2 Abhakorinto 7 - Iimuuma Iinyaaya

¹ Mmbe woori, abheendwa bhaani, kwa okubha Nyamuwanga aragire okukiyaana gayo goone kutyo, mmbe kiiyeshe, na kisigane na amangʼana goone kutyo ganu agakinaabhiyasha, ku-mibhiri, na mu-myoyo. Kibhe bhataakatiifu ku-mangʼana goone kutyo, okuturira ku-kukora kutyo Nyamuwanga keenda.

Obhujomerwa bhwa Pawuro

² Mukyende okusooka mu-mitima gyemwe gyone kutyo. Kitakayiiye woonewoone, kitanyamuuye mutima gwa muunu woonewoone, na kitajimiishe muunu woonewoone.

³ Nitakwaika amangʼana gayo, insonga nibharamurire ati muri bhakayi, kwa okubha naatangata okwaika ati, kibheendere muno okusookerera mu-mitima gyeswe. Kiri amwi na emwe ibhe ati ekirama amwi ati ekifwa.

⁴ Enitura okwaika na emwe niri na riibhaasi muno, na eniikumangya muno ku-nsonga yeemwe. Muuwooyeresiishe muno na munkorere nijomerwe muno, raabhé kutyo ekinyanka muno.

⁵ Na bhunu ꞉kyayikire Makedooniya, ꞉kitaamuunyire na kutooto, kwa okubha ꞉kyariga kiwooye nyanko. Emibhiri ꞉gyariga giwooye eremo, na mu-mitima gyeswe ꞉kyariga kiyayire.

⁶ Nawe Nyamuwanga unu kaawooyeresha abhasurumbaaye, ꞉aakiwooyeresiishe okuturira ku-bhuuji bhwa Tiito.

⁷ Itari ati ꞉kyawooyeresiibhwe na obhuuji bhwa Tiito era, tari na kutyo emwe ꞉mwamuwooyeresiishe eyo. Omwene ꞉aakibhwiriiye kutyo omuranga okundora, na kutyo omusurumbara na okunyankirira. Gayo agankora nijomerwe muno.

⁸ Raabhé kutyo iinyarubha inu ꞉naabhakaamiiye ꞉yaabhasurumbasiishe, nitakurora ati ꞉naakorere kubhiibhi. Ni kimari ati, okwamba ꞉neeyunguuywe ati ꞉naakorere kubhiibhi, kwa okubha nimenyere ati iinyarubha iyo ꞉yaabhasurumbasiishe, raabhé ikabha ati ni ku-kabhaga kafuyi era.

⁹ Woori enijomerwa, nawe itari kwa okubha ati ꞉mwasurumbaaye, tari ni kwa okubha ꞉mwasurumbaaye muyikira okunuga ebhikayo bhyemwe. Kutyo ꞉mwasurumbasiibhwe nikyo ekisurumbaro kinu Nyamuwanga ꞉aariga ˆneenda. Eswe kitanyamuuye mutima gwa muunu kwa njira yooneyoone.

¹⁰ Okusurumbara kunu Nyamuwanga keenda, ni kunu okukora abhaanu bhanuge ebhikayo bhyebhwe. Okunuga kuyo kutari engʼana rya kwiyungwira kubhiibhi, kwa okubha okureeta obhwerusha. Nawe okusurumbara kunu okureetwa na amangʼana ga ekyaro kinu, okureeta orufu.

¹¹ Ringira kutyo okusurumbara kunu Nyamuwanga ꞉aariga ˆneenda kutyo kubhasakiiye! Kubhakorere mukomeere muno okukora ganu geesire, na kubhakorere mwibhagire ati, ganu omukora ni ga kimari. Kweki kubhakorere mubhiiyirirwe obhubhiibhi. Woori muyayire, omuranga okundora, na mukomeeye muno okurora ati, unu akayire, aramiiye ebhirusho bhyaye. Okuturira ku-gayo goone kutyo mweresiishe ati emwe mutari na kikayo ku-mangʼana gayo.

¹² Mmbe, raabhé kutyo ꞉naabhakaamiiye iinyarubha irya, ꞉nitaakaamire ku-nsonga ya omuunu unu ꞉aakayire, amwi ati ku-nsonga ya unu ꞉aakayiiywe. Tari ꞉naariga neenda, mu-meeso ga Nyamuwanga murore abheene kutyo omwisoosha ku-nsonga yeeswe.

¹³ Ku-riyo mukikomeesiishe. Na okukira okukomeesibhwa kuyo, ꞉kyajomeeywe muno bhunu ꞉kyarorere Tiito ajomeeywe, kwa okubha emwe bhoone kutyo ꞉mwariga musambaarusiishe omutima gwaye.

¹⁴ Anye ꞉naabhakumangiishe muno ku-Tiito, emwe mwone mutanswasiishe. Goone kutyo ganu ꞉kyariga nkimubhwira iiguru yeemwe ꞉gaariga gari ga kimari. Mweresiishe ati kutyo ꞉kyabhakumangiishe nikwo kutyo muri.

¹⁵ Obhwendi bhwa Tiito kw-imwe obhugenderera okubha bhwafu bhuturiiye-ko, akayiita kutyo emwe ꞉mwariga mumuungwa, na kutyo ꞉mwakorere ekibharo bhunu ꞉mwamuramiiye muubhayire muyararaga.

¹⁶ Enijomerwa muno, kwa okubha woori enitura okubheesiga kimwikimwi ku-mangʼana goone kutyo.