2 Abhakorinto 5 - Iimuuma Iinyaaya

¹ Emibhiri gyeswe ginu kiikaaye-mo giri rwa amawuuna. Kimenyere ati, bhunu garikambuka, Nyamuwanga arikiyaana giinyumba gya kajaanende mu-rwire. Giinyumba giyo gitakuumbakwa na bhaanu.

² Mu-mibhiri gyeswe ginu kiri nagyo woori anu ekirwara, kyakora ekiigomba muno okuyaanwa giinyumba gyeswe giinyaaya, enaaikira okufwafibhwa emibhiri emiyaaya ginu egisooka mu-rwire.

³ Bhunu kirifwafibhwa emibhiri emiyaaya, kitaribha kinaabhi.

⁴ Mu-kabhaga kanu kikyarama mu-mibhiri gyeswe ginu, ekirwara kwa okubha mangʼana maafu agakikubha. Itari ati ekyenda okufuura emibhiri ginu egifwa, tari ekyenda okufwafibhwa emibhiri ginu gitakufwa, insonga emibhiri ginu egifwa gimirwe na ginu gitakufwa.

⁵ Nyamuwanga niwe akirooseresiishe ku-nsonga ya amangʼana gayo, ˆnaakiyaana Mwoyo Omutaakatiifu waaye, insonga abhe ingomboro ya amangʼana gayo.

⁶ Mmbe, mu-kabhaga koone kutyo kiri na obhwisige, raabhé kutyo kimenyere ati, bhunu ekirama mu-mibhiri ginu, kiri areera na Raatabhugenyi.

⁷ Ekirama okuturira mu-bhwikirisha, tari ku-ganu ekirora na ameeso.

⁸ Ni kimari ati, kiri na obhwisige, na ekirora ati nyakara kikasigeene na emibhiri ginu, kigende okwikara amwi na Raatabhugenyi.

⁹ Mmbe, kibhe ati kiri mu-mibhiri ginu, amwi ati kitari mu-mibhiri ginu, kinu eswe ekyenda ni kujomisha Raatabhugenyi.

¹⁰ Enaaika kutyo kwa okubha eswe kyone kutyo kiriyambaara imbere ku-kitebhe kya indamuro ekya Kiriisitu, insonga wumwiwumwi ayaanwe indiyo okuriingʼaana na ganu ꞉aakorere bhunu ꞉aariga akyeekaaye mu-mubhiri, gabhe majomu, amwi ati gabhe mabhiibhi.

Okugwatanya abhaanu

¹¹ Mmbe, kimenyere ati ekyendwa kyungwe Raatabhugenyi. Kyakora ekiikomeesha okufuta abhaanu, insonga bhamwikirishe. Nyamuwanga akimenyere kujomu kutyo kiri, anye noone eniisiga ati emwe mwone mu-mitima gyemwe mukimenyere kujomu.

¹² Itari ati ekisakya kweki okwikumba kw-imwe, tari ekyenda okubhayaana omwanya gwa okwikumangya ku-nsonga yeeswe. Okuseetana na gayo, omuuja okubha na amangʼana ga okusubhya bhanu abheekumangisha amangʼana geebhwe ganu agarorwa, okukira ganu gari mu-mitima gyebhwe.

¹³ Raabhe abhaanu abhakirora ati kiri bhasasi, ni ku-nsonga ya Nyamuwanga, nawe raabhe kiri na obhwenge, kiri kutyo ku-nsonga yeemwe.

¹⁴ Obhwendi bhwa Kiriisitu obhukitangasha, kwa okubha kimenyere ati omuunu owumwi ꞉aafuuye ku-nsonga ya abhaanu bhoone kutyo, insonga yeende-ko ni ati, abhaanu bhoone kutyo ꞉bhaafuuye.

¹⁵ Na ꞉aafuuye ku-nsonga ya abhaanu bhoone kutyo, insonga bhanu abharama bhaasiga okurama ku-nsonga yeebhwe abheene, tari bharame ku-nsonga ya unu ꞉aafuuye ˆnaamara ˆnaasuuka ku-nsonga yeebhwe.

¹⁶ Mmbe, okwambira woori kitakurengekanya kweki omuunu woonewoone rwa kutyo abhaanu abharengekanya. Raabhé kutyo riibhaga riirebhe ꞉kyariga nkirengekanya Kiriisitu kutyo, nawe woori kitakyakora kutyo kweki.

¹⁷ Omuunu woonewoone unu ayimbeene na Kiriisitu, aabheeye muunu muyaaya, aga kara gaaturire, woori goone kutyo ni mayaaya!

¹⁸ Gayo goone kutyo ni mirimu gya Nyamuwanga. Omwene akigwatanyiishe nawe okuturira ku-Kiriisitu, na akiyaaye emirimu gya okuraasha obhugwatanyi bhuyo.

¹⁹ Kuyo ni kwaika ati, okuturira ku-Kiriisitu, Nyamuwanga ꞉aariga ˆnaagwatanya abhaanu bha mu-kyaro na omwene, enu atakubhabharira bhikayo bhyebhwe. Omwene niwe akiyaaye emirimu gya okubhwira abhaanu amangʼana ga obhugwatanyi bhuyo.

²⁰ Mmbe, Kiriisitu akitumire okukora emirimu gyaye giyo, na okuturira kw-iswe Nyamuwanga kaabheesaasaama ati, mugwatanyibhwe nawe. Ekibhasabha ku-bhusabhi bhunu Kiriisitu akabhasabhire ati, mugwatanyibhwe na Nyamuwanga.

²¹ Kiriisitu ꞉aariga atari na kikayo na kimwi, nawe Nyamuwanga ꞉aamubhariiye ebhikayo bhyeswe bhyone kutyo, insonga eswe kibharwe ati kiri bharengeresi mu-meeso ga Nyamuwanga okuturira ku-Kiriisitu.