2 Abhakorinto 12 - Iimuuma Iinyaaya

Amanaga ga Pawuro agasookerera ku-ganu atakutura

¹ Eneendwa nigenderere okwikumangya, raabhé kutyo itakusakira kyonekyone. Nawe woori eneenda okwikumangya iiguru ya ebhiroro na amangʼana agandi ganu Raatabhugenyi ꞉aantuuriiye abhweru.

² Nimenyere muunu wumwi, omuunu uyo ni Mukiriisitu, unu myaka ekumi na ena ginu gyaturire, ꞉aagegerwe ˆnaasirwa mu-rwire rwa iiguru muno. Bhunu ꞉aagegerwe, nitakumenya raabhe ꞉aariga ari mu-mubhiri gwaye, amwi ati ꞉aariga atari mu-mubhiri gwaye. Nyamuwanga niwe kaamenya.

³ Na anye nitakumenya raabhe omuunu uyo bhunu ꞉aagegerwe ꞉aariga ari mu omubhiri gwaye, amwi ati ꞉aariga atari mu-mubhiri gwaye. Nyamuwanga niwe kaamenya. Nawe, kinu nimenyere ni ati, muunu uyo

⁴ ꞉aagegerwe ˆnaasirwa mu-rwire. Ari eyo ˆnoongwa amangʼana ga okuruguusha muno, ganu omuunu atakwenderwa okugasimura.

⁵ Woori, nitakwikumangya omwene, tari eniikumangisha omuunu rwa uyo, nikeekumangya omwene eniikumangya ku-nsonga ya ganu nitakutura.

⁶ Raabhé nikeendere okwikumangya, nitakabheeye mutengʼo, kwa okubha nikabheeye naaikire ekimari. Nawe eniiyinga okwikumangya, kwa okubha nitakwenda abhaanu bhandore ati niri kujomu muno okukira kutyo abharora na okuungwa okusooka ku-anye.

⁷ Nawe ꞉naayaaywe ebhinyansho ku-mubhiri gwani bhinu bhiri rwa riiwa rinu erinsoma. Ebhinyansho bhiyo ni kiinu kinu kitumirwe okusooka ku-Sitaani, kinyanshe, insonga naasiga okwikumangya ati anye nituuriiywe abhweru mangʼana maafu.

⁸ Ku-nsonga ya riyo, ꞉neesaasaamire Raatabhugenyi kasatu ansoosishe-ko ebhinyansho bhiyo.

⁹ Nawe omwene ˆnaambwira ati, “Iinema yaani eyikwisa, kwa okubha mu-ganu abhaanu bhatakutura, nimwo obhuturo bhwani obhubha abhweru.” Mmbe woori, eniikumangya ku-ganu nitakutura nijomeeywe muno, insonga obhuturo bhwa Kiriisitu bhubhe amwi na anye.

¹⁰ Ku-nsonga iyo, enijomererwa ku-ganu nitakutura, na enijomerwa nikafumwa, na okunyanka ku-nsonga ya Kiriisitu. Enijomerwa muno okuswasibhwa, na okuturira amangʼana amakomeeye. Enijomerwa kwa okubha nikabha nitakutura engʼana, niwe enibha na amanaga.

Ekiitimaato kya Pawuro ku-Bhakorinto

¹¹ Enaaika rwa omutengʼo, nawe ni emwe omukora naaike kutyo. Emwe ꞉mwariga mwendwa munkumangye. Raabhé kutyo abhandi omundora ati, niteesire, anye nitari mutumwa mutooto okukira bhanu abhabhirikirwa ati abhatumwa abhakuru.

¹² Bhunu ꞉naariga niri kw-imwe ꞉neeyeeresiishe ati niri mutumwa, kwa okubha ꞉naakorere ebhimenyegesho, ebhiruguusho na ebhigwa, nisimbiirire muno.

¹³ Ritariwo engʼana ryoneryone rinu ꞉naakorere mu-makanisa agandi, rinu nikyariga okukora kw-imwe. Amwi ꞉naabhakayiiye kwa okubha ꞉naariga nitari mujigo kw-imwe. Raabhe bhuyo nibhwo obhubhiibhi bhwani, munyaabhire!

¹⁴ Woori niri ayeeyi okuuja kw-imwe orwa akasatu, nawe nitakuuja okubha mujigo kw-imwe. Nitakwenda ebhiinu bhyemwe, tari ni emwe eneenda. Enaaika kutyo kwa okubha abhaana abhatooto bhatakwenderwa okubhiika ebhiinu ku-nsonga ya abheebhusi, tari abheebhusi nibho abhabhiika ebhiinu ku-nsonga ya abhaana.

¹⁵ Anye enijomerwa okusoosha ebhiinu bhyani na okwisoosha anye omwene, insonga nibhasakire emwe. Nawe enirora ati, kutyo anye enigenderera okubheenda muno, nikwo kutyo obhwendi bhwemwe ku-anye obhusuuwa.

¹⁶ Gari abhweru ati ꞉naariga nitari mujigo kw-imwe, nawe abhandi agati weemwe abhatoga ati, ꞉naariga niri mungʼeeni, nimbakongyaga nimbatuura mu-rusibho.

¹⁷ Angu, ꞉naabhateesiishe kyonekyone okuturira ku-bhaanu bhanu ꞉naatumire kw-imwe?

¹⁸ ꞉Neesaasaamire Tiito aaje kw-imwe eyo, na ꞉naamutumire aaje na Omukiriisitu weejaasu owundi. Woori, Tiito ꞉aabhateesiishe kyonekyone? Angu, mutakurora ati anye na omwene kiri kiinu kimwi mu-mirimu, na akatungiiye keeswe ni kamwi?

¹⁹ Amwi omutoga ati akabhaga kanu koone kutyo ekiibhagira kw-imwe. Nawe ekyaika amangʼana ganu kiyimbeene na Kiriisitu, na kiri mu-meeso ga Nyamuwanga. Abheendwa bhaani, ganu ekikora goone kutyo, ni ku-nsonga ya okubhasakira mukomeere mu-bhwikirisha.

²⁰ Enibhabhwira kutyo kwa okubha enuubhaya ati, bhunu niriija kw-imwe, amwi nirinyoora muri na katungiiye kanu katakunjomisha. Riyo ririnkora nikore amangʼana ganu gataribhajomisha. Enuubhaya ati enitura okunyoora muri na giinyombo, obhwimi, riisungu, okwiyenda abheene, obhugambi bhwa abhaanu, obhwibhusha bhwa amangʼana, okwiyeema na inkungu.

²¹ Enuubhaya ati, bhunu niriija kw-imwe kweki, Nyamuwanga waani arikora niisware mu-meeso geemwe. Nirisurumbara okurora abhaanu bhaafu agati weemwe bhanu ꞉bhaakorere ebhikayo, na bhakyari okunuga ebhikayo bhyebhwe ebhya obhutaasi bhwa ameega, gintungwa gimbiibhi ku-meega, na amangʼana agandi ganu agaswasha.