2 Peetero 2 - Iimuuma Iinyaaya

Ebhirusho ku-bheeyigisha abhabheeyi

¹ Nawe, mu-kabhaga ka abharagi bha Ijirayeeri kara, ꞉bhaariga bhariwo na abharagi abhabheeyi. Rwa kutyo bharibha-wo abheeyigisha abhabheeyi agati weemwe. Abhaanu bhayo bharingisha bhwiyibhise ameeyigisho amabhiibhi ganu gatakugendana na ekimari, na bhariigaana Raatabhugenyi Yeesu Omutangasha Omukuru, unu ꞉aabhagurire. Na ku-nsonga iyo bhatarikoora okwimara-wo.

² Abhaanu abhaafu bhariseeta gintungwa gyebhwe gimbiibhi. Abheeyigisha abhabheeyi bhayo, bharikora abhandi bhajabhure injira ya ekimari.

³ Abhaanu bhayo ku-nsonga ya obhuwubhaaru bhwa ebhiinu bharibhajimya mbabhagegera ebhiinu bhyemwe. Nawe okusooka kara, indamuro yeebhwe iraaikirwe, na indamuro iyo yaabheneneeye! Na okuwa-wo kwebhwe kutari areera.

⁴ Nyamuwanga ꞉ataabhiiye bhaamaraayika bhanu ꞉bhaakayire, tari, ꞉aabheesere mw-itoko, ˆnaabhabhoya na eminyororo bheekare mu-kisuute eyo, okuyikira anu orusuku rwa okuramurirwa ruriyika.

⁵ Na mu-kabhaga ka Noowa koone, Nyamuwanga ꞉ataabhiiye abhaanu bhanu bhatamuungwaga, ˆnaaragasha ingubha niisikya ekyaro, na abhaanu bhoone kutyo mbasika, ˆneerusha Noowa na abhaanu abhandi mungati era. Noowa niwe ꞉aariga ˆnaaraasisha abhaanu ˆnaabhabhwiraga ati, bhabhe bharengeresi.

⁶ Nyamuwanga kweki ˆnaaramurira abhaanu bha mu-musi gwa Sodoma na ogwa Gomora, ˆnaasikya abhaanu bhoone kutyo na omuriro. Nyamuwanga ꞉aakorere kutyo insonga iingʼana iyo ibhe kirengekanyo kya ganu garibhanyoora bhoone kutyo bhanu bhatakumuungwa.

⁷ Mu-bhaanu bhayo, ˆneerusha Ruutu omuunu omurengeresi, unu ꞉ateekirishaanyaga na gintungwa gimbiibhi egya abhajeemi bhayo.

⁸ Okwamba omurengeresi uyo, ꞉aariga eekaaye amwi na abhakayi bhayo ebhaga enene, ˆnaanyankaga mu-mutima ku-ganu ꞉oongwaga na kurora, ku-ntungwa gyebhwe gimbiibhi.

⁹ Okuriingʼaana na gayo goone kutyo, Raatabhugenyi Nyamuwanga omwene amenyere kutyo keerusha abhaanu bhanu abhamuungwa okusooka mu-masakyo ga Sitaani, na kutyo kaatuura bhanu bhatari bharengeresi mu-bhirusho, okuyikira ku-rusuku rwa indamuro.

¹⁰ Na indamuro yaaye iribha nduru muno, munomuuno ku-bhanu abhakora amajomerwa amabhiibhi ga emibhiri gyebhwe na okujeera obhuturo bhwa Nyamuwanga. Abhaanu bhayo bhari na giimamba, ni bheeyeemi, bhatakuubhaya kujeera ebhibhumbwa bhya obhugungyo ebhya mu-rwire.

¹¹ Raabhé kutyo bhaamaraayika bhari na amanaga na obhuturo bhwafu okukira abheeyigisha abhabheeyi, nawe bhatakutura okubhijeera kutyo, na okubhisitaakya ku-Raatabhugenyi Nyamuwanga.

¹² Nawe abhaanu bhayo abhajabhura ebhiinu bhinu bhatakumenya. Bhabheeye rwa gintyanyi ginu gitari na bhwenge, ginu egiibhurwa era, insonga gigwatwe na okwitwa! Na nikwo kutyo abheeyigisha abhabheeyi bhayo bharisika.

¹³ Abheeyigisha bhayo ꞉bhaakorere ebhinyansho ku-bhaanu abhandi, na ebhinyansho bhiyo nibhyo bhoone bhariyaanwa. Amajomerwa ga abhaanu bhayo ni kukora amangʼana amabhiibhi ganu agajomisha emibhiri gyebhwe mu-mwisi gwa nyampembe. Na abhaswasha muno agati wa Abhakiriisitu bheejaanyu mu-kabhaga kanu abhayimbana na emwe mu-magenyi geemwe, mbajomererwaga gintungwa gyebhwe egya okujimya.

¹⁴ Ameeso geebhwe agafwima abhagasi bhataare nabho ameega, na bhatakuyigwa okukora ebhikayo. Abhakongya Abhakiriisitu bhanu bhakyari okusimbiira bhayimbane nabho okukora ebhikayo, na emitima gyebhwe gikenere muno okubha na ebhiinu, abhaanu bhayo ni bheeyiime.

¹⁵ Bhasigire injira inu yiimire, bhayabhire na abhaseeta injira inu Bhaaramu omwana wa Bhewori ꞉aayitire-ko. Bhaaramu unu ꞉eendere muno giiyera ˆnaaramura okukora amabhiibhi insonga ariywe.

¹⁶ Nawe Bhaaramu ku-nsonga ya ebhikayo bhyaye, ꞉aayiinyirwe na insikiri. Insikiri ni ntyanyi, nawe ꞉yaaikiiye mw-isi rya omuunu okuyinga omuragi uyo asige okukora amangʼana ga ekisiru.

¹⁷ Abhaanu bhayo bhari rwa ebhijegeje bhinu bhyumire, bhari rwa ameere ganu agayembwa na omuyaga mwafu. Bhatuuriiywe-wo ekisuute ekinene nimwo bheekare.

¹⁸ Okuturira ku-bhwiyeemi bhwebhwe ku-mangʼana ganu gatari na bhwera, na ku-majomerwa geebhwe amabhiibhi aga emibhiri, abhakongya abhaanu bhanu bhatari na nsiku nyafu bheerukire obhujimya bhwa mu-kyaro, bhayimbane nabho okukora ebhikayo.

¹⁹ Abharaasisha abhaanu mbabharaga ati bhakabheekirisha abhabha na obhwiyagaaro, enu abheene bhari bhagaya ku-bhikayo. Abhaanu bhayo ni bhagaya kwa okubha omuunu akasingwa na engʼana ryoneryone, kaabha mugaya wa riyo ryamusinga.

²⁰ Na abhaanu bhakabha bhaamarire okwiruka amajabhi ga ku-kyaro kunu, mbamenya kujomu iingʼana ya Raatabhugenyi na Omwerusi weeswe Yeesu Kiriisitu, bhakakomwa kweki mbataamibhwa okusooka mu-majabhi, abhabha bhabhiibhi muno, okukira kutyo ꞉bhaariga bhari ku-bhwambiro.

²¹ Nyakara bhaaja kubha bhatakumenya injira ya obhurengeresi, kwa okubha ni kubhiibhi muno okuyimenya, mbamara kweki mbayisiga, mbasiga ekiraagiro ekitaakatiifu kinu ꞉bhaayaaywe.

²² Abhaanu bhanu bhari rwa kutyo abhaaikaga ati, “Imbwa itanakire, niimara niirya amatanake gaayo,” na iinyaaika eyindi ati, “Ingurubhe ingasi inu yoosiibhwe, eyiigaragasha kweki mu-matoto!”