2 Abhakorinto 2 - Iimuuma Iinyaaya

¹ Mmbe, ꞉naaramuuye ati, nyakara nisige okuuja kw-imwe eyo kweki, naasiga okubhasurumbasha.

² Niramuuye kutyo, kwa okubha raabhe nikabhasurumbasha, nniga unu kaaja okunkora anye nijomerwe? Ni emwe era nibho omutura okunkora anye nijomerwe, emwe bhanu nisurumbasiishe!

³ Kyakora ꞉naabhakaamiiye mu-nyarubha irya ati nitakuuja kw-imwe, insonga naasiga okusurumbasibhwa na emwe, bhanu mwenderwe munkore nijomerwe. Nimenyere kimari ati anye nikajomerwa, emwe mwone omujomerwa bhoone kutyo.

⁴ ꞉Naabhakaamiiye iinyarubha irya nisurumbaaye muno na obhururu mu-mutima gwani, enu amasiga ngawururaga maafu. ꞉Nitaakoraga kutyo insonga nibhasurumbashe, tari ꞉naariga neenda mumenye kutyo nibheendere muno.

Okwabhira omukayi

⁵ Mmbe, mumenye ati, omuunu akasurumbasha oweejaabho, atakunsurumbasha anye era, tari ku-rubhaara orundi, kaabha abhasurumbasiishe emwe mwone, raabhé kutyo ni kutooto era. Enaaika ati, ni kutooto era, kwa okubha nitakwenda okukusha muno amangʼana.

⁶ Indamuro inu abhaafu ꞉bhaamuramuriiye, imwisire.

⁷ Woori, omwendwa mwabhire omuunu uyo, na okumuwooyeresha insonga aasiga okusurumbara muno, ˆnaaturira-ko ˆnaafwa omutima.

⁸ Woori, enibheesaasaama mumwereshe ati mumwendere.

⁹ Insonga eyindi inu ꞉yaakorere nimbakaamira iinyarubha irya, ꞉naariga neenda nimenye raabhe mukanyunguuywe mu-goone kutyo.

¹⁰ Mukaabhira omuunu woonewoone, anye noone enimwabhira. Raabhe ririwo engʼana rinu eneendwa naabhire, naamarire okwabhira mu-meeso ga Kiriisitu ku-nsonga yeemwe,

¹¹ insonga Sitaani aasiga okukiyiga, kwa okubha kimenyere kujomu kutyo obhwenge bhwaye bhuri.

Pawuro mu-musi gwa Turowa

¹² Mmbe, bhunu ꞉naayikire mu-musi gwa Turowa okuraasha Amangʼana Amajomu iiguru ya Kiriisitu, ꞉naanyoorere Raatabhugenyi aanyiiguriiye injira ya okukora emirimu gyaye eyo.

¹³ Nawe ꞉naariga nitari na murembe mu-mutima gwani, kwa okubha ꞉nitaanyoorere-yo Omukiriisitu weejaasu Tiito. Mmbe, nindaga abhaanu bheenda eyo, niimuka okugenda Makedooniya.

Okuraasha obhuyigi bhwa Kiriisitu

¹⁴ Nawe ekikumya Nyamuwanga, kwa okubha ku-nsiku kaakitangasha okujomererwa obhuyigi bhwa Kiriisitu. Na kaakiyaana obhuturo bhwa okuraasha amangʼana ganu agaaikira Kiriisitu mbaara gyone kutyo, rwa kutyo oruwunyo rwa ebhirange oruswerana mu-ruyaga.

¹⁵ Nikwo kutyo, kwa okubha eswe kiri rwa ebhirange ebhijomu bhinu Kiriisitu kaasoosisha Nyamuwanga. Ebhirange bhiyo ebhiyikira abhaanu bhoone kutyo, bhanu abheerusibhwa na Nyamuwanga, na bhanu bhatakwerusibhwa na Nyamuwanga.

¹⁶ Ku-bhanu bhatakwerusibhwa na Nyamuwanga, okuranga kuyo ni ruwunyo orubhiibhi, runu orureeta orufu. Nawe ku-bhanu abheerusibhwa, ni bhirange bhijomu, bhinu ebhireeta obhurame. Mmbe, nniga unu kaatura okukora emirimu giyo?

¹⁷ Eswe kitari rwa abhaanu abhandi abhaafu bhanu abhagusha Riingʼana rya Nyamuwanga, insonga bhanyoore-mo omuyeero. Nawe eswe kitari kutyo, tari okuturira ku-managa ga Kiriisitu, ekiraasha Riingʼana rya Nyamuwanga kiitongeeye muno mu-meeso ga Nyamuwanga, kwa okubha omwene niwe ꞉aakitumire.