2 Abhateesaroonike 1 - Iimuuma Iinyaaya

Obhukeesha

¹ Iinyarubha inu eniyikaama anye Pawuro, kiri amwi na Siribhino na Timoteeyo. Ekibhakaamira emwe riikanisa rya Teesaroonike, bhanu mwikirisiishe Raata Nyamuwanga, na Raatabhugenyi Yeesu Kiriisitu.

² Iinema na omurembe okusooka ku-Raata Nyamuwanga na ku-Raatabhugenyi Yeesu Kiriisitu, bhibhe amwi na emwe.

Indamuro ya Nyamuwanga mu-kabhaga kanu Yeesu arisubha

³ Mmbe woori Abhakiriisitu bheejaasu, eswe kiisire kikumye Nyamuwanga kiyana ku-nsonga yeemwe, nikwo kutyo eyeendwa kikore, kwa okubha obhwikirisha bhwemwe obhugenderera okukura, na okwendana kwemwe okugenderera okwiyongesha muno.

⁴ Kyakora mu-makanisa ga Nyamuwanga, ni emwe ekiiyeemera ku-nsonga ya obhusimbiiru na obhwikirisha bhwemwe, mu-bhinyansho bhyone kutyo na iinyanko inu omunyoora omwigumiirisha.

⁵ Gayo goone kutyo ageeresha ati, indamuro ya Nyamuwanga ni ya bhurengeresi, ku-nsonga iyo emwe muribharwa ati mwisire okwingira mu-bhukama bhwaye, bhunu obhukora emwe munyanka.

⁶ Nyamuwanga ni murengeresi, omwene kaatura okusubhya ebhinyansho bhibhe ku-bhanu abhabhanyansha,

⁷ emwe bhanu omunyanka woori, arikimuunyisha bhoone kutyo amwi. Arikora gayo bhunu Raatabhugenyi Yeesu arituurwa ku-bhweru okusooka mu-rwire, ari amwi na bhaamaraayika bhaaye abha amanaga,

⁸ eeyindirwe na omuriro. Omwene niwe ariramurira abhaanu bhoone kutyo bhanu abharema Nyamuwanga na bhanu bhatari bhoongwani ku-Mangʼana Amajomu aga Raatabhugenyi weeswe Yeesu.

⁹ Abhaanu bhayo indamuro yeebhwe itariyika ku-bhuteero bhwayo kajaanende, na bharisoosibhwa mu-meeso ga Raatabhugenyi na amanaga gaaye aga okuruguusha.

¹⁰ Indamuro iyo iribha-wo ku-rusuku runu Raatabhugenyi arisubha, insonga agungibhwe na abhataakatiifu bhaaye. Na ruribha rusuku rwa okuruguusha mu-bhoone kutyo bhanu bhamwikirisiishe. Emwe mwone muribha mu-bhayo, kwa okubha ꞉mweekirisiishe iingʼana inu ꞉kyabhabhwiriiye.

¹¹ Ku-nsonga iyo ekibhasaasaamira ku-Nyamuwanga kiyana. Ekisaasaama ati abhasakire mwikare rwa kutyo ꞉aabhabhirikiiye mubhe. Kweki ekisaasaama ati, okuturira ku-bhuturo bhwaye akuumishe obhukene bhwemwe obhujomu bhwone kutyo, na ebhikorwa bhyemwe bhinu bhitangasiibhwe na okwikirisha kwemwe.

¹² Ekisaasaama kutyo, insonga riisiina rya Raatabhugenyi weeswe Yeesu rigungibhwe ku-ganu kaakora kw-imwe, na emwe mwone mugungibhwe ku-ganu omukora ku-mwene, okuriingʼaana na iinema ya Nyamuwanga weeswe, na Raatabhugenyi Yeesu Kiriisitu.