2 Peetero 3 - Iimuuma Iinyaaya

Orusuku rwa Raatabhugenyi

¹ Abheendwa bhaani, iinyarubha inu ni ya akabhiri nimbakaamira. Mu-nyarubha giibhiri ginu, enisakya okwimusha obhwiganiirisha bhwemwe obhujomu nimbayiityaga,

² muyiite amangʼana ganu abharagi abhataakatiifu ꞉bhaaikaga kara, na ekiraagiro kya Raatabhugenyi na Omwerusi weeswe kinu mwayaaywe okuturira ku-bhatumwa bhaaye.

³ Yeenderwe mumenye okwamba ati, ku-nsiku gya obhuteero bhariija abhasangʼayi, bhanu abhakora amabhiibhi ganu abharanga mu-mitima gyebhwe,

⁴ mbabhabhwiraga ati, “Kiriisitu ꞉aaragire ati arisubha! Woori ari aaki? Kwambira bhaajaaji bhamaamiiye na reero, amangʼana gari kutyokutyo, na ebhiinu bhiikaaye kutyokutyo bhusimukwa!”

⁵ Abhaanu bhayo, bharamuuye okurema ganu bhamenyere ati, ku-bhwambiro Nyamuwanga ꞉aaikire mangʼana era, orwire na kyaro mbibha-wo. Okuturira kw-ingʼana rya Nyamuwanga, ekyaro ꞉kyeebhukire okusooka mu-manji.

⁶ Na okuturira ku-manji gayogayo, ekyaro kya kabhaga karya ꞉kyasikire kikawa-wo.

⁷ Na kw-ingʼana riyoriyo Nyamuwanga ꞉aaramuuye ati, orwire na ekyaro kinu kiriwo woori anu, aribhyokya mu-muriro. Nawe akyabhituuye-wo okuyikira ku-rusuku rwa okuramurira, na okumara-wo abhaanu bhanu bhatakukora ganu Nyamuwanga keenda.

⁸ Nawe, abheendwa bhaani, mwasiga okurabhirwa kiinu kimwi ati, ku-Raatabhugenyi Nyamuwanga, orusuku orumwi ruri rwa emyaka kiwumbi, na emyaka kiwumbi ku-mwene giri rwa rusuku rumwi era.

⁹ Raatabhugenyi Nyamuwanga atakukoora kukuumisha ganu aaragire, rwa kutyo abhaanu abhandi abhatoga, tari omwene ni musimbiiru kw-imwe, kwa okubha atakenere muunu woonewoone abhure, tari akenere abhaanu bhoone kutyo bhanuge ebhikayo bhyebhwe.

¹⁰ Nawe orusuku rwa Raatabhugenyi murirutaka era rwa kutyo omwifi keebha. Orusuku ruyo, orwire rurisoosibhwa-wo na omuyiriro omunene, na ebhiinu bhyende-mo bhyone kutyo bhiryokibhwa mu-muriro, ekyaro kyone kutyo na ebhibhumbwa bhyone bhinu bhirimo bhiriweerera.

¹¹ Mmbe woori, kwa okubha ebhiinu bhyone kutyo bhirinyamurwa kutyo, kandi woori emwe, omwendwa mubhe bhaanu bha mbagaki? Omwendwa mubhe na ntungwa gya abhaanu bhataakatiifu, mukoraga na ganu Nyamuwanga keenda.

¹² Kutyo omubha murindirira na okurwanguya orusuku rwa Nyamuwanga, kw-ibhaga rinu Nyamuwanga ꞉aaramuuye. Orusuku ruyo Nyamuwanga aryokya orwire, na ebhibhumbwa bhya mu-rwire bhyone kutyo bhiriweerera na omuriro.

¹³ Nawe eswe, okuriingʼaana na kutyo akiragire, ekirindirira orwire oruyaaya na ekyaro ekiyaaya kinu abheekasi bheende-mo ni bharengeresi.

¹⁴ Mmbe woori abheendwa bhaani, ku-kabhaga kanu mukyarindirira orusuku ruyo, mwikomeeshe okwera pee mu-mitima, muri na omurembe na Nyamuwanga, mutari na kikayo mu-meeso gaaye.

¹⁵ Muyiite ati Raatabhugenyi ꞉aabheeye musimbiiru insonga munyoore obhwerusha, rwa kutyo na Omukiriisitu weejaasu omwende Pawuro woone kutyo ꞉aabhakaamiiye, okuturira ku-bhwenge bhunu Nyamuwanga ꞉aamuyaaye.

¹⁶ Mu-nyarubha gyaye gyone kutyo, Pawuro ꞉aaikiraga amangʼana gayo. Gariwo agandi ni makomeeye okugamenya. Amangʼana gayo, abhasiru bhanu bhatari na ekimari kyago, abhagayabhya, rwa kutyo abhayabhya Amakaamo Amataakatiifu agandi. Okukora kutyo, abheereetera obhusiko abheene.

Amangʼana ga okuragana

¹⁷ Nawe emwe abheendwa bhaani, kwa okubha woori mwabhamenyere, mwiyangarire, bhataaja okubhayabhya mbabhatuura mu-bhujeemi bhwebhwe, kimwi mwone mujeema musooka ku-bhusimbiiru bhwemwe.

¹⁸ Nawe mugenderere okwikara mu-nema, mugenderere na okumenya Raatabhugenyi na Omwerusi weeswe Yeesu Kiriisitu. Uyo niwe ari na obhugungyo woori anu, na kajaanende! Amina.