2 Abhateesaroonike 2 - Iimuuma Iinyaaya

Okuuja kwa omujeemi na okusubha kwa Raatabhugenyi Yeesu

¹ Mmbe woori Abhakiriisitu bheejaasu, ku-rubhaara rwa okusubha kwa Raatabhugenyi weeswe Yeesu Kiriisitu na kutyo kirisangira anu aribha ekibheesaasaama ati,

² muunu woonewoone aasiga okubhatitibhasha musooka ku-bhukene bhwemwe ku-Kiriisitu. Mwasiga kutaka muubhaya engʼana ryoneryone, ribhe rya obhuragi, ribhe rya okuraasha, amwi ati nyarubha inu omutura okutoga ati isookere kw-iswe, ati orusuku rwa okuuja Raatabhugenyi rurayikire.

³ Mwasiga kwikirisha omuunu woonewoone abhajimye kw-ingʼana ryoneryone, kwa okubha orusuku ruyo rutakuyika okwamba, mukyari kurora abhaanu abhaafu mbajeema. Na Omujeemi, omwana wa obhunyamusi unu araramuriiywe okumarwa-wo kimwi, akyari kutuurwa ku-bhweru.

⁴ Omujeemi uyo akyari kuramurirwa, ariituura iiguru wa emisambwa, na ebhiinu bhyone kutyo bhinu abhaanu abharamya, omwene niwe ariikora ati ari iiguru ku-bhiinu bhyone kutyo. Na ariingira ˆneekara mw-iyekaru rya Nyamuwanga ˆneebhirikira ati omwene niwe Nyamuwanga.

⁵ Nimenyere omuyiita ati, ꞉naabhabhwiriiye amangʼana gayo bhunu ꞉naariga niri amwi na emwe.

⁶ Na kiriwo kinu ekiyinga Omujeemi uyo okubha-wo woori, insonga abhe-wo ku-kabhaga kaaye, kanu Nyamuwanga arimutuura abhweru.

⁷ Na woori Omujeemi uyo kaakora emirimu bhwiyibhise. Nawe ariwo unu kaamuyinga woori, okuyikira anu arisoosibhwa-wo.

⁸ Ayo niwe Omujeemi uyo arituurwa ku-bhweru, nawe Raatabhugenyi Yeesu bhunu arisubha, arimwita na omwika gwa mu-kanwa kaaye, ˆnaamumara-wo na obhugungyo bhunu ariija nabhwo.

⁹ Omujeemi uyo, ariija na amanaga goone kutyo aga Sitaani, na arijimya abhaanu okuturira ku-bhimenyegesho na ebhiruguusho bhyaye.

¹⁰ Kweki aribha na njira nyafu egya okujimya abhaanu bhanu bhatari ku-njira ya Nyamuwanga, kwa okubha ꞉bhaaremere okwenda ekimari, insonga Nyamuwanga abheerushe.

¹¹ Ku-nsonga iyo Nyamuwanga abhataatiriiye bhatungwe na amanaga ga okubhabhusha, insonga bhagenderere okwikirisha okujimibhwa.

¹² Bhanu ꞉bhateekirisiishe ekimari, tari mbajomererwaga ebhikayo, bhariramurirwa.

Amaragiriro ku-bhanu bheerusiibhwe

¹³ Nawe iisire eswe kikumye Nyamuwanga ku-nsiku, ku-nsonga yeemwe, emwe Abhakiriisitu bheejaasu bhanu mwenderwe na Raatabhugenyi. Kyenderwe kikore kutyo, kwa okubha Nyamuwanga ꞉aabhasorere okusooka ku-bhwambiro bhwa okubhumba kwaye, insonga mwerusibhwe. Obhwerusha bhuyo mubhuramiiye okuturira ku-Mwoyo Omutaakatiifu unu keesha emitima gyemwe na okuturira ku-kwikirisha kwemwe ekimari.

¹⁴ Nyamuwanga ꞉aabhabhirikiiye, insonga muramire obhwerusha bhuyo okuturira ku-Mangʼana Amajomu ganu ꞉kyaraasiishe kw-imwe, insonga iri ati, muramire obhugungyo bhwa Raatabhugenyi weeswe Yeesu Kiriisitu.

¹⁵ Woori Bhakiriisitu bheejaasu, musimbiire, na mugwate ameeyigisho ganu ꞉mwaramiiye okuturira ku-mangʼana geeswe ganu ꞉kyaraasiishe, na ganu kyabhakaamiiye mu-nyarubha gyeswe.

¹⁶ Raata Nyamuwanga weeswe akyendere, na okuturira ku-nema yaaye, ebhaga ryone kaakiwooyeresha ˆnaakiyaana na obhwisige obhujomu. Ekimusabha omwene na Raatabhugenyi weeswe Yeesu Kiriisitu ati,

¹⁷ abhawooyereshe mu-mitima na abhasimbiishe ku-mangʼana goone kutyo na ku-bhikorwa ebhijomu bhyone kutyo.