2 Peetero 1 - Iimuuma Iinyaaya

Obhukeesha

¹ Iinyarubha inu eniyikaama anye Simooni Peetero, omujuuma, na omutumwa wa Yeesu Kiriisitu. Enibhakaamira emwe bhanu okuturira obhurengeresi bhwa Yeesu Kiriisitu, uyo niwe Nyamuwanga na Omwerusi weeswe, munyoorere obhwikirisha bhwa iisamaani, bhunu eswe kyone kiikirisiishe.

² Iinema na omurembe bhibhe bhyafu kw-imwe, mu-kumenya kwemwe Nyamuwanga na Yeesu, Raatabhugenyi weeswe.

Mubhirikiiywe na okusorwa na Nyamuwanga

³ Nyamuwanga okuturira mu-bhuturo bhwaye, akiyaaye amangʼana goone kutyo ganu ekikena, insonga mu-bhurame bhweswe kikore ganu omwene keenda. ꞉Aakiyaaye gayo okuturira okumenya unu ꞉aakibhirikiiye omwene, insonga akyereshe obhugungyo, na obhujomu bhwaye.

⁴ Okuturira ku-gayo, akiyaaye amangʼana amajomu manene ganu ꞉aakiragire. Amangʼana gayo agakisakira eswe kibhe na ntungwa yimwi na Nyamuwanga na okusiga obhubhiibhi. Obhubhiibhi bhuyo bhuri ku-kyaro anu, ku-nsonga ya amajomerwa amabhiibhi.

⁵ Mmbe woori ku-nsonga iyo, mwikomeeshe muno, insonga mu-kwikirisha kwemwe mubhe na mitima mijomu, mu-mitima emijomu gyemwe mubhe bhamenyi bha amangʼana ganu Nyamuwanga keenda mukore.

⁶ Mu-bhumenyi bhwemwe obhwa amangʼana, mwiyiinye okukora amabhiibhi ganu omukena okukora. Mu-kwiyiinya kwemwe okukora amabhiibhi, kubhe na obhwigumiirisha, na mu-kwigumiirisha kwemwe mukore ganu Nyamuwanga keenda.

⁷ Na mu-kukora kwemwe ganu Nyamuwanga keenda, mwendane emwe abheene na abheene. Na mu-kwendana kwemwe abheene na abheene, mwende na abhaanu abhandi bhoone kutyo.

⁸ Raabhe gintungwa giyo gyone kutyo gikabha nyafu gigendeeye-ko kw-imwe, egibhasakira musige okubha bharenga, na bhaanu bhanu mutakukora ganu Nyamuwanga keenda, mu-kumenya kwemwe Raatabhugenyi weeswe Yeesu Kiriisitu.

⁹ Nawe omuunu unu atari na ntungwa giyo, ni muwofu. Atakutura okurora bhinu bhiri areera, arabhiiywe ati Nyamuwanga niwe ꞉aamwesiishe ebhikayo bhyaye bhinu ꞉aariga ari nabhyo kara.

¹⁰ Mmbe woori, Bhakiriisitu bheejaasu, mwikomeeshe muno okweresha ati Nyamuwanga abhabhirikiiye na okubhasora, kwa okubha mukakora kutyo, mutakutura kusiga obhwikirisha.

¹¹ Mukabha kutyo, Raatabhugenyi na Omwerusi weeswe Yeesu Kiriisitu, aribharamira kujomu mu-bhukama bhwaye bhunu bhutakuweera.

¹² Nimenyere ati amangʼana gayo mugamenyere kujomu, na omwikomeesha muno okugwatirira ekimari kinu ꞉mweeyigiiye, nawe anye niriwo kiyana okubhayiitya amangʼana gayo.

¹³ Anye enirora ati, ni engʼana ejomu okubhayiitya amangʼana gayo mu-kabhaga kanu nikyaramire mu-mubhiri munu.

¹⁴ Enaaika kutyo kwa okubha nimenyere ati niri ayeeyi okusooka mu-mubhiri munu, rwa kutyo Raatabhugenyi weeswe Yeesu Kiriisitu aamarire okumbwira.

¹⁵ Nikyo ekikora woori, eniija okwikomeesha okukora gayo gakaamwe, insonga nikabha naafuuye muyiite ati ꞉naabhabhwiriiye.

Abharori bha obhugungyo bhwa Kiriisitu

¹⁶ Bhunu ꞉kyabheeyigishaga iiguru ya amanaga ga Raatabhugenyi weeswe Yeesu Kiriisitu, na kutyo arisubha, ꞉kitaaikaga ngani ginu gikaamirwe kyenge na bhaanu era. Tari, eswe abheene ꞉kyariga kirorere obhugungyo bhwaye na ameeso geeswe.

¹⁷ Yeesu ꞉aayaaywe ekibharo okusooka ku-Raata Nyamuwanga, bhunu obhuraka bhuri na obhugungyo bhunene, ꞉bhwariga mbusooka mu-rwire ku-Nyamuwanga omwene, mbwaikaga ati, “Unu ni mwana waani omwende, niwe kaanjomisha.”

¹⁸ Eswe abheene ꞉kyoonguuywe kiri amwi na Yeesu mu-kiima ekitaakatiifu kya Nyamuwanga.

¹⁹ Na woori eswe, kiri na riingʼana rya obhuragi erya ekimari, omubha mukorere kujomu, mukakomeera okurigwatira. Murigwatire ribhe rwa intara inu eyibhamirikira mu-kisuute, okuyikira anu obhukyera, na iinyamananga ibhamirikire mu-myoyo gyemwe.

²⁰ Nawe, mubhe muyiita ati, bhutariwo bhuragi bhwonebhwone mu-Makaamo Amataakatiifu, bhunu ꞉bhwasomboorerwe okuriingʼaana na obhwiganiirisha bhwa omuunu omurebhe,

²¹ kwa okubha obhuragi ꞉bhutaasoosiibhwe woonewoone, rwa kutyo omuunu keenda omwene. Tari abhaanu ꞉bhaasoosiishe obhuragi okusooka ku-Nyamuwanga bhatangasiibhwega na Mwoyo Omutaakatiifu.