2 Abhakorinto 13 - Iimuuma Iinyaaya

Okugonya kwa obhuteero

¹ Runu ni rugendo rwani orwa akasatu orwa okuuja kw-imwe. Amakaamo Amataakatiifu agaaika ati, “Obhwaiki bhwa abhaanu bhabhiri amwi ati bhasatu bhanu bharorere, iingʼana iyo eyibha iri ya kimari.”

² Bhunu ꞉neejire kw-imwe orwa akabhiri, ꞉naagonyiishe bhanu ꞉bhaariga mbakora ebhikayo. Woori enibhagonya kweki, na enigonya na abhandi bhoone kutyo nikyari areera ati, bhunu niriija eyo kweki, nitaribhafwira ekigongo.

³ Nirikora kutyo, kwa okubha omwenda ekimenyegesho kya okumenya ati Kiriisitu kaaika okuturira ku-anye. Itari ati Kiriisitu atari na obhuturo kw-imwe, tari keeresha amanaga gaaye agati weemwe.

⁴ Ni kimari ati Kiriisitu bhunu ꞉aasungirwe ku-musarabha ꞉aariga atari na bhuturo rwa omuunu owundi woonewoone, nawe woori kaarama okuturira ku-bhuturo bhwa Nyamuwanga. Nikwo kutyo eswe kyone kitari na bhuturo, rwa kutyo Kiriisitu ꞉aariga ari, nawe ku-kubhakorera emwe emirimu, ekiija okurama amwi nawe okuturira ku-bhuturo bhwa Nyamuwanga.

⁵ Woori mwisakye emwe abheene, insonga mumenye raabhe muri na obhwikirisha. Mwiyikirishe emwe abheene. Angu, mutakumenya ati Yeesu Kiriisitu ari mw-imwe? Raabhe itari kutyo, mmbe, mutaamiibhwe okuyikiira indengo ya obhwikirisha.

⁶ Nawe eniisiga ati omuuja okusombookerwa ati eswe kitataamiibhwe ku-ndengo ya obhwikirisha.

⁷ Ekibhasabhira ku-Nyamuwanga ati mwasiga okukora engʼana ryoneryone ebhiibhi. Itari kwa okubha ati ekyenda era kirorwe ati kiyigire indengo ya obhwikirisha, tari ekyenda mukore amajomu, raabhé kutyo abhandi abhaaja okukirora ati kiyigirwe.

⁸ Enaaika kutyo, kwa okubha eswe kitakutura okurema ekimari, tari kinu ekitura, ni kugenderera era okuraasha ekimari.

⁹ Ekijomerwa kwa okubha eswe kitari na bhuturo, nawe emwe muri na amanaga. Ekisabha Nyamuwanga abhasakire mukuumire mu-bhwikirisha bhwemwe.

¹⁰ Enibhakaamira amangʼana ganu nikyari okuuja kw-imwe, insonga bhunu niriija kw-imwe eyo, naasiga okubha mururu okuramura okuturira ku-bhuturo bhwani. Enaaika kutyo, kwa okubha obhuturo bhunu Raatabhugenyi ꞉aanaaye, bhutari bhuturo bhwa okubhanyamura, tari ni bhuturo bhwa okubhasakira mukomeere mu-bhwikirisha.

Amangʼana ga okuragana

¹¹ Woori, Bhakiriisitu bheejaasu, mubhe-yo! Mukomeere mu-bhwikirisha, muwooyereshaanye, mubhe na omugambirano gumwi, mwikare muri na omurembe. Na Nyamuwanga unu ari na obhwendi na omurembe, kaaja okubha amwi na emwe.

¹² Mukeeshaanyega mwendeene Kikiriisitu.

¹³ Abhakiriisitu bheenda anu bhoone kutyo abhabhakeesha.

¹⁴ Iinema ya Raatabhugenyi Yeesu Kiriisitu, na obhwendi bhwa Nyamuwanga, na obhuyimbani bhwa Mwoyo Omutaakatiifu, bhibhe amwi na emwe mwone kutyo.