2 Abhateesaroonike 3 - Iimuuma Iinyaaya

Pawuro keenda abhaanu bhabhasabhire ku-Nyamuwanga

¹ Bhakiriisitu bheejaasu, aga okumariisha ni ati, mukisabhire insonga iingʼana ya Raatabhugenyi Yeesu ibhe na ekibharo ku-bhanu abhayiramira na igenderere okuswerana bhwangu, rwa kutyo iri kw-imwe.

² Mukisabhire Nyamuwanga akyerure mu-bhaanu abhabhiibhi na abha ebhikayo, kwa okubha tari bhoone kutyo bhanu abheekirisha iingʼana iyo.

³ Nawe Raatabhugenyi Yeesu akaaika aaikire, omwene kaaja okubhasimbiisha na okubhayinga na omukayi Sitaani.

⁴ Niwe kaakiyaana obhwisige obhunene kw-imwe, ati woori omukora ganu ekibharagirira, na omuuja okugenderera okukora kutyo.

⁵ Raatabhugenyi Yeesu Kiriisitu abhasakire mwigumiirishe ku-mwene, na atangashe emitima gyemwe mu-bhwendi bhunu obhusooka ku-Nyamuwanga.

Abhakiriisitu bhaasiga okubha bharenga

⁶ Bhakiriisitu bheejaasu, ekibharagirira kw-isiina rya Raatabhugenyi Yeesu Kiriisitu ati, mwasiga okubha ayeeyi na Abhakiriisitu abharenga, na bhanu bhatakugwata ameeyigisho ganu ꞉kyabheeyigisiishe.

⁷ Ekyaika kutyo kwa okubha emwe abheene mumenyere kutyo eyeendwa mwiyigire kw-iswe, kwa okubha bhunu ꞉kyariga kiri amwi na emwe ꞉kyariga kitari bharenga.

⁸ Na ꞉kyariga kitakurya bhyakurya bhya muunu woonewoone bhusa, tari ꞉kyakoraga muno emirimu mu-ngeta na mu-mwisi, insonga iri ati, kyasiga kunyansha muunu woonewoone.

⁹ Bhunu ꞉kyakoraga kutyo, itari ati ꞉kyariga kiteesire okunyoora ebhiinu okusooka kw-imwe, tari ꞉kyariga kyendere eswe kibhe kirengekanyo kw-imwe insonga mwiyigire.

¹⁰ Na bhunu ꞉kyariga kiri amwi na emwe, kyabharagiriiye ati, “Raabhe omuunu atakwenda okukora emirimu, mmbe na okurya kwone asige.”

¹¹ Ekyaika mangʼana ganu kwa okubha ekyungwa ati, agati weemwe bhariwo abhandi ni bharenga, bhatakukora mirimu gyebhwe, nawe bheeki ni kwiyingisha mu-mangʼana ga abhandi.

¹² Abhaanu bhayo ekibharagirira nkibhagaanya kw-isiina rya Raatabhugenyi Yeesu Kiriisitu ati, bhasige obhurenga, bhakore emirimu kujomu, insonga bhabhe na ebhyokurya bhyebhwe abheene.

¹³ Nawe emwe Bhakiriisitu bheejaasu, mwasiga okuyigwa okukora amajomu.

¹⁴ Raabhe muunu woonewoone atakwenda okuungwa amangʼana geeswe ganu gari mu-nyarubha inu, mumwikenge. Musige okuyimbana nawe, insonga eesware.

¹⁵ Nawe mwasiga okumubhara ati aabha musoko, nawe, mumugaanyega mumenyere ati ni Mukiriisitu weejaanyu.

Amangʼana ga okuragana

¹⁶ Mmbe, Raatabhugenyi Yeesu omwene niwe omwambisha wa omurembe, abhayaane omurembe ebhaga ryone kutyo, na mu-ganu omutura-mo goone kutyo. Na abhe amwi na emwe mwone kutyo.

¹⁷ Ni anye Pawuro, enibhakaamira obhukeesha bhunu na okubhoko kwani omwene. Kinu nikyo ekibharikisho mu-nyarubha gyani gyone, runu nirwo orukaamo rwani.

¹⁸ Iinema ya Raatabhugenyi weeswe Yeesu Kiriisitu, ibhe amwi na emwe bhoone kutyo.