2 Abhakorinto 8 - Iimuuma Iinyaaya

Omutima gwa okusakira abhandi

¹ Woori, Bhakiriisitu bheejaasu, ekyenda kibhabhwire kutyo iinema ya Nyamuwanga ꞉yaakorere emirimu mu-bhaanu bha mu-makanisa ga mu-kyaro kya Makedooniya.

² Abhaanu bhayo ni abhatobhu muno, na ꞉bhaasakiibhwe okuturira ku-bhinyansho bhyafu, nawe ꞉bhaariga bhari na obhujomerwa bhwafu bhunu ꞉bhwakorere mbabha bhayaani muno, mbasooshaga ebhiinu bhyebhwe.

³ Enibhabhwira ati, ꞉bhaasoosiishe ebhiinu bhyafu muno okukira obhuturo bhwebhwe, na ꞉bhaariga mbasoosha bheendere abheene.

⁴ ꞉Bhaariga mbakiisaasaama muno ati, bhoone bhabhe ku-nema ya okusakira Abhakiriisitu bha Yerusareemu.

⁵ ꞉Bhaakorere okukira kutyo ꞉kyariga nkiisiga. ꞉Bheesoosiishe okwamba ku-Raatabhugenyi, mbamara mbeesoosha kw-iswe, rwa kutyo Nyamuwanga keenda.

⁶ Mmbe, ku-nsonga iyo nkiisaasaama Tiito ati, aaje abhasakire emwe mwone mumare omurimu gwa iinema guyo, kwa okubha omwene niwe ꞉aagwambisiishe kw-imwe.

⁷ Emwe muri na obhuniibhi bhwa mangʼana goone kutyo. Muniibhire mu-bhwikirisha, mu-bhurwaji, obhuturo bhwa okumenya amangʼana, mukomeeye ku-kukora amangʼana amajomu, na mukyendere muno. Mmbe, kutyokutyo mubhe na obhuniibhi bhwa iinema ya okusakira abhandi.

⁸ Nitakwaika gayo insonga nibhasingʼiirishe, tari eneenda okurora raabhe obhwendi bhwemwe ni bhwa kimari, okuturira okubheeresha kutyo abhandi abheekomeesha ku-bhusakisi.

⁹ Mumenyere iinema ya Raatabhugenyi weeswe Yeesu Kiriisitu, raabhé kutyo ꞉aariga ari muniibhi, nawe ꞉eekorere okubha mutobhu ku-nsonga yeemwe, insonga okuturira mu-bhutobhu bhwaye, emwe mubhe bhaniibhi.

¹⁰ Kw-ingʼana rinu anye enaaika kutya, mwaka emwe ꞉mwariga muri abha okwamba okwenda okusoosha, na ꞉mwabheeye abha okwamba okusoosha.

¹¹ Woori, mumariishe omurimu guyo rwa kutyo ꞉mwariga mukomeeye, bhunu ꞉mwaambire okugukora. Mwikomeeshe okusoosha okuriingʼaana na bhinu muri nabhyo.

¹² Raabhe omuunu akasoosha eendere okusooka mu-mutima gwaye, Nyamuwanga kaaramira kyonekyone kinu kaasoosha okuriingʼaana na bhinu ari nabhyo. Nyamuwanga atakusabha kinu omuunu atari nakyo.

¹³ Anye nitakwenda ati emwe munyanke okusakira abhandi, insonga abheene bhamuunye,

¹⁴ tari eneenda muriingʼaane. Akabhaga kanu emwe muri na bhiinu bhyafu, ku-bhiyo musakire bhanu bhatari nabhyo, insonga bhunu bhoone bharibhaga nabhyo bhyafu bhabhasakire mwone mukabha musuuyiiwe ebhiinu. Kuyo nikwo okuriingʼaana,

¹⁵ ni rwa kutyo ikaamirwe mu-Makaamo Amataakatiifu ati, “Unu ꞉aakumanyiishe bhyafu, ꞉aariga atari na bhya okusigara, na unu ꞉aakumanyiishe bhitooto, ꞉ataasuuyiiwe.”

Tiito na abheejaabho abhatumwa Korinto

¹⁶ Enikumya Nyamuwanga, kwa okubha ayaaye Tiito omutima gunu anye noone niri nagwo ogwa okubhasakira.

¹⁷ Enaaika kutyo, kwa okubha bhunu ꞉kyamwisaasaamire aaje kw-imwe abhasakire, ꞉eekirisiishe. Na, woori akenere omwene, na kaaja kw-imwe eyo arangire muno okubhasakira.

¹⁸ Ukasiga Tiito, kitumire na Omukiriisitu weejaasu owundi, unu ginkuma gyaye mu-mirimu gya okuraasha Amangʼana Amajomu giswereene mu-makanisa goone kutyo.

¹⁹ Na itari kutyo era, na amakanisa gamusorere insonga abhe amwi na eswe ku-rugendo rwa okusira obhusakisi ku-Bhakiriisitu bha Yerusareemu. Omurimu guyo ni gwa nema, na ogukora Raatabhugenyi agungibhwe, na eyeeresha kutyo kiri na omutima gwa okusakira abhandi.

²⁰ Ekyenda kiikenge muno, kyasiga okwisigiinyirwa na muunu woonewoone ku-nsonga ya obhuyambaasi bhweswe bhwa okusira ebhiinu bhinu abhaanu bhasoosiishe okusakira.

²¹ Kinu eswe kikenere, ni kukora amajomu, itari mu-meeso ga Raatabhugenyi era, tari na mu-meeso ga abhaanu.

²² Kitumire Omukiriisitu weejaasu owundi, aaje na bhaaTiito. Omukiriisitu weejaasu uyo eeyeresiishe kw-iswe kaafu ku-njira nyafunyafu ati ari na bhukene bhunene obhwa okukora emirimu, na woori akenere muno okukira ku-bhwambiro, kwa okubha kaabheesiga muno.

²³ Raabhe omuunu keenda okumenya Tiito, Tiito ni omukosi wa emirimu weejaasu, unu kaakora emirimu amwi na anye ku-nsonga ya okubhasakira emwe. Na abhandi bhanu abhaaja nawe, bhayo ni Bhakiriisitu bheejaasu, bhatumirwe na amakanisa, bhoone abhagungya Kiriisitu.

²⁴ Mmbe, mwereshe abhaanu bhayo obhwendi bhwemwe, insonga amakanisa gamenye ati, eswe kiri na insonga ya okubheekumangisha.