2 Abhakorinto 6 - Iimuuma Iinyaaya

¹ Woori kwa okubha ekikora emirimu amwi na Nyamuwanga, ekibheesaasaama ati iinema ya Nyamuwanga inu muramiiye, yaasiga okubhura bhusa.

² Nyamuwanga kaaika mu-Makaamo Amataakatiifu ati, “꞉Naakuunguuywe mu-kabhaga kanu keekirisiibhwe, orusuku rwa obhwerusha, ꞉naakusakiiye.” Mmbe woori iitegeeresha, akabhaga kanu keekirisiibhwe ni woori anu, orusuku rwa obhwerusha ni woori anu!

Okusimbiira ku-mirimu gya Nyamuwanga

³ Kyasiga okubha bhaanu bha okwita abhandi emitima kw-ingʼana ryoneryone, insonga obhujuuma bhweswe bhwasiga okwaikwa kubhiibhi.

⁴ Tari, ku-mangʼana goone kutyo ekyeresha ati eswe kiri bhajuuma bha Nyamuwanga. Ekisimbiira muno mu-bhinyansho, giinyanko na amangʼana amakomeeye goone kutyo.

⁵ Kibhumirwe, kibhoyerwe mu-jeera, abhaanu bhakikoomooye. Kikorere emirimu emikomeeye, kikyesiishe obhwire, na kimaamire siibho.

⁶ Na ekiiyeresha ati kiri bhajuuma bha Nyamuwanga ku-bhweru bhwa emitima, ku-kumenya amangʼana, ku-kusimbiira, ku-kubha na emitima emijomu, na ku-kutangasibhwa na Mwoyo Omutaakatiifu, ku-bhwendi bhwa ekimari,

⁷ na ku-kuraasha riingʼana rya ekimari. Ekikora gayo goone kutyo okuturira ku-managa ga Nyamuwanga. Obhurengeresi nibhwo ekigwato kyeswe, ebhuryo na ebhumosi.

⁸ Abhaanu abhandi abhakiyaana ekibharo nawe abhandi abhakijeera, abhandi abhakikumangya abhandi abhakyaika kubhiibhi. Abhandi abhaaika ati kiri bhabheeyi, nawe eswe ekyaika ekimari.

⁹ Eswe ekibharwa rwa abhaanu bhanu bhatakumukire, nawe kikumukire muno. Abhaanu abhandi abhakirora ati kiri rwa abhaanu bhanu kirebhereeye okufwa, nawe ekiisha emyoyo! Kibhumirwe muno, nawe kikyari okukomerwa.

¹⁰ Kiri muna kisurumbaaye, nawe kabhaga koone kutyo kijomeeywe. Kiri rwa abhatobhu, nawe kiniibhiishe bhaafu. Kiri rwa bhanu bhatari na kiinu kyonekyone, nawe kiri na ebhiinu bhyone kutyo.

¹¹ Emwe Abhakorinto, kyaika na emwe nkyaikiraga abhweru, kwa okubha kibheendere okusooka mu-mitima gyeswe.

¹² Obhwendi bhweswe kw-imwe bhukyariga okuwa-wo, ni emwe musigire okukyenda.

¹³ Woori enaaika na emwe rwa kutyo omwibhusi kaaika na abhaana bhaaye, ati, mwone mukyende okusooka mu-mitima gyemwe gyone kutyo, rwa kutyo eswe kyone kibheendere.

Okuyimbana na abhaanu bhanu bhatari Bhakiriisitu

¹⁴ Mwasiga okuyimbana na abhaanu bhanu bhatari Bhakiriisitu. Angu kimari obhurengeresi na obhukayi ebhitura okwikara amwi? Angu Obhweru na ekisuute ebhitura okubha amwi?

¹⁵ Angu Kiriisitu na Bheriyaari abhatura kutiki okuungwana? Omukiriisitu na unu atari Mukiriisitu abhayimbana kutiki?

¹⁶ Na bhuriwo bhuungwaniki agati wa riiyekaru rya Nyamuwanga na ebhisusano bhya emisambwa? Eswe kiri eyekaru rya Nyamuwanga unu keesha omwoyo! Ni rwa kutyo Nyamuwanga omwene ꞉aaikire mu-Makaamo Amataakatiifu ati, “Niriikara mu-mitima gyebhwe na niriribhata agati weebhwe. Niribha Nyamuwanga weebhwe, abheene bhoone bharibha bhaanu bhaani.”

¹⁷ Mmbe, Raatabhugenyi ꞉aaikire kweki ati, “Mwiyaawure, mubhasooke-mo. Mwasiga okukuunyʼa-ko kiinu kinaabhi, niwe anye noone eniija okubharamira.”

¹⁸ Kweki ꞉aaikire ati, “Eniija okubha Esomwana, mwone omuuja okubha bhaana bhaani abhamura na abhayara. Ni anye Raatabhugenyi Nyamuwanga owa Obhuturo bhwone kutyo enaaika!”