasha kuyo nikwo okukora niinyanka na okubhoywa eminyororo rwa omukayi, nawe Riingʼana rya Nyamuwanga ritakubhoywa.

¹⁰ Mmbe woori, anye enisimbiira ku-mangʼana gayo goone kutyo, ku-nsonga ya bhanu Nyamuwanga asorere, insonga bhoone bhanyoore obhwerusha bhunu obhusooka ku-Kiriisitu Yeesu na bheengire mu-bhugungyo bhunu bhutakuweera.

¹¹ Riingʼana rinu ni rya kimari ati, raabhe kifuuye amwi nawe, kyone kirirama amwi nawe.

¹² Raabhe kikasimbiira, kiritunga amwi nawe, raabhe kikamwigaana, omwene woone arikiigaana.

¹³ Raabhe eswe kitari bheetongeeye, omwene keekirisibhwa ku-nsiku, kwa okubha atakutura okwirema omwene.

Omujuuma unu keekirisibhwa na Nyamuwanga

¹⁴ Genderera okubhayiitya amangʼana gayo, enu nuubhabhwirira mu-meeso ga Nyamuwanga ati bhaasiga okubhambashaanya ku-mangʼana matoototooto, giimamba giyo gitari na bhwera, tari eginyamura bhanu abheetegeeresha.

¹⁵ Komeera okwiyeresha ku-Nyamuwanga ati omwene akwikirisiishe, omukosi wa emirimu unu utakwiswaririra emirimu gyaye, nuwaaikaga riingʼana rya ekimari mu-bhwima bhwaryo.

¹⁶ Wiikenge okwaikana amangʼana ga ekisiru ganu gatari na bhwera, ganu gatari ga diini kwa okubha agaawura abhaanu okusooka ku-Nyamuwanga.

¹⁷ Ameeyigisho geebhwe agaranda mu-bhaanu rwa ekironda kinyaatawora. Mu-bhanu abhageeyigisha bharimo bha Yimenaayo na Fireto.

¹⁸ Abhaanu bhayo bhaamarire kuyabha muno, okwaika ati obhusuuki bhwa abhafuuye bhuraturire nikwo okweresha ati bhasigire ekimari. Abhayindura obhwikirisha bhwa abhaanu abhandi okuturira ameeyigisho gayo.

¹⁹ Nawe omusingi gunu gutuuywe-wo na Nyamuwanga guyambaaye gusimbiirire, na guri na orubhano runu ati, “Raatabhugenyi amenyere abhaanu bhaaye,” na, “Woonewoone unu keebhirikira ati, omwene ni wa Raatabhugenyi asige okukora amabhiibhi.”

²⁰ Mmbe, mu-nyumba iinene bhitakubha-mo bhiinu bhya iijaabhu na bhiinu bhiinyayera era, tari bhirimo ebhindi bhibhaajirwe mati, na bhinu bhimogerwe na riiswa, ebhindi bhiri na ekibharo ebhindi bhitari nakyo.

²¹ Mmbe, omuunu akeeyesha omutima ˆneekenga na abhaanu bhayo, kaabha muunu unu ari na ekibharo unu eesiibhwe, na eesire ku-Raatabhugenyi. Na abhumbirwe ku-nsonga ya okukora emirimu emijomu gyone kutyo.

²² Nawe awe yiiruka amajomerwa ga mw-ikura goone kutyo, ukore amangʼana ga obhurengeresi, ubhe na obhwikirisha, na obhwendi, na omurembe. Ukore gayo uri amwi na bhanu abhatogora Raatabhugenyi bheerere emitima.

²³ Wiikenge giimamba gya ekitengʼo ginu gitakwiyigisha, umenyerega ati amangʼana rwa gayo agareetaga iinyombo.

²⁴ Na omujuuma wa Raatabhugenyi atakwendwa okubha muunu wa nyombo tari abhe mufura ku-bhaanu bhoone kutyo, abhe musikiru, abhe ˆnaatura na okwiyigisha.

²⁵ Bhanu abhayajana nawe, abhagonye afuraaye, ari na obhwisige ati amwi Nyamuwanga kaatura okubhasakira bhanuge ebhikayo bhyebhwe bhamenye ekimari.

²⁶ Obhwenge bhwebhwe bhubhasubhe-ko kweki, bhasooke mu-mutego gwa Sitaani. Uyo niwe abhagwatiriiyega bhakorega ganu omwene keenda.