2 Abhakorinto 3 - Iimuuma Iinyaaya

Abhajuuma bha iimuuma iinyaaya

¹ Angu, omutoga ati ekyamba kweki okwikumba kw-imwe? Wuri, eswe kitari rwa abhaanu abhandi bhanu abhabhatumira giinyarubha gya okubhaaikira kutyo bhari, amwi ati okusabha giinyarubha gya okwaikira abhaanu abhandi kutyo bhari, okusooka kw-imwe.

² Ni emwe iinyarubha yeeswe inu ikaamirwe mu-mitima gyeswe, imenyekeene ku-bhaanu bhoone kutyo, na abhatura okuyisoma.

³ Omweresha abhweru ati ni emwe iinyarubha ya Kiriisitu, inu eyeeresha emirimu ginu ꞉kyakorere kw-imwe. Iinyarubha iyo ꞉itaakaamirwe na obhwino, tari ikaamirwe na Mwoyo Omutaakatiifu wa Nyamuwanga unu keesha omwoyo. Kweki itakaamirwe ku-bhibhaara bhya amagina, tari ikaamirwe mu-mitima gya abhaanu.

⁴ Ekyaika gayo, kwa okubha kiri na obhwisige bhuyo ku-Nyamuwanga okuturira ku-Kiriisitu.

⁵ Itari ati eswe ekiiganiirisha ati ekitura okukora kyonekyone ku-bhuturo bhweswe abheene, tari obhuturo bhweswe obhusooka ku-Nyamuwanga.

⁶ Omwene niwe ꞉aakikorere kibhe bhajuuma bha iimuuma iinyaaya. Iimuuma iyo itakureetwa na ebhiraagiro bhinu ꞉bhyakaamirwe, tari eyireetwa na Mwoyo Omutaakatiifu, kwa okubha ebhiraagiro ebhyaika ati abhakayi bharamurirwe okufwa, nawe Mwoyo Omutaakatiifu kaareeta obhurame.

Obhugungyo bhwa iimuuma iinyaaya

⁷ Ebhiraagiro bhinu ꞉bhyakaamirwe ku-magina, ꞉bhyareetere orufu. Nawe ꞉bhyeejire bhiri na obhugungyo bhunu ꞉bhwariga mbungʼarabhya, Abhaijirayeeri mbataamibhwa na okuringira Musa mu-bhusu, kwa okubha obhusu bhwaye ꞉bhwariga mbungʼarabhya, raabhé kutyo ꞉bhwamarire kabhaga kafuyi era mbusimiirira. Raabhe omurimu gwa ebhiraagiro bhinu ꞉bhyareetere orufu ꞉bhyeejire na obhugungyo rwa bhuyo,

⁸ angu omurimu gwa Mwoyo Omutaakatiifu gutakuuja okubha na obhugungyo okukira bhuyo?

⁹ Raabhe omurimu gunu ogukora abhaanu bharamurirwe guri na obhugungyo, kandi omurimu gunu ogukora abhaanu bhabhe bharengeresi mu-meeso ga Nyamuwanga gutakuuja okubha na obhugungyo obhunene okukira bhuyo?

¹⁰ Mmbe, ukariingʼaanya obhugungyo bhwa iimuuma ya kara bhurya, na obhwa iimuuma iinyaaya, obhwa iimuuma ya kara obhuwa-wo, kwa okubha obhwa iimuuma iinyaaya ni bhunene muno okubhukira.

¹¹ Raabhe kinu ꞉kyamarire kabhaga kafuyi era nkisimiirira ꞉kyariga kiri na obhugungyo, kinu ekiikara kajaanende kiri na obhugungyo okukikira.

¹² Mmbe, kwa okubha bhuyo nibhwo obhwisige bhweswe, woori ekikora emirimu kiri na riibhaasi.

¹³ Eswe kitakukora rwa Musa, omwene ꞉aariga ˆnaafundikira obhusu na ekitambaara, insonga Abhaijirayeeri bhaasiga kurora kutyo obhungʼarabhyo ꞉bhwariga mbusimiirira.

¹⁴ Nawe Abhaijirayeeri ꞉bhateendere okumenya. Na woori bhunu abhasoma Iimuuma ya Kara, bhatakutura okumenya ekimari, abhabha muna bhasibhiirisiibhwe na ekitambaara kirya. Ekitambaara kirya kikyari kusoosibhwa-wo, kwa okubha ekisoosibhwa-wo era bhunu omuunu keekirisha Kiriisitu.

¹⁵ Ni kimari ati, na reero, bhakabha mbasoma ebhiraagiro bhya Musa, bhatakutura okusombookerwa ekimari, kwa okubha ekitambaara kirya ekisibhiirisha emitima gyebhwe, bhaasiga okusombookerwa ekimari.

¹⁶ Nawe ebhaga ryoneryone omuunu akeekirisha Raatabhugenyi, Raatabhugenyi kaamusoosha-ko ekitambaara kiyo.

¹⁷ Mmbe, Raatabhugenyi niwe Mwoyo wa Nyamuwanga, na anu Mwoyo wa Raatabhugenyi ari, ayo niwe obhwiyagaaro bhuri.

¹⁸ Mmbe, eswe bhoone kutyo bhanu kitakufundikira obhusu na ekitambaara, ekyeresha obhugungyo bhwa Raatabhugenyi rwa riirore kutyo eryeresha ekiinu. Eswe ekiyindurwa, insonga kisusane nawe, okusooka ku-bhugungyo obhutooto okwingira ku-bhugungyo obhunene. Raatabhugenyi niwe Mwoyo wa Nyamuwanga, na niwe kaakora emirimu giyo.