2 Abhakorinto 9 - Iimuuma Iinyaaya

Obhusakisi bhwa okusirira Abhakiriisitu bha Yerusareemu

¹ Nitari na rya okubhakaamira iiguru ya obhusakisi bhwemwe ku-bhataakatiifu bha Yerusareemu,

² kwa okubha nimenyere ati muri na omutima gwa okusakira abhandi. Kyakora eniikumangisha emwe ku-bhaanu bha Makedooniya, nimbabhwira ati, emwe abhaanu bha riikanisa rya mu-kyaro kya Akaya, ꞉mweetuuye-wo okusoosha okwambira mwaka. Okukomeera kwemwe okusoosha, kukorere abhaanu bhaafu agati weebhwe bhoone bhabhe na omutima gwa okusoosha.

³ Mmbe, nitumire Abhakiriisitu bheejaasu bhanu, insonga mubheereshe ati ni kimari mwituuye-wo okusoosha, rwa kutyo ꞉naabhwiriiye abhaanu bha Makedooniya. Nitakwenda okwikumangya kwani ku-nsonga yeemwe kubhe mangʼana ageene era.

⁴ Raabhe nikaaja kw-imwe eyo na abhaanu abhandi abha Makedooniya nkinyoora mukyari okwituura-wo okusoosha, omubha mukiswasiishe kwa okubha kiri na obhwisige bhunene kw-imwe. Na, emwe mwone omuuja okwiswara muno.

⁵ Kyakora naarora ati nisabhe Abhakiriisitu bheejaasu bhanu, bhatangate okuuja kw-imwe eyo anye nikyari okuuja, insonga bhabhasakire okukumanya ebhiinu bhinu ꞉mwaragire okusoosha. Na okukora kutyo omubha musoosiishe kwa mitima myeru, itari ati bhabhasingʼiirisiishe.

Okusoosha ebhiinu omutima gujomeeywe

⁶ Muyiite riingʼana rinu ati, “Omuunu unu kaayamba bhitooto, okugesa kwone arigesa bhitooto. Na unu kaayamba bhyafu, okugesa kwone arigesa bhyafu.”

⁷ Omuunu asooshe rwa kutyo aramuuye mu-mutima gwaye, aasiga okusoosha asurumbaaye, amwi ati kwa kusingʼiirisibhwa, kwa okubha Nyamuwanga eendere omuunu unu kaasoosha ebhiinu omutima gwaye gujomeeywe.

⁸ Nyamuwanga kaatura okubhayaana giinonkwe nyafu okukira kutyo omukena, insonga akabhaga koone kutyo mubhe na ebhiinu bhyone kutyo bhinu omukena, na mubhe bhaanu bhanu omukora amajomu maafu aga okusakira abhandi.

⁹ Rwa kutyo ikaamirwe mu-Makaamo Amataakatiifu ati, “Anyaraganyiishe kiyaani, ayaaye abhatobhu, obhurengeresi bhwaye obhubha-wo kajaanende.”

¹⁰ Nyamuwanga niwe kaayaana abhaanu gimbibho gya okuyamba, ˆnaabhayaana na ebhyokurya. Nikwo kutyo kaaja okubhayaana emwe gimbibho gya okuyamba gisaagiriiye. Nikwo okwaika ati kaaja okubhayaana na okubhoongesha muno omutima gwa obhuyaani.

¹¹ Kaaja okubhayaana obhuniibhi ku-bhiinu bhyone kutyo, insonga mubhe bhayaani nsiku gyone kutyo. Ayo niwe abhaanu bharikumya Nyamuwanga ku-nsonga ya ebhiinu bhinu kiribhasirira okusooka kw-imwe.

¹² Eyiija okubha kutyo kwa okubha obhusakisi bhwemwe bhunu omukora, bhutakusakira Abhakiriisitu bha Yerusareemu bhanu bhasuuyiiwe era, tari obhukora abhaanu bhaafu bhakumye Nyamuwanga muno.

¹³ Abhaaja okugungya Nyamuwanga, kwa okubha omurimu gwemwe ogweresha ati muri bhajuuma bhajomu. Na abhaaja okumugungya kwa okubha abharora kutyo omukora okuriingʼaana na kutyo Amangʼana Amajomu aga Kiriisitu ageenda, na kwa okubha muri bhayaani ku-kubhasakira abheene na abhandi bhoone kutyo.

¹⁴ Abheene bhoone bhakabha mbabhasabhira ku-Nyamuwanga abhabheegomba, ku-nsonga ya giinema nyafu ginu Nyamuwanga abhayaaye emwe.

¹⁵ Kikumyega Nyamuwanga ku-nsonga ya ekiyaanwa ekinene ekya okuruguusha, kinu akiyaaye.